Blikastaðir

Á síðasta bæjarráðsfundi var lögð fram beiðni og yfirlýsing nokkurra Mosfellinga þess efnis að deiliskipulag um Blikastaði yrði sett í íbúakosningu. Ég var einn af þeim sem skrifuðu undir þessa beiðni og ætla ég að gera grein fyrir afstöðu minni hér og nú.
Ástæða þess að ég skrifaði undir þessa yfirlýsingu er margþætt, og má byrja á að benda á að við hjá Vinum Mosfellsbæjar höfum alltaf verið þeirrar skoðunar að beita eigi beinu lýðræði, sérstaklega þegar um mjög stór og umdeild mál er að ræða. Þetta fellur svo sannarlega undir að teljast bæði stórt og umdeilt mál.

Hvað varðar deiliskipulag Blikastaða þá skiptist það í tvö mjög ólík byggðamynstur: annars vegar það sem er nær Leirvogi, neðri hluti fyrirhugaðrar byggðar þar sem á að vera sérbýli í bland við smærri fjölbýli, og hins vegar efri hluti byggðarinnar sem á að byggjast upp í kringum Borgarlínu og þar er þéttleiki í íbúðabyggð mikill. Neðri hlutinn er að mínu mati mjög í anda Mosfellsbæjar; þar á að vera lágreist byggð í góðu sambandi við náttúruna. Ég vil jafnvel ganga svo langt að segja að þar sé á ferðinni eitt best heppnaða deiliskipulag sem komið hefur fram á höfuðborgarsvæðinu.
Efri hluti byggðarinnar er hins vegar jafn slæmur og hinn neðri er góður og er ekki í neinu samræmi við ímynd okkar fallega bæjarfélags. Raunar er byggðamynstur af þessu tagi að koma í ljós annars staðar á höfuðborgarsvæðinu sem gjaldþrota hugmyndir. Þar sem álíka byggð hefur þegar verið reist, eins og í Vogahverfi og á Valsreit, er hún alls ekki að virka eins og lagt var upp með. Samkvæmt upplýsingum sem ég hef frá fasteignasölum er sala í þessum hverfum mjög treg, auk þess sem margir íbúar sem þar hafa fjárfest vilja helst selja og komast í burtu, þar sem lítið er um bílastæði og íbúar þurfa jafnvel að leggja bílum sínum langt frá heimilum sínum.
Vegna þess að deiliskipulagið er svona tvískipt verður að segjast eins og er að þeir sem styðja verkefnið sýna ekki þann raunveruleika sem mun raungerast, heldur eingöngu glansmyndir af neðri hluta hverfisins sem er vel í anda Mosfellsbæjar. Gengið er jafnvel svo langt að sýna hestamenn á ferð á myndum, en ljóst er að ekkert pláss verður fyrir þá ágætu útivistaríþrótt á Blikastöðum.
Margoft hafa heyrst þau rök að Borgarlínan muni leysa bílastæðaskort og að ungt fólk vilji bíllausan lífsstíl, auk þess sem talað er um að nýta eigi byggingalóðir með ábyrgum hætti. Hins vegar er staðreyndin sú að veðurfar hér á Íslandi er langt frá því að vera sambærilegt við það sem gerist víða í Evrópu. Þá er byggingarland ekki af skornum skammti hér á landi og því óábyrgt að nýta það ekki undir mannvæna íbúðabyggð. Einnig er ljóst að það getur verið töluvert langt í að Borgarlína nái til Mosfellsbæjar, ef hún kemur þá yfirhöfuð. Ég tek fram að ég er sjálfur hlynntur Borgarlínu, í hvaða formi sem hún kann að verða.
Hvað varðar aukna umferð á Vesturlandsvegi þá mun hún aukast um helming, þrátt fyrir að Sundabraut og Borgarlína komi til. Flestir vita hvernig ástandið er nú þegar. Mér finnst mjög óábyrgt af sveitarfélaginu að horfa fram hjá þessum vanda, eins og hann komi okkur ekki við og sé einungis vandamál annarra. Það þarf strax að hefja samtal við nágrannasveitarfélög og Vegagerðina um hvernig leysa eigi þennan vanda áður en frekari uppbygging hefst, hvort sem er í Mosfellsbæ eða Reykjavík.
Undanfarið hafa einstaklingar í bæjarstjórn Mosfellsbæjar haldið því fram að nægilegt samtal og kynning hafi átt sér stað og því sé óþarfi að efna til íbúakosningar. Þessir sömu aðilar eru í stjórnmálasamtökum þar sem talið er mjög mikilvægt að leita til þjóðarinnar í öðru, óskyldu máli. Það er því nokkuð mótsagnakennt að leggja einungis þau mál í dóm almennings sem henta hverju sinni.

Sjálfur hef ég setið hálft kjörtímabil í skipulagsnefnd og sakna þess að nefndin hafi ekki haft raunverulegt tækifæri til að ræða málin á eigin forsendum án þess að utanaðkomandi aðilar hafi haft áhrif. Þessi mikla kynning hefur vissulega átt sér stað, en hún hefur farið fram með þeim hætti að hópur hönnuða og hagsmunaaðila hefur mætt á fundi skipulagsnefndar með lofræðum og glærusýningum sem taka allan fundartímann. Þar af leiðandi hefur enginn tími verið aflögu fyrir kjörna fulltrúa til að tjá sig um málefnið. Svo langt hefur þetta gengið að eitt sinn reyndi ég, með veikum mætti, að benda á þann umferðavanda sem gæti skapast, en einn gesta fundarins benti mér á að það væri ekki á dagskrá þess fundar.
Sjálfur hef ég tekið þá ákvörðun að bjóða mig ekki fram aftur og langar að nota tækifærið til að þakka fyrir mig. Um leið vonast ég til að pólitík verði áfram rekin í þágu íbúa Mosfellsbæjar.

Guðmundur Hreinsson. Varabæjarfulltrúi og áheyrnarfulltrúi í skipulagsnefnd Mosfellsbæjar fyrir hönd Vina Mosfellsbæjar.