Ársreikningur Mosfellsbæjar 2024

Ársreikningur Mosfellsbæjar fyrir árið 2024 var samþykktur í bæjarstjórn á dögunum.
Fulltrúar meirihlutans ásamt bæjarstjóra hafa lýst yfir mikilli ánægju með niðurstöðu ársreikningsins. Það er margt jákvætt við niðurstöðuna, en ekki er allt sem sýnist og höfum við fulltrúar D-lista bent á það í umræðunni.
Þótt ársreikningur A- og B-hluta sýni jákvæða rekstrarniðurstöðu verður að undirstrika að þessi afkoma byggir fyrst og fremst á einskiptistekjum, þ.e. tekjum af lóðasölu og byggingarrétti. Tekjur sem eiga m.a. að standa undir innviðauppbyggingu vegna nýbygginga.
Ef tekjur þessar eru teknar til hliðar má sjá að rekstrarniðurstaða A-hluta bæjarsjóðs er neikvæð um 50 milljónir.

Skattar og álögur á íbúa halda áfram að hækka og skuldir aukast
Þetta er þriðja árið í röð sem tap er á reglulegum rekstri bæjarins, þ.e. af daglegri þjónustu og starfsemi og er það áhyggjuefni að okkar mati. Þetta gerist á sama tíma og tekjur hækka um 10% á milli ára og eru þær hærri en áætlanir gerðu ráð fyrir. Er það m.a. þar sem álögur og skattar á íbúa hafa stórhækkað síðustu árin og þá sérstaklega fasteignaskattur, lóða­leiga og sorphirðugjöld.

Skuldir halda áfram að aukast og jukust þær um 2 milljarða milli áranna 2023 og 2024.
Þetta er staðan þrátt fyrir að núverandi meirihluti hafi fengið í vöggugjöf tekjur af úthlutun lóða og byggingaréttar sem nú þegar hafa numið tæpum 2 milljörðum króna og gætu þær tekjur verið komnar hátt í 4 milljarða í lok þessa kjörtímabils.

Lóðaúthlutun hefur reyndar tafist af mörgum skrýtnum ástæðum alveg frá því í upphafi þessa kjörtímabils. Framkvæmdum við byggingu leikskóla í Helgafelli var frestað og töfðust þær um tæplega eitt ár.
Uppbygging að íþróttasvæðinu að Varmá var einnig í frosti í tvö ár og ekkert bólar enn á teikningum eða útboði á þjónustubyggingu að Varmá, sem ætti að vera langt komin í byggingu samkvæmt áætlunum. Þessar tafir hafa og munu kosta bæði óþægindi og aukinn kostnað fyrir skattgreiðendur í Mosfellsbæ.

Aukin rekstrarkostnaður og engin hagræðing
Það sem vekur líka sérstaka athygli er aukinn rekstrarkostnaður. Það er keyrt áfram á fullum krafti m.a. í innleiðingu á nýju skipuriti

sem meirihlutinn lagði til og mun kosta tugi milljóna. Auk þess sem ráðningar í ný stöðugildi eru í gangi og enn fleiri á döfinni meðal annars í skrifstofuhaldi.
Fulltrúar meirihlutans hafa ekki gripið til neinna aðgerða til að bæta afkomu bæjarsjóðs og því er það athyglisvert þegar þau koma fram og hrósa sér fyrir góða fjármálastýringu.
Bætt afkoma milli ári byggir eingöngu á hærri sköttum og álögum á bæjarbúa og á einskiptistekjum, en ekki á góðri og aðhaldssamri fjármálastjórn meirihlutans.
Þessi staða og ósjálfbærni í rekstri bæjarins er áhyggjuefni að mati bæjarfulltrúa D-lista. Hún sýnir að grunnreksturinn stendur ekki undir sér og að jákvæð rekstrarniðurstaða ársins 2024 er hvorki sjálfbær né endurspeglar heilbrigðan rekstur til framtíðar.

Nýlega var skrifað undir kjarasamning við grunnskólakennara og var það mjög jákvætt skref í kjarabótum fyrir þessa mjög svo mikilvægu stétt. Kjarasamningurinn fól í sér hærri launakostnað en gert var ráð fyrir í áætlunum Mosfellsbæjar. Flest sveitarfélög hafa þegar kynnt sínar áætlanir til að loka

því fjárhagslega gati sem samningurinn skapaði en ekkert hefur enn komið frá meirihlutanum í Mosfellsbæ um áform þeirra í þessu máli.

Meirihlutinn þarf að bregðast við
Meirihluti Framsóknar, Samfylkingar og Viðreisnar i Mosfellsbæ stendur frammi fyrir skýrri áskorun nú þegar ár er eftir af líðandi kjörtímabili.
Sú áskorun er að tryggja sjálfbæran rekstur bæjarsjóðs án þess að reiða sig á einskiptistekjur og óreglulegar tekjur og að halda aftur af aukinni skuldasöfnun með skýru aðhaldi í útgjöldum.
Það þarf að bregðast við núna — með ábyrgð, festu og fjárhagslegri framsýni og það felur í sér að taka þurfi erfiðar ákvarðanir. Þar reynir á samheldni og samstarf meirihlutans.

Ásgeir Sveinsson bæjarfulltrúi D-lista
Jana Katrín Knútsdóttir bæjarfulltrúi. D- lista
Rúnar Bragi Guðlaugsson bæjarfulltrúi D- lista
Helga Jóhannesdóttir bæjarfulltrúi D-lista