Álafosshlaupið fer fram 12. júní

Álafosshlaup Scarpa fer fram fimmtudaginn 12. júní og verður ræst kl. 18:00 við Varmárvöll. Hlaupið á sér langa sögu en það var fyrst haldið árið 1921 að frumkvæði Sigurjóns Péturssonar á Álafossi. Í dag er það orðið fastur liður í bæjarlífinu og hefur hlaupurum fjölgað vel á síðustu árum. Frjálsíþróttadeild Aftureldingar sér um skipulagningu hlaupsins. Boðið verður upp á tvær vegalengdir, 5,6 km og 10 km, sem báðar liggja um fallegt og fjölbreytt svæði austanmegin í bænum.

Öllum þátttakendum er boðið í sund í Varmárlaug að hlaupi loknu og drykkir og orka verður í boði í markinu fyrir hlaupara. Vegleg verðlaun verða í boði en sigurvegarar fá Scarpa hlaupaskó frá Fjallakofanum, snillingarnir í Ásgarði smíða viðarmedalíur fyrir fyrstu þrjú sætin og einnig verður fjöldi frábærra útdráttarverðlauna. Þá eru glæsilegir farandbikarar í boði. Nánari upplýsingar eru á netskraning.is