Pílus fagnar 40 ára afmæli

Þann 1. maí 1985 var Pílus hársnyrtistofa stofnuð í Mosfellsbæ og á því 40 ára afmæli um þessar mundir.
Ingibjörg Jónsdóttir tók við stofu sem hét Rakarastofa Mosfellsbæjar og breytti nafninu í Pílus. Ingibjörg rak stofuna til 1. maí 2007 en þá tók núverandi eigandi Ragnhildur Bergþórsdóttir við og rekur stofuna enn. Stofan hefur verið staðsett í Kjarnanum síðan hann opnaði 1997 og er elsta hársnyrtistofan í Mosfellbæ.

Dugleg að taka við nemum
„Ég byrjaði hér rétt eftir að ég var búin að læra árið 2000 og tók svo við rekstrinum sjö árum seinna. Á starfstíma stofunnar hafa starfað á bilinu 5-8 hársnyrtisveinar og hársnyrtimeistarar í einu.
Við höfum alla tíð verið dugleg að taka við nemum og margir þeirra hafa ílengst og starfað á stofunni í mörg ár,“ segir Ragnhildur og bætir við að mikið af hársnyrtimeisturum séu starfandi um allt land sem hafi verið nemar á Pílus.

Öll almenn hársnyrtiþjónusta
„Við bjóðum upp á alla þjónustu, barna-, herra- og dömuklippingar, permanent, litun og skeggsnyrtingar. Við erum með rosalega breiðan viðskiptamannahóp og ég myndi segja að sérstaða okkar hér á Pílus væri að við hentum öllum, að hver sem er getur gengið hér inn og fengið það sem hann óskar eftir. Við erum með skemmtilega blöndu af fagfólki starfandi hér.
Pílus hélt upp á afmælisdaginn og bauð meðal annars viðskiptavinum upp á köku í tilefni 40 ára afmælisins. Einnig hefur stofan boðið upp á afmælisafslátt af öllum vörum í maí. Viðskiptavinir okkar hafa notið góðs af afmælinu, en við erum með mikið úrval af gæða hárvörum.“

Skemmtileg stemmning
„Hér myndast oft skemmilega stemning, hingað koma margir Mosfellingar bæði þeir sem búa í bænum og þeir sem hafa flutt burt. Mikið af fólki sem þekkist og því skapast oft skemmtilegar stundir og ýmislegt rætt.
Margir Mosfellingar eiga einhverjar tengingu við Pílus og með stækkandi bæjarfélagi og fleiri íbúum þá vonumst við til að sjá sem flesta hér á Pílus,“ segir Ragnhildur að lokum og tekur fram að starfsfólk Pílus taki vel á móti viðskiptavinum með fagmennsku og góðri þjónustulund.