Stofutónleikar í allt sumar

Stofutónleikar Gljúfrasteins hefjast sunnudaginn 8. júní en blásið verður til tónleika alla sunnudaga kl. 16 í sumar.
Aðgangseyrir er 3.900 kr. og eru miðar seldir í afgreiðslu Gljúfrasteins á tónleikadegi. Einvalalið tónlistarfólks mun stíga á stokk.
Tónleikarnir hafa verið fastur liður á safninu frá árinu 2006, en í tíð Halldórs og Auðar voru reglulega haldnir tónleikar í stofunni þar sem innlent og erlent tónlistarfólk lék listir sínar.
Stofutónleikar Gljúfrasteins eru haldnir í samstarfi við Vinafélag Gljúfrasteins en tilgangur félagsins er að veita Gljúfrasteini stuðning og aðstoð og að efla vitund um arf Halldórs Laxness og mikilvægi hans.
Meðal listamanna sem koma fram á tónleikum í sumar eru GDRN, Elín Hall, Sigurður Guðmundsson, Svavar Knútur, Valdimar Guðmundsson og Guðrún Gunnarsdóttir. Dagskrá sumarsins má finna á www.gljufrasteinn.is.
Á fyrstu tónleikunum, 8. júní, munu Kristín Sveinsdóttir mezzósópran og Kristinn Örn píanóleikari flytja lög eftir íslensk og erlend tónskáld á klassískum nótum.