N1 bílaþjónustan verðlaunuð af Michelin

N1 bílaþjónustuverkstæðið að Langatanga var nýverið sérstaklega verðlaunað af hinu alþjóðlega Michelin hjólabarðafyrirtæki.
N1 Langatanga er „Michelin Quality Dealer of the Year“ hjá Michelin á Íslandi fyrir árið 2018 og afhenti Rune Stolz, viðskiptastjóri Michelin, Úlfari Pálssyni sölustjóra að Langatanga verðlaunin.

Reglulegar hulduheimsóknir
„Þetta er gríðarlega mikil viðurkenning þar sem þeir verðlauna okkur sérstaklega fyrir framúrskarandi fagmennsku við sölu og meðhöndlun Michelin dekkjanna.
Michelin heldur úti hulduheimsóknum með reglulegu millibili þar sem fagmennska, meðhöndlun hjólbarða og upplifun viðskiptavina er könnuð og það var þeirra niðurstaða að okkur bæri að verðlauna,“ segir Úlfar Pálsson, sölustjóri N1 að Langatanga í Mosfellsbæ.

Strangar gæðakröfur frá Michelin
N1 var með eina af hæstu einkunn verkstæða á Norður­löndunum í úttekt Michelin en verðlaunin eru veitt til tveggja ára í senn. Þess má geta að öll verkstæði N1 eru með Michelin Quality Dealer vottun. Meðal þeirra ströngu gæðakrafa sem Michelin setur er hvernig hjólbarðar eru geymdir, meðhöndlaðir, settir á og hvernig gert er við þá, hvernig upplýsingagjöf til viðskiptavina fer fram, hvernig tekið er á móti viðskiptavinum og öryggi þeirra er háttað.
Horft er til þjálfunar og endurmenntunar starfsmanna, aðbúnaðs á verkstæðum, tækjabúnaðar og hvernig brugðist er við ábendingum viðskiptavina.