Íþróttamenn Mosfellsbæjar

Kjör íþróttakonu og íþróttakarls Mosfellsbæjar var tilkynnt við hátíðlega athöfn sem fram fór í Íþróttamiðstöðinni að Varmá á dögunum.
Alls voru tilnefndar níu konur til kjörs íþróttakonu Mosfellsbæjar frá fimm íþróttafélögum og var Íris Eva Einarsdóttir, skotfimikona úr Skotfélagi Reykjavíkur, kjörin íþróttakona Mosfellsbæjar 2015.

Íris náði í gull á Smáþjóðaleikunum
Íris varð hlutskörpust í öllum innanlandsmótum í loftriffli kvenna sem haldin voru á árinu. Hún náði meistaraflokksárangri á öllum mótum sem og Ólympíulágmörkum í þessari grein.
Hún fékk gullverðlaun á Reykjavíkurleikunum 2015 og vann til gullverðlauna á Smáþjóðaleikunum sem haldnir voru í Reykjavík. Þá varð hún Íslands- og bikarmeistari á árinu. Íris er númer 241 á styrkleikalista Alþjóðaskotsambandsins.

Reynir landaði heimsmeistaratitli
Alls voru tilnefndir átta karlar til kjörs íþróttakarls Mosfellsbæjar frá fimm íþrótta­félögum og var Reynir Örn Pálmason, hestaíþróttamaður úr Hestamannafélaginu Herði, kjörinn íþróttakarl Mosfellsbæjar 2015.
Árið 2015 var besta keppnisár Reynis frá upphafi. Þar bar hæst heimsmeistaratitill á gríðarsterku móti í Herning í Danmörku og tvenn silfurverðlaun sem var besti árangur á öllu mótinu.
Reynir var tvöfaldur Íslandsmeistari í samanlögðum fimmgangsgreinum og í slaktaumatölti, þar sem hann hlaut hæstu einkunn 8,88. Reynir er mjög ofarlega á heimslistum FEIF Worldranking 2015 sem eru heimssamtök Íslandshesta.

Fjöldi viðurkenninga veittur
Einnig voru veittar 105 viðurkenningar fyrir Íslands-, bikar-, landsmóts og deildarmeistaratitla og 96 viðurkenningar fyrir þátttöku og æfingar með landsliðum Íslands í fjölmörgum íþróttagreinum ásamt því að efnileg ungmenni 16 ára og yngri í hverri íþróttagrein voru heiðruð.
Við sama tækifæri hlaut Sigrún Þ. Geirsdóttir sundafrekskona viðurkenningu fyrir þann frábæra árangur að vera fyrst íslenskra kvenna til að synda yfir Ermarsundið, þ.e. 62,7 km á 22 og hálfri klukkustund. Ótrúlegt afrek.