Í huga mínum er Mosfellsbær grænn og nútímalegur bær. Hér er góður aðgangur að óspilltri náttúru og grænum svæðum, byggðin fjölbreytt og í góðu samræmi við umhverfi sitt.
Þegar ég var í fæðingarorlofi með litlu stúlkuna mína var ég duglegur að ganga með hana í kerrunni sinni. Ég held að ég hafi á þessum sumarmánuðum gengið nokkurn veginn hvern einasta göngustíg bæjarins þrisvar, og fannst mér það nær alltaf jafn skemmtilegt og endurnærandi – með einni undantekningu. Það var ef þörf var á að gera krók á göngutúrnum til að skjótast í Bónus eða Krónuna. Umferðin, skarkalinn og breiðar göturnar fældu frá eftir rólega göngu upp með Varmánni eða niður í Leiruvog.

Sé horft á loftmynd af miðbæ Mosfellsbæjar kemur ein staðreynd í hug ofar öðrum. Það er að húsin eru smá og bílastæðin ógnarstór. Þegar við skipuleggjum umhverfi okkar og byggð er það augljóslega gert eftir þörfum mannfólksins sem þar býr. Þær þarfir eru þó síbreytilegar og þarf skipulagsvaldið að vera sveigjanlegt eftir því.
Þegar umhverfið í miðbæ Mosfellsbæjar er skoðað með það að sjónarmiði sjást glögglega þarfir fortíðarinnar.

Mosfellsbær er bæjarfélag í örum vexti og eftirsótt. Þessi sístækkandi hópur bæjarbúa hefur fjölbreyttari þarfir og væntingar en áður og eðlilegt að bæjarumhverfið breytist í takt við það.
Þótt einkabíllinn sé og verði áfram þarfur þjónn í þeim raunveruleika sem við búum við hér á landi þarf að gera öðrum samgöngumátum og áherslum jafnhátt undir höfði.
Við í Vinstri Grænum höfum þegar sýnt það í verki með stuðningi við Borgarlínu og uppbyggingu fjölþátta samgöngustíga hér í bænum. En við getum gengið enn lengra, sér í lagi í nærumhverfi okkar.
Breiðgata getur hæglega orðið að göngugötu, bílastæði að torgi eða almenningsgarði þar sem börn geta leikið og foreldrar setið og sötrað kaffi. Þannig gætum við svarað kalli nútímans um vistvænni samgöngur og lífshætti, en einnig gagnrýni þeirra sem kalla Mosfellsbæ svefnbæ.
Ég sé fyrir mér að hér muni rísa lífvænlegri, fjölbreyttari og grænni miðbær sem fólk mun vilja heimsækja og jafnvel eyða tíma í – hvort sem það komi gangandi, hjólandi, í strætó eða á bílnum. Það er bara að þora að taka af skarið.

Bjartur Steingrímsson
Höfundur skipar 3. sæti V-listans í kosningunum 14. maí.

Tenging við börnin okkar á því aldursskeiði sem þau þurfa mest á okkur að halda er mikilvæg. Þegar dætur okkar hjóna voru kornungar starfaði með mér kona, alveg hreint einstök kona sem er fóstra. Hún sagði við mig, er hún sá mig með dætrunum eitt sinn, að við þyrftum að nýta tímann okkar vel með þeim því þessi tími yrði fljótur að líða. Nú er eldri dóttirin erlendis í námi og sú yngri á leiðinni á eftir systur sinni. Svona týnist tíminn en minningin lifir.
Já, þetta tók ekki langan tíma sé litið aftur. En búum við öll við það tækifæri sem ég gat gripið, þ.e. að vera til staðar heima sem faðir í hvert sinn sem þær komu heim úr skólanum? Nei, við búum ekki öll við það. Margir vinna baki brotnu og bæði hjón oft að heiman til að ná endum saman. Það dugir jafnvel ekki alltaf til. Einstæðir foreldrar berjast í bökkum og í sama mund hækkar húsnæðiskostnaður sem aldrei fyrr, skattar og aðrar álögur.
Hvers vegna hefur sveitarfélögum á höfuðborgarsvæðinu ekki tekist að svara þessu með úthlutun lóða svo tryggja megi nægt framboð til að halda megi niðri verðlagi á húsnæði? Eftir hrun fjármálakerfisins 2008 hurfu eignir fólks og fyrirtæki inn í nýja banka og lóðir fyrirtækja eins og ÍAV sem missti Blikastaðaland í hendur banka. Bankar fá nánast óendanlegt ráðrúm að halda þessu í eignasafni sínu og í dótturfélögum og sjóðum. Það er í raun niðurgreiðsla frá ríkinu í formi laga til handa fjármálafyrirtækjum. Víða erlendis er bönkum gert að losa þetta út á markaðinn innan árs eða tveggja ára. Með því gæti komið leiðrétting rétt eins og gerist þar sem markaðir eru raunverulega virkir og ekki stjórnað af fjármálafyrirtækjum eins og á Íslandi. Þetta þýðir að íslenska húsnæðismarkaðnum er stýrt.
Þetta er kostnaður almennings og samfélaga, eins og sveitarfélaga, sem í raun og sann er færður í bækur banka og oftar en ekki þar á tekju- og eignahliðina. Mosfellsbær hefði hugsanlega getað keypt Blikastaði á sínum tíma og verið nú að úthluta hagkvæmum lóðum á markaðinn en ekki Arion banki. Svo eiga sveitarfélögin að sitja eftir með alla þjónustuna og kröfur um bættan aðbúnað fyrir aldraða, börn og barnafólk.
Í vikunni var ritað undir byggingu 44 nýrra hjúkrunarrýma að Hömrum í Mosfellsbæ. Þau 74 rými sem þá verða til staðar nægja ekki nema fyrir komandi kjörtímabil því árgangarnir, sem eru að koma inn í hópinn 80 ára og eldri, eru um eða yfir 50 til 65 einstaklingar árlega. Þá er aðeins teknir þeir með sem hér búa í dag. Því á það að vera fyrsta verk nýrrar bæjarstjórnar að stefna að enn frekari uppbyggingu hjúkrunarrýma og stórbæta stuðningsþjónustu bæjarins sem er afar döpur í dag.
Samhliða þessu verður að stórbæta þjónustu skólaskrifstofu bæjarins svo bæta megi í sálargæslu, geðrækt og stuðning við börn með fjölþættan vanda. Biðraðir fyrir börn í íþróttum, í greiningar hjá fagfólki er glötuð ævi rétt eins og hjá okkur sem erum eldri.

Sveinn Óskar Sigurðsson
Bæjarfulltrúi í Mosfellsbæ fyrir Miðflokkinn og oddviti fyrir komandi sveitastjórnarkosningar

Framsókn í Mosfellsbæ styður áframhaldandi uppbyggingu á íbúðarhúsnæði fyrir alla aldurs- og tekjuhópa. Annað væri óábyrgt miðað við stöðuna á húsnæðismarkaðnum í dag. Sú staða hefur áhrif á flest heimili meðal annars í gegnum vaxandi verðbólgu.
Margir finna fyrir skorti á húsnæði og þá sérstaklega unga fólkið en einnig þeir sem eldri eru. Húsum þar sem ungmenni fá aðstöðu í bílskúrnum hjá foreldrum sínum fjölgar enn í Mosfellsbæ og húsaleiga er gríðarlega há.

Fréttir af fyrirhugaðri uppbyggingu í Blikastaðalandi eru því löngu tímabærar. EN það er ekki sama hvernig hlutirnir eru gerðir. Þessi uppbygging mun hafa gríðarleg áhrif á núverandi íbúa Mosfellsbæjar. Það vita þau sem hafa búið hér á síðustu tveimur áratugum. Á þeim tíma hefur íbúafjöldinn tvöfaldast. Sú fjölgun hefur ekki verið án vaxtaverkja og við þurfum að læra af þeirri reynslu.

Við þurfum að horfa á þróun og rekstur bæjarins í samhengi. Það er ekki skynsamlegt að líta til stakra málaflokka og halda að rekstur á einum lið hafi ekki áhrif á annan. Ekkert frekar en í rekstri fyrirtækja eða heimila.
Staðan er sú að á sama tíma og núverandi bæjarstjórn hefur skuldbundið verðandi fulltrúa varðandi uppbyggingu á Blikastaðalandi, sem er gríðarlega stórt verkefni, stöndum við frammi fyrir stórum áskorunum á öðrum sviðum. Það eru samgöngumálin á höfuðborgarsvæðinu sem skipta okkur Mosfellinga miklu máli. Einnig munum við glíma við eftirköst heimsfaraldurs, endurskipuleggja málaflokk eldra fólks, taka á móti flóttafólki og efla starfsemi leik- og grunnskóla með hagsmuni barna að leiðarljósi svo eitthvað sé nefnt.
Að auki eigum við inni samtal um þróun á atvinnustarfsemi í Mosfellsbæ sem hefur ekki verið í forgrunni heldur mætt afgangi sem sést á stefnu- og áhugaleysi bæjaryfirvalda.

Þessi verkefni verða ekki leyst farsællega nema með samvinnu, samtali við íbúa, trausti og forgangsröðun. Þau verða heldur ekki leyst farsællega nema með því að styrkja stjórnsýsluna til að gera henni kleift að sinna sínum verkefnum.
Það er stjórnmálanna að leggja til framtíðarsýn og gera langtímaáætlanir. Fólki í stjórnmálum ber skylda til að gera það á gagnsæjan hátt og þannig að lýðræðið sé virt. Upplýsingagjöfin og samtalið á að fara stöðugt fram en ekki bara rétt fyrir kosningar. Það á heldur ekki að koma íbúum né kjörnum fulltrúum á óvart þegar verið er að gera stóra samninga um uppbyggingu í sveitarfélaginu. Það eru ekki vinnubrögð sem við getum boðið upp á.

Framsókn í Mosfellsbæ leggur áherslu á heiðarleg og gagnsæ vinnubrögð. Virkt samtal við hagsmunahópa og öflugt nefndarstarf í nefndum og ráðum bæjarins. Við viljum hugsa stórt og við viljum hugsa til lengri tíma.
Hvernig sveitarfélag verður Mosfellsbær í framtíðinni? Hvaða áherslur þarf að leggja í uppbyggingu bæjarins sem gerir hann aðlaðandi og ákjósanlegan til búsetu til framtíðar bæði fyrir börnin okkar og okkur sjálf á efri árum? Svarið við þessum spurningum liggur hjá okkur sem búum hér í dag og látum okkur málin varða. Hlutverk kjörinna fulltrúa er að hafa hugrekki til að hlusta og koma hlutunum í verk.

Munið X við B á kjördag

Aldís Stefánsdóttir
2. sæti á lista Framsóknar í Mosfellsbæ

Forsendubreytingar í skipulagsmálum
Mosfellsbær hefur verið í miklum vexti undanfarin ár og nú lítur út fyrir að á næstu árum muni eiga sér stað enn meiri uppbygging innan bæjarfélagsins.
Áætla má að fjöldi bæjarbúa verði kominn yfir 30.000 eftir um 20 ár. Þegar svona stendur á er nauðsynlegt að staldra við og spyrja hvort ekki hafi orðið forsendubreytingar hvað varðar miðbæjarskipulag bæjarins.
Hver er þörfin á næstu árum og hvað kemur fram í núverandi skipulagi? Tekur miðbæjarskipulagið á komandi innviðaþörfum og þjónustuóskum bæjarbúa? Hvar verður endastöð borgarlínunnar og er gert ráð fyrir skiptistöð fyrir innanbæjarvagn? Er ennþá gert ráð fyrir kirkju í miðbænum eins og um var talað á sínum tíma? Hvar endar og byrjar miðbærinn? Það eru margar spurningar sem brenna á fólki, en það stendur oft á svörunum.

Óljós uppbyggingarstefna
Þegar farið er inn í skipulagssjá koma í ljós fjögur deiliskipulög sem ná yfir það svæði sem mætti túlka sem miðbæ Mosfellsbæjar. Við þau skiplög eru síðan fjölmargar stakstæðar skipulagsbreytingar undir viðkomandi skipulögum, sem komið hafa til vegna breytinga og óska lóðarhafa. Þetta leiðir til þess að uppbyggingarstefnan er óljós, sundurslitin og missir marks.

Leitin að miðbænum mun því halda áfram um nokkurt skeið, nema við tökum þá stefnu að marka skýra og heildstæða sýn hvað varðar uppbyggingu til næstu ára.
Samfylkingin vill marka skýra stefnu hvað varðar skipulag miðbæjarins, uppbyggingaráform innan áhrifasvæðis hans og varða leiðina með áfangaskiptingu. Það að uppfæra stakstæð skipulög eftir óskum lóðarhafa kemur okkur ekki upp úr hjólförum gamalla skipulagshugmynda. Hér er ekki nóg að segja; er ekki bara best að gera eins og við höfum alltaf gert! Hér er þörf á breytingum.

Hvað þarf til – hvert er ferlið fyrir skipulagssamkeppni
Það er nauðsynlegt að endurskoða öll þau deiliskipulög sem ná til þess svæðis sem afmarkað er í aðalskipulagi sem miðbær Mosfellsbæjar. Í þessum deiliskipulögum er margt sem má halda í en annað er úr takti við óskir og þarfir íbúa og er nauðsynlegt að víki. Áður en þessi endurskoðun getur farið fram þarf að skilgreina hvaða þjónustu og starfsemi við Mosfellingar viljum sjá í miðbænum.

Samfylkingin telur það best gert með opnu samtali við þá sem nýta sér þá þjónustustarfsemi sem er í miðbænum og þeirra sem veita hana. Þetta væri best gert í gegnum opið íbúaþing sem og rýnihópa um uppbyggingu miðbæjarins og með aðkomu lóðarhafanna sjálfra.
Þegar þessar óskir og forsendur liggja fyrir er kominn grundvöllur til þess að fara í skipulagssamkeppni, sem við hjá Samfylkingunni teljum eina af meginforsendunum fyrir heildstæðri uppbyggingu á nýjum miðbæ.

Skipulagssamkeppni er því aðferð til þess að móta heildstæða sýn en samtímis draga fram þau tækifæri sem kunna að skapast við þær forsendubreytingar sem verða með fjölgun bæjarbúa. Um leið er mörkuð stefna og tekin frá svæði fyrir ákveðna innviðaþjónustu, menningarstarfsemi og verslun í bland við nýjar miðbæjaríbúðir.
Nauðsynlegt er að ná fram heildstæðu skipulagi að nýjum miðbæ, skipulagi sem kallar fram staðaranda Mosfellsbæjar og gerir okkur stolt af miðbænum okkar.

Anna Sigríður Guðnadóttir og Ómar Ingþórsson, skipa 1. og 3. sæti á lista Samfylkingarinnar.

Árið 2005 tók ég blaðaviðtal við Sigstein Pálsson sem var síðasti bóndinn á Blikastöðum, hann var þá tíræður en enn mjög ern. Í viðtalinu kemur fram að þess yrði ekki langt að bíða að íbúðabyggð risi á Blikastaðatúnum.
Síðan eru liðin 17 ár og Blikastaðaland hefur verið eins og óbyggð eyja milli Reykjavíkur og þéttbýlisins vestast í Mosfellsbæ. Á sama tíma hefur ríkt mikill lóða- og húsnæðisskortur á höfuðborgarsvæðinu. Það er þess vegna mikið fagnaðarefni að nú sjái til lands og uppbygging hefjist á þessum slóðum.

Stórfelld uppbygging
Á síðustu misserum hafa rýnihópar verið að störfum, meðal annars til að skilgreina þá miklu innviðauppbyggingu sem er nauðsynleg á Blikastöðum, samfara þéttri íbúðabyggð þar. Einnig hófust viðræður milli Mosfellsbæjar og Arion banka sem er eigandi landsins. Eftir langar og strangar viðræður var viðamikill samningur um stórfellda uppbyggingu á Blikastöðum samþykktur á fundi bæjarstjórnar Mosfellsbæjar 4. maí síðastliðinn.
Blikastaðaland verður byggt upp í áföngum á næstu áratugum og fram undan er mikil skipulagsvinna hjá Mosfellsbæ vegna þessa viðamikla verkefnis. Gert er ráð fyrir fjölbreyttri og blandaðri íbúabyggð, íþróttamannvirkjum, skólabyggingum og öðru sem fjölmenn íbúabyggð kallar á.
Uppbygging á Blikastöðum mun draga úr lóðaskorti á höfuðborgarsvæðinu og flýta því að Borgarlínan verði lögð upp í Mosfellsbæ.
Samkvæmt samningnum mun Arion banki leggja fram verulega fjármuni til uppbyggingar á innviðum, þar er m.a. um að ræða gatnagerð og skóla- og íþróttamannvirki.
Að þessu leyti er samningurinn einsdæmi, það er einnig fátítt að svo stórt íbúasvæði sé skipulagt frá grunni, í því felast mörg spennandi tækifæri.

Kennileiti
Náttúruperlur og útivistarsvæði eru í seilingarfjarlægð frá Blikastaðalandi, til dæmis Úlfarsfell, Úlfarsá og Leiruvogur. Á síðustu öld var eitt stærsta kúabú landsins á Blikastöðum, þar voru allt að hundrað nautgripir þegar mest lét. Útihúsin standa enn, þau verða endurgerð, þeim fengið nýtt hlutverk og munu mynda „hjartað“ í þeirri íbúabyggð sem rís á Blikastaðalandi.
Í áðurnefndu blaðaviðtali við Sigstein Pálsson var hann spurður að því hvernig honum litist á að byggja á þessari gömlu bújörð, hann svaraði með þessu orðum: „Mér líst bara vel á það. Þetta er þróunin og mér hefur alltaf þótt gaman að fylgjast með framkvæmdum og framförum hér í sveitarfélaginu.
Það verður gott að byggja á Blikastaðatúnum. Þar fauk aldrei hey og fólki kemur til með að líða vel þarna.“

Bjarki Bjarnason, skipar 1. sæti V-listans í kosningunum 14. maí.

Mosfellsbær er fjölskylduvænt, heilsueflandi og framsækið bæjarfélag þar sem er gott og eftirsóknarvert að búa.
Samkvæmt könnunum eru íbúar með þeim ánægðustu á landinu og hér hefur orðið ein mesta hlutfallslega fjölgun íbúa undanfarin ár. Samfara þessari þróun hefur verið í gangi mesta framkvæmdaskeið í sögu sveitarfélagsins í uppbyggingu innviða auk þess sem þjónusta við bæjarbúa er sífellt að aukast. Mosfellsbær stendur vel fjárhagslega, þökk sé ábyrgri stjórn fjármála og á líðandi kjörtímabili hafa framkvæmdir í Mosfellsbæ aldrei verið meiri. Sú uppbygging mun halda áfram með miklum framkvæmdum á íþróttamannvirkjum að Varmá og nýjum leikskóla í Helgafellshverfi svo eitthvað sé nefnt.
Sjálfstæðisflokkurinn í Mosfellsbæ hefur haft það að leiðarljósi að halda álögum á íbúa eins lágum og best getur við rekstur bæjarins. Við erum stolt af því að hafa lækkað álögur á íbúa á líðandi kjörtímabili m.a. með lækkun fasteignaskattaprósentu á íbúða- og atvinnuhúsnæði. Þá hafa álögur á barnafólk lækkað verulega þegar leikskólagjöld lækkuðu um 20% á líðandi kjörtímabili og nú býðst 12 mánaða börnum í Mosfellsbæ dagvistarpláss.

Það er sterkt og faglegt skólasamfélag í Mosfellsbæ sem við ætlum að styrkja enn frekar og veita meiri stuðning fagfólks inn í skólana. Við ætlum að opna stafræna Fab Lab smiðju og viljum opna Þróunar- og nýsköpunarsmiðju sem veitir ótal tækifæri fyrir alla aldurshópa.

Skipulagsmálin eru stór þáttur í vaxandi samfélagi og uppbygging í Mosfellsbæ heldur áfram. Búið er að ná samningum um uppbyggingu á Blikastaðalandi þar sem rísa mun glæsilegt vistvænt hverfi með fjölbreyttu íbúðamynstri fyrir alla aldurshópa. Í Blikastaðalandi sem mun rísa í áföngum til næstu 20-25 ára mun einnig verða fyrsta flokks þjónusta þegar litið er til skóla- og íþróttamannvirkja auk hágæða samgangna. Uppbygging mun einnig halda áfram á öðrum stöðum í bænum.
Við munum áfram standa vörð um sérkenni Mosfellsbæjar sem „sveit í borg“ og huga vel að dýrmætri náttúrunni allt í kringum okkur.
Málefni fatlaðra er mikilvægur málaflokkur sem nauðsynlegt er að veita verðskuldaða athygli. Á líðandi kjörtímabili höfum við aukið þjónustu s.s. með opnun úrræðis fyrir geðfatlaða. Við munum halda áfram þeirri þróun, meðal annars með úthlutun lóðar undir nýjan íbúðakjarna í 5. áfanga Helgafellshverfis fyrir fatlað fólk og með áherslu á samþættingu þjónustu.
Mosfellsbær er heilsueflandi samfélag með Aftureldingu sem hornstein í okkar frábæra bæjarfélagi. Við munum leggja mikla áherslu á að samþykktri uppbyggingu á Varmásvæðinu verði flýtt eins og aðstæður leyfa auk þess sem uppbygging á íþróttamannvirkjum muni hefjast á Blikastaðalandi, þar á meðal fjölnota knatthús í fullri stærð.
Eldri borgurum fer fjölgandi og á þessu kjörtímabili höfum við lagt mikla áherslu á lýðheilsumál eldri Mosfellinga og munum halda því áfram. Í samstarfi við Eir mun íbúðum fyrir eldri borgara fjölga auk mikillar stækkunar á rýmum fyrir félagsstarf. Jafnframt er búið að samþykkja aðkallandi stækkun hjúkrunarheimilisins Hamra sem verður með 75 rými eftir stækkun.
Ábyrgur og traustur rekstur undanfarinna ára gerir það að verkum að framtíðin er björt í Mosfellsbæ. Sjálfstæðismenn hafa verið við stjórnvölinn á þessum uppgangstímum þar sem þjónusta og rekstur sveitarfélagsins hefur tekið miklum og jákvæðum breytingum og bærinn eflist og dafnar.
Við ætlum að sjá til þess að rekstur bæjarfélagsins verði áfram ábyrgur og traustur, álögur á íbúa muni halda áfram að lækka og að áfram verði best að búa í Mosfellsbæ. Til þess að ná þeim markmiðum okkar þurfum við þinn stuðning, hvert atkvæði skiptir máli.

Ásgeir Sveinsson og Jana Katrín Knútsdóttir skipa 1. og 2. sæti á framboðslista Sjálfstæðisflokksins fyrir sveitarstjórnarkosningar 14. maí.

Fyrsta skólastig, eða leikskólar, er einhver mikilvægasta þjónusta sem sveitarfélög veita. Í Mosfellsbæ er heimilt að sækja um leikskólavist fyrir börn frá 12 mánaða aldri. Gott og vel. Það sem er mikilvægast í umsóknarferlinu er að óvissu um hvenær og hvar barnið fái leikskólapláss sé eytt eftir fremsta megni.
Það er nógu stórt verkefni fyrir nýbakaða foreldra að sinna uppeldinu, án þess að þurfa að bæta öðrum áhyggjum ofan á það. Vissulega hafa verið ákveðnir vaxtarverkir í takti við vaxandi íbúafjölda í sveitarfélaginu og því krefjandi verkefni að mæta aukinni þörf í þessum málum. Ekki er hægt að verða við öllum óskum um tiltekinn skóla og getur fæðingarmánuður barns haft mikið að segja í þeim efnum. Aðalatriðið er að við veitum foreldrum hugarró. Við í Framsókn Mosfellsbæ viljum að þjónustan við börn sé veitt um leið og fæðingarorlofi foreldra lýkur, það þarf að sjá til þess að bilið sé brúað.
Það er gríðarlega krefjandi starf að vera starfsmaður á leikskóla og mikil ábyrgð sem felst í því að sjá um börnin okkar á þessum mest mótandi tíma á þeirra ævi. Við sem foreldrar gerum ríkar kröfur á leikskólastarfið, alveg eins og starfsfólkið gerir kröfur á okkur sem foreldra. Það þarf að sjá til þess að búið sé þannig um að við sem sveitarfélag séum einmitt að veita bestu þjónustu sem völ er á, framúrskarandi þjónustu. Hærra hlutfall fagmenntaðra leikskólakennara er stór þáttur í því að efla góða þjónustu enn frekar. Sem dæmi má nefna að ófaglærðir starfsmenn leikskóla eru oft á tíðum einstaklingar sem vilja sækja sér menntunina en vantar hvatningu til að taka skrefið.
Við hjá Framsókn viljum beita okkur fyrir því að efla það mikilvæga starf sem unnið er í leikskólum sveitarfélagsins, meðal annars með því að mæta því frábæra fólki sem þar starfar og auðvelda því að sækja sér viðeigandi menntun til að styrkja stöðu sína. Eru fjölmargar leiðir færar í þeim efnum. Á sama tíma erum við að bæta þjónustuna og gera vinnustaðina enn eftirsóknarverðari.
Ásmundur Einar Daðason, mennta- og barnamálaráðherra, hefur unnið mjög gott starf fyrir farsæld barna og fjölskyldna í landinu. Mikið framfaraskref var stigið þegar Alþingi samþykkti frumvarp til nýrra laga um samþættingu þjónustu í þágu farsældar barna. Þau ganga út á að tryggja aukna samvinnu og samfellu í þjónustu við börn, eitthvað sem mikilvægt er að verði innleitt sem fyrst. Hér í Mosfellsbæ eigum við að vera framúrskarandi þegar kemur að málefnum barna, því við viljum bara það besta fyrir börnin okkar.

Setjum málefni barna í forgang og merkjum X við B á kjördag.
Höfundur er faðir tveggja barna á leikskólaaldri.

Sævar Birgisson
3. sæti á lista Framsóknar í Mosfellsbæ