Óvissu eytt um rekstur Skálatúns

Halla Karen Kristjánsdóttir

Á dögunum voru undirritaðir samningar varðandi framtíðaráform á Skálatúni.
Samningarnir marka tímamót bæði fyrir rekstur heimilisins sem þar hefur verið rekið í áratugi en einnig fyrir framtíðaruppbyggingu á svæðinu. Mosfellsbær mun nú taka við rekstri Skálatúns. Það þýðir meðal annars að starfsfólk Skálatúns verður framvegis hluti af starfsliði Mosfellsbæjar. Samningarnir tryggja að íbúar Skálatúns geti áfram búið þar en mörg þeirra hafa haft búsetu á Skálatúni frá barnæsku. Þar með er búið að eyða þeirri óvissu sem verið hefur um rekstur heimilisins um nokkurt skeið.
Um er að ræða talsvert flókna samninga þar sem margir koma að. Á síðustu árum hafa verið gerðar nokkrar atlögur að því að leysa málin sem snúast bæði um erfitt rekstrarumhverfi í málaflokki fatlaðs fólks en einnig um áratugalanga sögu heimilisins að Skálatúni.
Það er því mikill léttir fyrir alla hlutaðeigandi að komin sé niðurstaða í málið. Að okkar mati eiga allir sem komu að þessum samningum miklar þakkir skilið og það var lykilatriði að bæjarstjórnin stæði einhuga á bakvið samningana.

Aldís Stefánsdóttir

En þó langar okkur að nefna sérstaklega framlag mennta- og barnamálaráðherra og bæjarstjóra Mosfellsbæjar sem leiddu þessa vinnu af mikilli hugsjón og auðmýkt gagnvart öllum hlutaðeigandi.

Verkefni án hliðstæðu
Varðandi framtíðaráform á svæðinu þá var einnig skrifað undir viljayfirlýsingu milli Mosfellsbæjar og mennta- og barnamálaráðuneytis um uppbyggingu á starfsemi á svæðinu sem verður í þágu barna og ungmenna.
Þetta þýðir að á Skálatúnsreitnum er ætlunin að byggja upp aðstöðu fyrir stofnanir og samtök sem vinna í þágu barna, svokallaða Barnadeiglu. Þetta er uppbyggingarverkefni án hliðstæðu hér í Mosfellsbæ. Um er að ræða sérstakan þjónustukjarna sem á að halda utan um þær stofnanir sem koma að þjónustu við börn af öllu landinu.

Fjöldi starfa flyst í Mosfellsbæ
Hugmyndin er að skapa aðstöðu sem er til þess fallin að efla samstarf og auðvelda aðgengi með því að hafa alla þessa þjónustu á einum stað. Þetta mun hafa í för með sér gríðarlega atvinnuuppbyggingu í Mosfellsbæ og fjölda starfa sem mun flytjast í bæinn.

Sævar Birgisson

Orð eru til alls fyrst og það er mikilvægt að vera með framtíðarsýn og metnaðarfull áform fyrir bæinn okkar. Hvort sem um er að ræða atvinnuuppbyggingu eða þjónustu við fatlað fólk. Í framhaldi af þessum ákvörðunum er mikilvægt að halda áfram að vanda sig og hafa hagsmuni íbúanna að leiðarljósi við þessar breytingar. En við erum vongóð um að uppbygging sé fram undan enda býður þetta landsvæði upp á mikil tækifæri til þess að búa til magnaða umgjörð sem snýr að því að auka samtal og samvinnu þvert á kerfi og stofnanir í þágu barna og ungmenna á landinu öllu.

Halla Karen Kristjánsdóttir, Aldís Stefánsdóttir, Sævar Birgisson og Örvar Jóhannsson.
Bæjarfulltrúar Framsóknar í Mosfellsbæ.

Örvar

 

Fjölbreyttir búsetukostir í Mosfellsbæ

Anna Sigríður Guðnadóttir

Því miður hefur Mosfellsbær ekki staðið sig sem skyldi hvað varðar uppbyggingu búsetuúrræða fyrir fatlað fólk á liðnum árum.
Þegar núverandi meirihluti tók við fyrir einu ári síðan var einn búsetukjarni á áætlun, þ.e. búsetukjarni sem Þroskahjálp mun reisa í 5. áfanga Helgafellshverfis og Mosfellsbær síðan reka. Engir aðrir búsetukjarnar voru á áætlun.
Þegar horft er til þess að gera áætlun um uppbyggingu búsetuúrræða fram í tímann er auðvitað nærtækast að horfa til þess fjölda ungra fatlaðra einstaklinga sem þegar býr í sveitarfélaginu og mun, þegar fram líða stundir, að sjálfsögðu þurfa stað til að búa á. Stað þar sem þau fá þjónustu og njóta þess öryggis og sjálfstæðis sem þeim ber.
Í meirihlutasamkomulagi B, S og C lista kemur fram að unnið skuli að áætlun um uppbyggingu búsetuúrræða fyrir fatlað fólk og er undirbúningur þeirrar vinnu þegar hafinn.

Ólafur Ingi Óskarsson

Fjölbreytt byggð
Eitt af mikilvægum verkefnum bæjarstjórnar er að móta sýn um framtíðaruppbyggingu sveitarfélagsins, til lengri og skemmri tíma. Það er sýn okkar og meirihlutans að við uppbyggingu hverfa skuli horft til þess að byggt sé íbúðarhúsnæði sem svarar þörfum sem flestra samfélagshópa. Við deilum þeirri skoðun að til að byggja farsælt samfélag þurfi að gera ráð fyrir að pláss sé fyrir okkur öll.
Eins og margir vita þá er stærstur hluti byggingarlands sem skilgreint er í aðalskipulagi í eigu einkaaðila en ekki Mosfellsbæjar. Sú staðreynd getur flækt uppbyggingaráform bæjarstjórnar á hverjum tíma. Gera þarf uppbyggingarsamninga við handhafa þess lands sem um ræðir t.d. um uppbyggingu innviða eins og skóla og leikskóla en einnig um samsetningu íbúðarkosta, þ.e. hvort ráð sé gert fyrir fjölbreyttum búsetukostum.
Athyglisvert er að í samningum um uppbyggingu Blikastaða, sem gerðir voru undir lok síðasta kjörtímabils, eru fjölbreyttir búsetukostir fyrir mismunandi þjóðfélagshópa ekki meðal ákvæða.

Carlsberg ákvæðið
Í Danmörku var árið 2015 sett nýtt ákvæði inn í skipulagslög sem stuðla átti að blandaðri byggð í landinu. Ákvæðið gengur út á að heimila sveitarfélögum að setja inn kvaðir um fjölbreytta íbúðarkosti á uppbyggingarsvæðum. Umrætt ákvæði gengur undir heitinu Carlsberg ákvæðið og hefur reynst vel.
Hérlendis hefur verið til umfjöllunar sams konar breyting í tengslum við rammasamning innviðaráðuneytis fyrir hönd ríkisins, Sambands íslenskra sveitarfélaga og Húsnæðis- og mannvirkjastofnunar um húsnæðisuppbyggingu frá sumrinu 2022. Lagaákvæðið myndi heimila sveitarfélögum að gera kröfu um að allt að 25% byggingarmagns innan deiliskipulagssvæðis skuli vera fyrir hagkvæmar íbúðir, leiguíbúðir eða aðrar íbúðir sem njóta fjárhagslegs stuðnings ríkis og/eða sveitarfélaga.
Innleiðing slíks ákvæðis myndi til lengri tíma litið auka fjölbreytni á fasteignamarkaði og tryggja fleirum húsaskjól og húsnæðisöryggi. Því miður er ekki að sjá að umrætt lagaákvæði verði afgreitt á yfirstandandi þingi en þá má vona að það verði tekið upp á Alþingi í haust.
Hvort sem ofangreind lagabreyting gengur í gegn á Alþingi eða ekki bíður það meirihlutans sem nú situr í Mosfellsbæ að ganga frá aðgerðaáætlun um uppbyggingu búsetuúrræða fyrir fatlað fólk og að sjá til þess að við skipulag byggðar verði alltaf gert ráð fyrir því að þar geti búið fólk úr flestum tekjuhópum og með mismunandi þjónustuþarfir á öllum æviskeiðum.

Anna Sigríður Guðnadóttir, bæjarfulltrúi Samfylkingar
Ólafur Ingi Óskarsson, formaður velferðarnefndar

Stjórnsýsluúttekt og samvinna

Dagný Kristinsdóttir

Nú er rétt ár liðið af kjörtímabili bæjarstjórnar og eru mál farin að þokast áfram og ný að koma fram.
Eitt þeirra er úttekt á stjórnsýslu bæjarins en fleiri en einn flokkur hafði það á sinni stefnuskrá að slík úttekt færi fram. Það eru eðlileg og fagleg vinnubrögð að stokka spilin af og til, skoða hvernig hlutirnir eru gerðir og hvort ekki sé hægt að gera þá enn betur. Um það voru allir flokkar sammála enda var tillagan um stjórnsýsluúttekt samþykkt með 11 atkvæðum.
Mér fannst margt gagnlegt koma fram í úttekt Strategíu og mér fundust margar tillögur bæjarstjóra til stjórnkerfisbreytinga skynsamar. Ég segi bæjarstjóra, því hún lagði fram tillögurnar í nafni og krafti síns embættis en ekki meirihlutans, þó gera megi ráð fyrir að oddvitar hans hafi verið hafðir með í ráðum.

Þó að ég sé jákvæð fyrir mörgu sem fram kom þá hef ég staldrað við nokkur atriði.
Það fyrsta er samtalið. Niðurstöðum úttektarinnar var skilað inn í byrjun apríl. Minnihlutinn fékk niðurstöðurnar afhentar 3. maí kl. 17.02 en kynningarfundur með úttektarfyrirtækinu hafði verið boðaður 4. maí kl. 09.00. Síðari vinnufundur var boðaður 8. maí en engin gögn voru send fyrir þann fund, en á honum voru lagðar fram tillögur bæjarstjóra að skipulagsbreytingum. Málið var svo ekki rætt frekar fyrr en á fundi bæjarráðs 17. maí þar sem þær voru bornar upp til samþykktar og svo endanlega samþykktar á fundi bæjarstjórnar 24. maí síðastliðinn.
Þegar maður fær skjöl með stuttum fyrirvara er maður ekki fær um að spyrja spurninga vegna þess að það hefur ekki gefist tími til að lesa vel yfir gögn fyrir fund.

Ein spurningin sem ég hef er t.d. hvert er hlutverk og starfslýsing væntanlegs sviðsstjóra menningar, íþrótta og lýðheilsu, því við erum ekki með yfirgripsmikinn rekstur íþrótta- eða menningarmannvirkja og vísa í önnur sveitarfélög sem við berum okkur gjarnan saman við.
Ég myndi líka vilja spyrjast fyrir um tillögurnar 74 sem Strategía leggur fram. Á að fara eftir þeim í einu og öllu án frekari skoðunar, ígrundunar eða samtals. Hvaða tillögur eru góðar og henta okkur, hvaða tillögur henta ekki okkar kerfi o.s.frv.
Ég hefði líka viljað fá skýringar á heildarmynd og framtíðarsýninni. Hvert vill bæjarstjórinn og ekki síst meirihlutinn fara með breytingunum. Hvað viljum við fá út úr þeim og hverju eiga þær að skila okkur?
Engin heildaryfirsýn virðist vera til staðar um umfang þessara breytinga og hve mikið þær koma til með að kosta en þegar ákveðið er að fara í úttekt sem þessa liggur ljóst fyrir að það hafi einhvern kostnað í för með sér. Kostnaðurinn hleypur á einhverjum tugum milljóna króna en engin fjárhæð var áætluð í verkið á fjárhagsáætlun þessa árs.

Og að síðustu er það samráðið og samvinnan í þessu verkefni en við vorum öll sammála um að fara í það. Því hefði það verið faglega sterkt í samvinnu og ekki síst stjórnsýslulega að við stæðum öll að niðurstöðunni og tillögunum.
Í ljósi ummæla meirihlutans um breytt vinnubrögð hefði þetta verkefni verið tilvalið til að sýna öllum fram á það að nú séu nýir og breyttir tímar. Og það hefði verið hægt að gera með samtali, vinnufundum og sameiginlegri niðurstöðu allra kjörinna fulltrúa, því við vorum flest ef ekki öll sammála mörgu í úttektinni og hefðum getað talað okkur niður á lausn með stjórnkerfisbreytingar.
Þá hefði ég sem kjörinn fulltrúi ekki setið hjá við afgeiðslu málsins, heldur með gleði greitt breytingunum mitt atkvæði. Þá hefði bæjarstjórinn óskorað umboð allra bæjarfulltrúa til þessa verkefnis og meirihlutinn gæti sett fjöður í hatt sinn fyrir vel unnið verk.

Dagný Kristinsdóttir
Bæjarfulltrúi og oddviti Vina Mosfellsbæjar

Rekstrarniðurstaða ársins 2022

Ásgeir Sveinsson

Í ársreikningi Mosfellsbæjar fyrir árið 2022 má vissulega sjá að rekstrarumhverfið undanfarið hefur ekki verið hagstætt.
Mosfellsbær býr þó vel að ábyrgri fjármálastjórn undanfarinna ára þar sem meðal annars voru teknar góðar ákvarðanir í hagstæðum lántökum sem greiddu upp önnur óhagstæðari lán og skuldbindingar sveitarfélagsins.
Fyrir heimsfaraldurinn lækkaði skuldahlutfall bæjarins því hratt þrátt fyrir stöðuga uppbyggingu í bænum og framkvæmdir upp á 2-3 milljarða á ári í formi nýframkvæmda og viðhaldsverkefna.
Í kjölfar þess tekjufalls sem fylgdi heimsfaraldrinum var tekin meðvituð og samhljóða ákvörðun af fyrrverandi bæjarstjórn, að halda áfram vinnu samkvæmt gildandi framkvæmdaáætlun við uppbyggingu innviða og endurnýjun og viðhald á fasteignum í eigu bæjarins. Þessi sama bæjarstjórn ákvað einnig að auka þjónustu við íbúa eins og áætlanir gerðu ráð fyrir en á undanförnum árum hefur meðal annars verið lögð áhersla á lækkun skatta og annarra gjalda á Mosfellinga.
Þetta voru góðar ákvarðanir í ljósi sögunnar og líklega grundvöllur þess að niðurstöður ánægjukannana sveitarfélaga hafa sýnt að ánægðustu íbúarnir búa einmitt hér í okkar góða bæ.

Jana Katrín Knútsdóttir

Tekjur Mosfellsbæjar ársins 2022 voru hærri en áætlanir gerðu ráð fyrir. Kostnaður við framkvæmdir var í takt við áætlanir, þrátt fyrir að dýrar framkvæmdir við Kvíslarskóla hafi komið óvænt til á árinu.
Öðrum framkvæmdum var frestað af meirihlutanum, meðal annars framkvæmdum í uppbyggingu að Varmá og á nýjum leikskóla í Helgafellshverfi. Þessar frestanir gera það að verkum að kostnaður við framkvæmdir var innan áætlana á árinu 2022. Kostnaður við nýframkvæmdir hefur síðan hækkað verulega og allar líkur á enn meiri kostnaði fyrir sveitarfélagið þegar þær loks hefjast.

Há verðbólga og mikil hækkun vaxta útskýrir það að útkoma síðasta árs er lakari hjá Mosfellsbæ en áætlanir gerðu ráð fyrir vegna aukins fjármagnskostnaðar.
Þetta er vonandi tímabundið ástand sem Mosfellsbær ætti að þola ef rétt verður haldið á málum hvað varðar fjármálastjórn næstu misserin og árin.

Hærri tekjur og skattahækkanir

Rúnar Bragi Guðlaugsson

Tekjur bæjarins munu áfram vera hærri en gert er ráð fyrir í áætlunum, bæði vegna hækkunar á útsvari og á fasteignasköttum – á íbúða- og atvinnuhúsnæði, en líklega ekki síður vegna vanáætlaðra tekna af lóðaúthlutunum.
Tekjuhliðin og reksturinn ættu því að halda áfram að vera góð en í því óvissuástandi sem nú ríkir reynir mjög á rekstrarhæfni meirihlutans í að beita aðhaldi í rekstri og mögulega breyta framkvæmdaáætlunum ef verðbólga og háir vextir dragast á langinn eins og teikn eru á lofti um. Þá er mikilvægt að meirihlutinn sé skilvirkur í verkum sínum, hafi þor til að taka erfiðar ákvarðanir og nái saman um forgangsröðun í mögulegum niðurskurði á framkvæmdum, þjónustu og starfsmannahaldi.

Íbúum í Mosfellsbæ mun halda áfram að fjölga en traustur rekstur undanfarinna ára og sterk fjárhagsstaða, þrátt fyrir tímabundin ytri áföll, eiga að gera bæjarfélaginu kleift að veita íbúum Mosfellsbæjar áfram framúrskarandi þjónustu sem stöðugt hefur verið að aukast undanfarin ár og mun vonandi gera áfram.
Bæjarfulltrúar D-lista í Mosfellsbæ munu sem fyrr styðja góðar tillögur meirihlutans og hvetja þau

Helga Jóhannesdóttir

áfram til góðra verka, en mun vissulega halda áfram að koma sínum tillögum og stefnumálum á framfæri svo áfram verði best að búa í Mosó.

Ásgeir Sveinsson
Jana Katrín Knútsdóttir
Rúnar Bragi Guðlaugsson
Helga Jóhannesdóttir

Verum stórhuga í menningarmálum

Kristján Erling Jónsson

Sögukvöldið í Hlégarði þann 30. mars síðastliðinn fór fram úr okkar björtustu vonum, sjálfur var ég þó sannfærður um að við gætum fyllt Hlégarð af Mosfellingum ef við hefðum eitthvað áhugavert fram að færa.
Saga Mosfellsveitar er stórmerkileg og við bæjarbúar ættum öll að vera henni kunnug. Mikið af heimildum eru til staðar bæði í Héraðsskjalasafninu sem og á heimilum fólks í bænum.
Því langar mig að benda bæjarbúum sem eiga myndir eða muni frá gamalli tíð að hafa samband við Birnu Mjöll á Héraðsskjalasafninu og hún kemur því í örugga geymslu.
Umtalsefnið þetta kvöld var heita vatnið og ylræktin og annað sem því tengist, þetta er aðeins smá brot af sögunni okkar. Hægt væri að halda mörg svona kvöld næstu árin til að rekja hana og er ekki ólíklegt að það verði gert.
Í Hlégarði þetta kvöld var húsfyllir en ríflega 200 manns mættu til að hlýða á erindin. Það telst vera vel sótt en samt sem áður er þetta aðeins um 1,5% bæjarbúa.
Þegar Hlégarður var vígður 17. mars árið 1951 voru sveitungar um 500 manns og ber bygging hússins því gott merki hvað menn voru stórhuga í þá daga. Talið er að á opnunarhátíðina hafi 400-500 manns mætt. Væri ekki draumurinn að geta verið með viðburði í bænum sem myndi hýsa stærri hluta bæjarbúa, kannski 10% eða um 1.400 manns?
Svæðið í kringum Hlégarð býður upp á allskonar möguleika til stækkunar og hafa þegar komið fram hugmyndir frá Vinum Mosfellsbæjar þess efnis.
Ég, sem áheyrnarfulltrúi Vina Mosfellsbæjar í menningar- og lýðræðisnefnd, vil áfram leggja mitt af mörkum til framgangs menningarmála í bænum okkar og vil að við hugsum stórt þegar kemur að því að skipuleggja framtíðina.

Kristján Erling Jónsson
Vinur Mosfellsbæjar

Mannleg samskipti fram yfir símana

Halla Heimis

Þetta er setning sem ég nota í kennslu hjá mér, oftast virða þau það og við tölum um hversu mikilvægt það er að geta hlustað á hvert annað og hvílt símana á meðan.
Það þarf ekki að segja það hér að „síminn getur eitrað sálina“ við vitum það öll. Við vitum að þetta tæki hefur áhrif á kvíða, einmanaleika og hefur neikvæð áhrif á sjálfsmynd fólks, ekki bara barna og unglinga heldur einnig fullorðins fólk.

Nemendur okkar í FMOS eru hluti þeirrar kynslóðar sem hefur alist upp við símanotkun og það að taka upp síma og hringja til að panta tíma í klippingu eða pizzu, hvað þá að mæta á staðinn til að sækja um vinnu er mjög mikið vandamál hjá mörgum og það er áhyggjuefni.
Við viljum að nemendur okkar tali saman í frímínútum og höfum við því aukið afþreyingu fyrir þá. Hvað höfum við gert? Við keyptum körfuboltaspjald, körfubolta og fótbolta í skotið okkar, við límdum „gamaldags“ borðspil á nokkur borð í anddyrinu, taflborð, badmintonspaða og borðtennisborð.
Er þetta að bera árangur? Já, heldur betur! Það er mjög góð tilfinning þegar gengið er um skólann að sjá borðin þéttsetin af nemendum sem eru búnir að búa til alls kyns nýjar reglur í lúdó og slönguspili, hugsandi nemendur við taflborðin, mikla keppni í borðtennis, keppni í að halda flugunni á lofti í badminton og aðrir að fá sér súrefni og spila körfubolta. Þetta gerir það að verkum að skólabragurinn verður annar og maður heyrir hlátur og samtöl í staðinn fyrir þögnina.
Við fullorðna fólkið þurfum að vera fyrirmyndir og auka afþreyingu sem hvetur til samskipta og á meðan er síminn í hvíld.

Halla Heimis.
íþrótta- og lýðheilsufræðingur hjá FMOS

FMOS: Alltaf á tánum

Björk Margrétardóttir

Í FMOS leggjum við metnað í að þróa kennsluhætti og námsefni reglulega. Námið í FMOS er verkefnamiðað leiðsagnarnám, sem þýðir að nemendur fá leiðsögn eftir hvert verkefni og hluti af námi nemenda felst í því að tileinka sér leiðsögnina, sem leiðir þá áfram skref fyrir skref í átt að framförum (e. feed forward).
Til að leiðsagnarnám sé árangursríkt er nauðsynlegt að virðing og traust ríki á milli nemenda og kennara. Við í FMOS lítum á góð samskipti við nemendur sem órjúfanlegan hluta af leiðsagnarnáminu og leggjum mikla áherslu á umræður og samtal á milli kennara og nemenda.

Starfendarannsókn
Á haustönn 2022 unnu enskukennararnir Björk og Helena María, ásamt Þorbjörgu Lilju íslenskukennara, að starfendarannsókn sem bar heitið Leiðsagnarnám og markviss úrvinnsla nemenda. Tilgangur

Helena María
Smáradóttir

rannsóknarinnar var að skoða hvernig nemendur í þriðja þreps áföngum nýttu leiðsögn frá kennara til að taka framförum í ensku og íslensku. Í rannsókninni var lögð áhersla á aukið samtal á milli kennara og nemenda, munnlega og skriflega úrvinnslu leiðsagnar og nemendur látnir halda ferilmöppu.

Framkvæmdin
Kennari og nemendur hittust þrisvar sinnum yfir önnina í einstaklingsviðtölum þar sem rætt var heildstætt um námsframvindu hvers og eins nemanda, styrkleika hans og hvar væri sóknarfæri. Lagt var upp með heiðarleg og hvetjandi samskipti. Jafnframt voru nemendur beðnir um að leggja mat á hversu vel leiðsögn nýttist þeim og hvers konar leiðsögn skilaði sér best til þeirra.
Lögð var áhersla á að setja leiðsögnina fram á sem fjölbreyttastan máta, þ.e. skriflega, munnlega, í upptökum, í myndböndum, með aðstoð gervigreindarforrita og síðast en ekki síst í samtölum. Lögð var fyrir könnun í lok áfanganna þar sem nemendur áttu að meta gagnsemi hverrar leiðsagnarleiðar fyrir sig.

Þorbjörg Lilja Þórsdóttir

Niðurstaðan
Niðurstaðan var áhugaverð en í ljós kom að nemendur vildu fá hnitmiðaðar skriflegar umsagnir þegar gæði verkefna þeirra voru mikil og leiðsögnin því eðli málsins samkvæmt stutt. Þegar um heimildaverkefni var að ræða þótti nemendum gagnlegt að fá send stutt myndbönd þar sem kennarinn notaði forritið Turnitin til að leiða nemendur áfram varðandi næstu skref í heimildavinnunni.
Öllum þóttu einstaklingsviðtölin afar gagnleg – bæði nemendum og ekki síður kennurunum, sem fannst viðtölin gefa aukið tækifæri til að sníða nálgun verkefna í samráði við nemandann. Þar að auki fengum við kennararnir aukna innsýn inn í það hvers konar verkefni höfðuðu til nemenda og hvers vegna. Gagnsemi þessarar rannsóknar var gríðarmikil og höfum við nú þegar tekið mið af niðurstöðum úr könnunum til að bæta leiðsagnaraðferðir okkar. Þess má til gamans geta að litaglaðir kennararnir hafa jafnframt tileinkað sér litakóðaðar skriflegar leiðsagnir, nemendum til einföldunar.

Næstu skref …
Við erum hvergi nærri fullnuma í leiðsagnarnámsfræðunum en einsetjum okkur að fylgjast með nýjungum í fræðunum, sem og alhliða tækninýjungum sem geta nýst í námi.
Næsta áskorun okkar er að finna leið til að nýta okkur gervigreindarforrit til gagns og framfara. Sú vinna er þegar byrjuð hjá okkur í FMOS og við hlökkum til að takast á við það verkefni af virðingu og einlægum áhuga.

Björk Margrétardóttir, Helena María Smáradóttir og Þorbjörg Lilja Þórsdóttir.
Höfundar eru framhaldsskólakennarar við Framhaldsskólann í Mosfellsbæ.

Korpa – gömul afbökun?

Guðjón Jensson

Í Morgunblaðinu þann 29.3.2023 er sagt frá undirbúningi að nýju hverfi syðst í landi Blikastaða. Þetta nýja hverfi er nefnt Korputún.
Mér þykir þetta heiti alveg ótækt enda mun ábyggilega vera til heppilegra örnefni í landi Blikastaða en að sækja það til Reykjavíkur.
Orðið Korpúlfsstaðaá og stytting í Korpu mun ábyggilega ekki vera gamalt í málinu, líklegast tengt umsvifum Thor Jensen á Korpúlfsstöðum. Úlfarsá hét áin fyrrum alveg frá upptökum í Hafravatni og til ósa þar sem hún rennur í Leiruvog. Áin á ekki að vera kennd við Korpúlfsstaði fremur en Blikastaði enda rennur hún síðasta spölinn á mörkum þessara gömlu bújarða.

Mér þótti ástæða til að skoða betur þetta mál. Fyrst kannaði ég örnefnaskrá Blikastaða sem Magnús Guðmundsson sagnfræðingur og skjalavörður tók saman fyrir rúmum 30 árum: nafnid.arnastofnun.is/ornefnaskra/24867
Á síðu 7 í þessari örnefnaskrá segir að Emil Rokstad hafi fyrstur manna nefnt neðri hluta Úlfarsár Korpu og er Guðmundur Þorláksson (1894-1994) bóndi í Seljabrekku borinn fyrir þessum upplýsingum. Í gamallri grein í Tímanum 31.10.1969 segir Guðmundur: „nafnbreyting sem oft heyrist nú, er Korpa í stað Úlfarsá. Fyrir 40-50 árum var þetta nafn ekki til. Áin hét Úlfarsá eins og hún mun hafa heitið til forna. En í daglegu tali var hún oft kennd við suma bæina, sem áttu land að henni og þó einkum Korpúlfsstaði og Lambhaga. Kunnust mun hún hafa verið sem Korpúlfsstaðaá enda lá þjóðvegurinn yfir hana fram hjá Korpúlfsstöðum og fyrir landi þeirrar jarðar og Blikastaða, var laxveiðin mest og beztu stangveiðistaðirnir. Einnig má á það benda að land Korpúlfsstaða er lengst meðfram ánni, þeirra jarða sem að henni liggja. Þetta Korpunafn mun þannig til komið, að norskur maður, Emil Rokstad, hafði laxveiðina í ánni á leigu yfir langan tíma og af hans vörum heyrði ég Korpu nafnið fyrst, líklega þótt það þægilegra í framburði. Líka má vera að þetta hafi verið eins konar gælunafn hjá honum, því að hann tók miklu ástfóstri við ána og undi þar löngum.“
Heimild: timarit.is/files/64638401
Texti undirritaður GÞ sem er Guðmundur Þorláksson en var fæddur á Korpúlfsstöðum.
Ætli þurfi nánar að grennslast fyrir um þetta Korpu örnefni? Það er væntanlega ekki mikið eldra en aldargamalt. Guðmundur var mikill fróðleiksmaður og ritaði Jón M. Guðmundsson á Reykjum minningagrein um Guðmund látinn sem vert er að vísa til: timarit.is/files/58426187

Eigum við að láta styttingu á heiti Korpúlfsstaðaár/Úlfarsár ráða nafngift á heilu hverfi? Væri ekki nær að kenna það við eitthvað annað örnefni sem er nær eins og Hamrahlíð?

Hvað segja Mosfellingar?
Er bæjarstjórn Mosfellsbæjar með grein þessari hvött til að skoða betur þetta mál.

Staddur á Heilsuhælinu í Hveragerði
Guðjón Jensson tómstundablaðamaður
og eldri borgari – arnartangi43@gmail.com

Menning í mars komin til að vera

Hrafnhildur Gísladóttir

Við sem höfum nú starfað saman í menningar og lýðræðisnefnd í tæpt ár erum einstaklega þakklát fyrir þann heiður sem það er að vinna með þennan mikilvæga málaflokk sem snertir alla íbúa bæjarins.
Gott menningarlíf eflir bæjarbraginn og það er okkur í nefndinni mikilvægt að bæjarbúar hafi tækifæri til að koma saman og njóta lista og menningar í sínum heimabæ.

Síðastliðinn mánuð hefur nýtt verkefni menningar- og lýðræðisnefndar verið í gangi sem gekk undir nafninu Menning í mars. Við nefndarfólk tókum okkur saman og fengum aðila til að vera með stóra og smáa viðburði af ýmsum toga. Einnig gátu þeir sem það vildu skráð sig og sína viðburði sem settir voru inn á viðburðadagatal Mosfellsbæjar.
Haldnir voru tónleikar, opið hús hjá listafólki, söngur og sund, tónleikar Listaskóla Mosfellsbæjar og sögukvöld í Hlégarði svo eitthvað sé nefnt. Viljum við þakka öllum þeim sem komu að því að halda viðburði og taka þátt í að gera menningarlíf bæjarins sýnilegt.
Við hlökkum mikið til að halda áfram að þróa þennan viðburð með bæjarbúum og efla menningarlíf í Mosfellsbæ.

Sérstaklega viljum við þakka öllum þeim sem komu í Hlégarð á sögukvöldið sem var lokaliður í dagskrá Menningar í mars. Að sjá allan þann fjölda fólks sem kom saman vegna áhuga á sögu sveitarinnar okkar og hlusta á sögur frá sveitungum, fékk mosfellska hjartað til að slá hraðar.
Við erum svo lánsöm að fá að búa í sveit í borg og held ég að allir sem mættu á þennan einstaka viðburð í félagsheimilinu okkar Hlégarði geti tekið undir að þetta var stórkostlegt kvöld og vonandi ekki það síðasta. Það að geta tekið þátt í menningarviðburðum í sínum heimabæ er einn af hornsteinum góðs mannlífs og við í nefndinni höfum metnað til að koma því góða starfi sem á sér stað í Mosfellsbæ á framfæri. Menning í mars er því komin til að vera.

Fyrir hönd menningar- og lýðræðisnefndar
Hrafnhildur Gísladóttir formaður

Áframhaldandi uppbygging í Helgafelli

Valdimar Birgisson

Á fundi bæjarráðs þann 16. mars sl. samþykkt bæjarráð úthlutunarskilmála fyrir fyrri hluta útboðs lóða í 5. áfanga Helgafellshverfisins.
Áfanginn samanstendur af fjölbreyttu formi íbúða, alls 151 íbúð við götu sem hefur fengið nafnið Úugata. Byrjað er á því að bjóða út lóðir fyrir raðhús og fjölbýlishús sem verður úthlutað til hæstbjóðenda. Gert er ráð fyrir því að uppbygging á þessum lóðum geti hafist strax í sumar.
Gangi vinna við gatnagerð í síðari hluta áfangans áfram sem horfir verður hægt að úthluta lóðum fyrir par- og einbýlishús í september á þessu ári.
Sérstaklega ánægjulegt er að í þessum áfanga í uppbyggingu Helgafellslands er hugað að fjölbreyttu búsetuformi og gert ráð fyrir bæði íbúðakjarna fyrir fatlaða auk þess sem úthlutað er í fyrsta sinn í Mosfellsbæ lóð til Bjargs íbúðafélags.

Íbúðakjarni fyrir fatlaða
Flestir íbúðakjarnar í bænum hafa ekki verið byggðir sérstaklega sem íbúðir fyrir fólk með langvarandi stuðningsþarfir heldur hefur hentugt húsnæði verið keypt þar sem hægt hefur verið að þjónusta þennan hóp.
Það er því einstaklega ánægjulegt að í fyrsta sinn síðan sveitarfélög tóku yfir málaflokk fatlaðs fólks er nú úthlutað sérstaklega lóð til uppbyggingar á íbúðakjarna fyrir fatlaða í Mosfellsbæ. Mikilvægt er að bæjarfélag eins og Mosfellsbær sinni af metnaði þeirri samfélagslegu skyldu sinni að tryggja fötluðum viðeigandi húsnæði.
Í samræmi við málefnasamning meirihlutans þá hefur velferðarnefnd falið velferðarsviði að greina búsetuþörf fatlaðs fólks með langvarandi stuðningsþarfir til framtíðar svo unnt verði að gera ráð fyrir sambærilegum búsetukjörnum á framtíðaruppbyggingarsvæðum í bænum.

Bjarg íbúðafélag
Bjarg íbúðafélag er sjálfeignarstofnun sem hefur það markmið að bjóða tekjulágum fjölskyldum örugga langatímaleigu á hagstæðum kjörum. Nú hefur lóð fyrir 24 íbúða fjölbýlishús verið úthlutað til félagsins og því styttist í að Mosfellingum standi þetta búsetuúrræði til boða í okkar heimabæ.

Einstakar lóðir fyrir sérbýli
Ekki er hægt fjalla um þennan áfanga í uppbyggingu Helgafells án þess að minnast á hinar einstöku sérbýlislóðir sem verður úthlutað í haust. Hér sameinast þeir tveir kostir í sérbýlishúsalóðum sem eru hvað eftirsóttastir, þ.e. fallegar lóðir mót suðri með einstöku útsýni.
Það er ánægjulegt að uppbygging í Helgafellslandinu haldi áfram og vonir standa til þess að hægt verði að halda áfram með þá áfanga sem enn eru eftir á næstu misserum. Þegar hverfið verður fullbyggt er gert ráð fyrir að þar verði 3.000 íbúðir.

Valdimar Birgisson,
formaður skipulagsnefndar

Niðurstaða ársreiknings 2022

Lovísa Jónsdóttir

Það var ljóst þegar nýr meirihluti Framsóknar, Samfylkingar og Viðreisnar tók við í Mosfellsbæ að fjárhagsstaða bæjarins væri ekki sú besta. Miklar lántökur síðustu ára taka í og hafa eðlilega mikil áhrif á möguleika okkar til frekari uppbyggingar.
Sjálfur rekstur bæjarins hefur verið ágætur, það er að segja veltufé frá rekstri hefur verið jákvætt sem segir okkur að rekstur í þeirri mynd sem hann hefur verið stendur undir sér. Áskorunin í núverandi umhverfi er hins vegar skuldastaða bæjarins. Lán bæjarfélagsins eru verðtryggð og ljóst að þegar verðbólga er í hæstu hæðum þá hefur það mikil áhrif.
Lífið heldur samt áfram þrátt fyrir verðbólgu og verkefnin sem verður að takast á við halda áfram að skjóta upp kollinum.

Stóru verkefnin geta ekki beðið
Stuttu eftir að nýr meirihluti tók við lá 6 mánaða uppgjör fyrir, hallinn af rekstri fyrstu 6 mánaða ársins var 940 milljónir króna. Sú niðurstaða var 500 m.kr. lakari en áætlanir gerðu ráð fyrir og þar vó þyngst aukinn fjármagnskostnaður um 396 m.kr.

Halla Karen Kristjánsdóttir

Eins og fyrr segir þá hefur svona staða óneitanlega mikil áhrif á möguleikana til frekari uppbyggingar en sum verkefni eins og mygluskemmdir spyrja ekki að því hvernig rekstrarumhverfið er en það hefur til dæmis reynst vera risastórt verkefni á síðustu mánuðum að hreinsa og endurbyggja í Kvíslarskóla.
Neðri hæðin í skólanum var hreinlega gerð fokheld og þegar framkvæmdum verður lokið þá verður búið að endurbyggja alfarið fyrstu hæð skólans. Þetta er fjárfesting sem á árinu 2022 var 441 milljón króna dýrari en áætlað hafði verið í viðhald skólans.

Verðbólgudraugurinn
Eins og við vitum öll þá hefur verðbólgan ekki hjaðnað á síðari hluta ársins, þvert á móti jókst hún síðustu mánuði ársins.
Það kom því ekki á óvart að rekstrarniðurstaða ársins 2022 yrði mun lakari en áætlanir ársins gerðu ráð fyrir. Hins vegar er það ábyrgri fjármálastjórn að þakka að hallinn varð ekki meiri en raun ber vitni.
Í lok árs var niðurstaðan neikvæð um 898 milljónir en þar af eru 797 milljónir áfallnar verðbætur vegna hærri verðbólgu en spár gerðu ráð fyrir.

Anna Sigríður Guðnadóttir

Framtíðin
Í fjárhagsáætlun fyrir árið 2023 er gert ráð fyrir jákvæðri niðurstöðu fyrir árið en það er alveg ljóst að Mosfellsbær, eins og önnur sveitarfélög, á allt undir því að tök náist á verðbólgunni svo unnt verði að ná tilætlaðri niðurstöðu.

Lovísa Jónsdóttir, oddviti Viðreisnar
Halla Karen Kristjánsdóttir, oddviti Framsóknar
Anna Sigríður Guðnadóttir, oddviti Samfylkingar

Stöndum saman

Örvar Jóhannsson

Mosfellsbær er eitt af 11 sveitarfélögum sem nú þegar hafa skrifað undir þjónustusamning um samræmda móttöku flóttafólks við félags- og vinnumarkaðsráðuneytið og fleiri sveitarfélög eru á leiðinni.
Það er okkar samfélagslega ábyrgð að hjálpa til og taka á móti fólki á flótta. Þetta er allt fólk sem á sína sögu, vonir og þrár eins og allir aðrir um að geta lifað góðu og hamingjusömu lífi. Það hefur sýnt sig að margt af flóttafólkinu sem við hér á Íslandi höfum tekið á móti kemst auðveldlega inn á vinnumarkaðinn. Þau þrá að vinna fyrir sér og vinna að því hörðum höndum að skila til baka góðri vinnu til þess að efla samfélagið okkar og efnahagslíf. Einnig skapa þau og búa til auðugra mannlíf hér á landi því í fjölmenningarsamfélagi skapast mörg ný tækifæri.

Samræmd móttaka flóttafólks nær til fólks sem fengið hefur alþjóðlega vernd eða dvalarleyfi á grundvelli mannúðarsjónarmiða hér á landi. Markmiðið er að tryggja flóttafólki samfellda og jafna þjónustu óháð því hvaðan það kemur og í hvaða sveitarfélagi það sest að.

Ólafur Ingi Óskarsson

Lögð er áhersla á nauðsynlega aðstoð til að vinna úr áföllum og að fólk fái tækifæri til virkrar þátttöku í samfélaginu, svo sem með atvinnu, samfélagsfræðslu og námi, þ.m.t. íslenskunámi.
Bæjarstjórn Mosfellsbæjar samþykkti á dögunum að taka á móti allt að 80 manns og er það þó ekki þannig að þessi hópur komi allur á sama tíma, síður en svo. Það er að sjálfsögðu að mörgu að hyggja og eru húsnæðis- og skólamálin helsta áskorunin. Við munum kappkosta við að huga vel að fólkinu sem kemur til okkar sem og öðrum Mosfellingum. Þetta verkefni verður samvinnuverkefni allra í Mosfellsbæ.
Í samningunum milli ríkis og þeirra sveitarfélaga sem sýna samfélagslega ábyrgð og taka á móti flóttafólki er skýrt kveðið á um það að sveitarfélögin fái greiddan kostnað með fjölskyldunum fyrstu tvö árin. Þar að auki munu koma til sérstakar greiðslur með grunn- og leikskólabörnum auk þess sem Mosfellsbær mun fá framlög sem koma til með að standa undir kostnaði við stöðu verkefnastjóra fyrsta árið en minnka aðeins á árunum á eftir. Þessi verkefnastjóri mun halda vel utan um þennan hóp.
Eins og kunnugt er þá kemur mikill fjöldi flóttamanna til landsins í dag sem kemur jafnt til Mosfellsbæjar hvort sem sveitarfélagið gerir slíkan samning eða ekki. Með því að taka þátt í verkefninu er verið að tryggja það að sveitarfélagið fái fjárframlög frá ríkinu til að standa undir kostnaði.
Við sem samfélag ætlum að sýna styrk okkar í að standa saman og sýna að allir skipti máli.

Örvar Jóhannsson bæjarfulltrúi og Ólafur Ingi Óskarsson formaður velferðarnefndar.

Leikskólabygging í Helgafellshverfi

Ásgeir Sveinsson

Undanfarin ár hefur Mosfellsbær vaxið hratt sem felur í sér margs konar áskoranir, svo sem að innviðir fylgi með, þar á meðal fjölgun leikskólaplássa.
Vel hefur verið haldið á þessum málum undanfarin ár í Mosfellsbæ og hafa flest öll börn 12 mánaða og eldri í bænum fengið dagvistunarúrræði undanfarin ár.

Fulltrúar D-lista í bæjarstjórn lýsa yfir mikilli ánægju með að loksins hafi verið tekin ákvörðun af meirihlutanum um að bjóða út byggingu leikskóla í Helgafellshverfi, en það útboð var á döfinni síðastliðið sumar.
Nýr meirihluti frestaði útboðinu á síðasta ári, ekkert gerðist í marga mánuði en loks var settur á stofn starfshópur sem var til þess fallinn að skoða stöðu leikskólamála í Mosfellsbæ.
Sú vinna var algjörlega óþörf að okkar mati því upplýsingarnar og áætlanir lágu þegar fyrir á fræðslusviði bæjarins og það hefur verið vandlega og af fagmennsku unnið í þessum málum undanfarin ár eins og góð staða dagvistunarmála í Mosfellsbæ sýnir.

Biðlistar myndast og kostnaður stórhækkar
Bæjarfulltrúar D-lista hafa ítrekað á síðustu átta mánuðum þrýst á að bygging leikskóla hefjist sem fyrst því sú töf sem hefur orðið á framkvæmdum er bæði óheppileg og kostnaðarsöm. Opnun leikskólans mun frestast um allt að eitt ár með tilheyrandi vandræðum með dagvistun auk þess sem kostnaður við bygginguna verður hærri vegna þeirra tafa sem hafa orðið.

Í byrjun kjörtímabilsins lögðu bæjarfulltrúar D-lista til að farið verði í vinnu við að lækka byggingarkostnað og bjóða verkið strax út en það hefði sparað skattgreiðendum háar fjárhæðir í kostnaði við verkefnið. Hugmyndir okkar varðandi lækkun byggingarkostnaðar voru ekki skoðaðar en ljóst er að þær hefðu getað skilað mun meiri lækkun á byggingarkostnaði, bygging leikskólans hefði ekki tafist og kostnaður hefði ekki hækkað eins og nú hefur gerst.

Það er ánægjulegt að það hafi tekist að lækka núverandi áætlaðan byggingarkostnað um 15% en sú lækkun og sá sparnaður sekkur allur í hafið vegna hækkana sem hafa orðið m.a. á byggingarvístölu, verðbólgu, byggingarkostnaði, launa- og fjármagnskostnaði verkefnisins á síðustu mánuðum.
Auk þess var ákveðið, fyrir eingöngu fjórum vikum síðan, að bjóða út stoðveggi sem eru hluti af byggingunni í sérútboði sem er mjög óhagkvæmt, í stað þess að bjóða allt verkið út í einu lagi.

Slæm stjórnsýsla og hærri kostnaður
Fulltrúar meirihluta Framsóknar, Samfylkingar og Viðreisnar tóku ranga ákvörðun í þessu máli og er það miður fyrir skattgreiðendur í Mosfellsbæ og foreldra ungra barna sem því miður munu lenda á biðlistum eftir dagvistun vegna tafa sem hafa orðið á byggingu leikskólans.

Reikna má með að útgjöld sveitarfélagsins muni áfram hækka til muna vegna ákvarðanafælni nýs meirihluta því búið er að fresta til dæmis nauðsynlegum framkvæmdum að Varmá, m.a. bygging 1.200 m2 þjónustuhúss og lagning nýs gervigrasvallar. Þær framkvæmdir eru í algjörri óvissu og gæti kostnaður orðið tugum eða hundruðum milljóna króna hærri þegar loks að framkvæmdum kemur og er það afar slæmt fyrir skattgreiðendur í Mosfellsbæ.

Er þetta meirihlutinn og vinnubrögðin sem kjósendur Framsóknar völdu í kosningunum síðastliðið vor?

Ásgeir Sveinsson
Oddviti D-lista
Bæjarfultrúi Mosfellsbæ

Mikið um að vera í vetrarfríi grunnskólanna

Erla Edvardsdóttir

Það var nóg um að vera í vetrarfríi grunnskóla Mosfellsbæjar 16.-19. febrúar síðastliðinn.
Ungmennaráð bæjarins fékk málið til umfjöllunar og kom með afar skemmtilegar hugmyndir að afþreyingu. Starfsfólk íþrótta- og tómstundanefndar, í samvinnu við íþrótta- og tómstundafélög Mosfellsbæjar og félagsmiðstöðina Bólið, útbjó síðan frábæra dagskrá fyrir börn, ungmenni og fjölskyldur þeirra.

Mikið stuð var í sundlaugum og íþróttahúsum bæjarins. Boðið var upp á kennslu í skák og borðtennis, hægt var að fara í Zumba, Yoga, flot, slökun og ilmsána, auk þess sem hin sívinsæla Wipeout braut var sett upp. Bólið sá um sundlaugapartý, Afturelding bauð börnum að koma í fimleika- og körfuboltafjör, taekwondodeildin var með opnar æfingar og handknattleiksdeildin setti upp þrautabraut og æfingar. Hestamannafélagið Hörður bauð krökkum að koma og kynnast hestamennsku, fá að klappa hestunum og láta teyma undir sér. Golfklúbburinn bauð fjölskyldum að spreyta sig í golfi og Skátarnir og Björgunarsveitin Kyndill sáu um fjölskyldugöngu á Úlfarsfell.

Það hafa ekki allir tök á að fara með fjölskylduna í frí þegar skólarnir eru í vetrarfríi. Því er dagskrá sem þessi afar kærkomin og nýttu fjölmargir krakkar, foreldrar, afar, ömmur, frænkur og frændur þetta einstaka tækifæri til að eiga góðar samverustundir í bænum okkar.
Íþrótta- og tómstundanefnd þakkar öllum sem komu að hugmyndavinnu, skipulagningu og framkvæmd þessarar glæsilegu dagskrár kærlega fyrir.

Erla Edvardsdóttir,
formaður íþrótta- og tómstundanefndar.

9 mánuðir

Halla Karen Kristjánsdóttir

Mosfellsbær er sjöunda stærsta sveitarfélag landsins. Íbúar voru 13.470 þann 1. febrúar síðastliðinn og hefur íbúafjöldinn ríflega tvöfaldast á tuttugu árum.
Mosfellsbær er ört vaxandi sveitarfélag og öll teikn á lofti um að sú þróun haldi áfram. Tölurnar segja okkur að vöxturinn er gífurlegur og íbúar finna fyrir fjölguninni á ýmsa vegu. Með auknum íbúafjölda eykst þjónustuþörfin á öllum sviðum, það er augljóst hverjum manni. Innviðir sveitarfélags þurfa því að fylgja fólksfjöldanum og eflast í takti við hann.

Hlutverk sveitarfélagsins
Meginhlutverk sveitarfélaga er að sjá um grunnþjónustu við íbúana. Umfangsmestu verkefnin eru fræðslu- og uppeldismál, velferðarmál, æskulýðs- og íþróttamál og skipulagsmál. Verksviðið er víðfeðmt og áskoranirnar margar ef gera á verkefnunum góð skil. Íbúar verða að hafa greiðan aðgang að upplýsingum um þjónustuna, réttindi sín og skyldur.

Anna Sigríður Guðnadóttir

Mikilvægt er að á íbúa sé hlustað og greitt, eins hratt og auðið er, úr öllum erindum sem berast stjórnsýslunni. Samkvæmt málefnasamningi meirihlutans á að vinna að því að stjórnkerfið og skipulag þess endurspegli umfang þeirrar þjónustu sem því er ætlað að veita. Þannig verði sjónum beint að því efla og auka þann mannauð sem býr í starfsfólki bæjarins í samræmi við aukinn íbúafjölda. Til að veita þjónustu þegar og þar sem hennar er þörf var ákveðið að fjölga um fimm stöðugildi í stjórnsýslunni og gert ráð fyrir þeirri aukningu inni í fjárhagsáætlun ársins 2023.
Um er að ræða eitt stöðugildi á fræðslusviði, til að koma til móts við börn sem þurfa á stuðningi að halda, og annað á velferðarsviði til að svara uppsafnaðri þjónustuþörf hjá fjölskyldum fatlaðra barna. Stafrænn fulltrúi var ráðinn til að halda utan um stafræna þróun stjórnsýslunnar til að efla þjónustu við bæjarbúa og auka hagkvæmni í rekstri.
Þá var ljóst að fjölga þyrfti á lögfræðisviði enda mörg og umfangsmikil lögfræðileg úrlausnarefni á borði stjórnsýslunnar. Aukinn vöxtur kallar líka á styrkingu í skipulagsmálum og þar höfum við einnig aukið við stöðugildi. Síðastliðið sumar var einnig skilgreint hlutverk aðgengisfulltrúa.

Verkefnin
Viðfangsefni síðustu níu mánaða eru mörg og stór. Að baki upplýstum ákvörðunum liggja margar vinnustundir sem oft eru ekki sýnilegar bæjarbúum. Eitt af þeim er öll sú vinna sem farið hefur í að koma Kvíslarskóla í gott horf. Að loknum þeim framkvæmdum munum við í raun eiga nýjan og endurbættan skóla sem svarar kröfum nútímans um kennslu- og námsaðstæður. Nýlega samþykkti bæjarráð að bjóða út byggingu leikskólans í Helgafellslandi eftir mikla rýnivinnu sem hafði í för með sér lækkun áætlaðs byggingarkostnaðar. Skipulag íþróttasvæðisins að Varmá er í skoðun í góðu samtali við Aftureldingu. Fyrsta verkefnið hefst í vor þegar nýr púði, nýtt gervigras og vökvunarbúnaður verður settur upp í stað eldra gervigrass.
Önnur stór verkefni eru m.a. rekstur Hlégarðs, úthlutun lóða í 5. áfanga Helgafellslands, innleiðing farsældarhringsins og verkefnisins barnvænt samfélag sem bæði verða til hagsbóta fyrir öll börn og fjölskyldur þeirra, framtíðarskipulag Skálatúns, og áskoranir varðandi verkefni byggðasamlaganna Sorpu og Strætó. Þá má nefna uppbyggingu í Blikastaðalandi sem er viðamikið verkefni sem unnið verður í áföngum og mun taka sinn tíma.
Gott sveitarfélag að okkar mati er sveitarfélag sem hlustar á íbúana, bregst tímanlega við þjónustuþörfum þeirra og byggir upp innviði á hagkvæman og skilvirkan hátt til hagsbóta fyrir okkur öll í nútíð og framtíð. Gott sveitarfélag styður við góðan bæjarbrag sem einkennist af virðingu, samheldni og tillitssemi við náungann.

Halla Karen Kristjánsdóttir formaður bæjarráðs
Anna Sigríður Guðnadóttir forseti bæjarstjórnar