Heimabær menningarinnar

Una Hildardóttir

Mosfellsbær iðar af menningu. Einhvern veginn höfum við fundið fullkominn stað fyrir sköpunarkraftinn, þar sem þéttbýli og náttúran mætast á jaðri höfuðborgarsvæðisins.
Við höfum stolt fengið að fylgjast með tónlistarfólkinu okkar klifra upp metorðastigann bæði hér heima og erlendis. Ríkt menningarstarf í Mosfellsbæ og öflugur listaskóli hefur alið upp hæfileikaríkt listafólk á sviði tónlistar, ritlistar, myndlistar og svo mætti lengi áfram telja.
Eitt af meginmarkmiðum menningarstefnu Mosfellsbæjar er að stuðla markvisst að því að menningarlíf bæjarins sé fjölbreytt og aðgengilegt fyrir alla hópa samfélagsins, enda mikilvægt að allir eigi kost á að taka þátt í menningarstarfi á eigin forsendum.

Undirstaða öflugs lista- og menningarlífs er menntun á öllum skólastigum og jöfn tækifæri til náms. Í Mosfellsbæ er öflugur listaskóli en aðsókn er mikil og biðlistar langir. Skólagjöld eru há og einhverjir nemendur þurfa að leigja hljóðfæri með tilheyrandi kostnaði.
Listnám er ekki einungis farvegur til þess að beisla sköpunarkraftinn heldur eflir það líka alhliða þroska nemenda. Mér finnst mikilvægt að auka aðgengi nemenda að fjölbreyttu listnámi og skapa rými fyrir listsköpun.

Í dag gefst nemendum í grunnskólum Mosfellsbæjar tækifæri á að stunda tónlistarnám innan veggja skólans að einhverju leyti. Aftur á móti er mikilvægt að grunnskólar komi með auknum hætti að listnámi og geri það aðgengilegra fyrir alla nemendur, óháð samfélagsstöðu.
Sveigjanleiki sem tryggir aðgengi nemenda að grunnstigs tónlistar- eða öðru listnámi á skólatíma gerir okkur fært að samtvinna listir og menningu inn í daglegt líf barna og unglinga. Þannig tryggjum við sömuleiðis að nemendur mæti vel upp lagðir í tíma en ekki þreyttir að loknum hefðbundnum skóladegi eða seint að kvöldi.

Mosfellsbær er bær menningar og lista. Við höfum nú þegar séð að við höfum alla burði til þess að ala upp listafólk á heimsmælikvarða og getum auðveldlega gert enn betur. Við í Vinstri grænum viljum sjá skapandi greinar sem hluta af íslenskri atvinnustefnu og efla listnám.
Í dag er tónlistarnám forréttindi og því vil ég breyta, engum á að neita um þau tækifæri sem felast í listnámi. Það er orðið löngu tímabært að gera listnáminu hærra undir höfði innan almenna skólakerfisins og gefa öllum börnum tækifæri til þess að blómstra.

Una Hildardóttir.
Höfundur skipar 2. sæti á lista VG í Suðvesturkjördæmi.

Við getum verndað Varmá

Þórhildur Sunna Ævarsdóttir

Þegar ég flutti aftur í Mosfellsbæ með mann, kött og drauma um að fá okkur hund skipti mig miklu máli að finna húsnæði sem væri nálægt náttúrunni. Ekki aðeins svo að göngutúrarnir með hundinn yrðu fjölbreyttir og skemmtilegir, heldur líka vegna þess að náttúra Mosfellsbæjar skiptir mig máli persónulega.

Ég var svo heppin að finna íbúð á æskuslóðunum í Reykjahverfinu, þar sem náttúran er allt um kring. Ég man þannig eftir heilu sumrunum þar sem Varmá var aðal leiksvæði okkar vinanna. Við byrjuðum við dælustöðina og fylgdum ánni í gegnum skóginn við Reykjalund, framhjá Álafossi og enduðum síðan á Stekkjarflöt. Þá var mamma ein af stofnendum Varmársamtakanna, sem börðust fyrir verndun árinnar, þannig að Varmá átti stundum sæti við kvöldmatarborðið heima.
Varmá er perla og það er ekki síst hennar vegna sem mér hefur alltaf þótt Álafosskvosin vera hjarta Mosfellsbæjar. Það er ekki að ástæðulausu sem ferðamannarúturnar stoppa þar þegar þær eiga leið framhjá bænum. Sækjast í gömlu húsin, handverkið og auðvitað Álafossinn sjálfan.

Áhyggjur í áratugi
Þegar ég hugsa um barnæsku mína, nú þegar ég hef eignast mitt fyrsta barn, þykir mér sorglegt hvernig komið er fyrir Varmá. Ástand hennar er jafn slæmt, ef ekki verra, en það var þegar ég var lítil. Reglulega sjáum við myndir frá bæjarbúum af blágrænni slikju í ánni, mengun sem drepur fiska í hundraðatali ár eftir ár. Bakkar Varmár eru víða orðnir svo lélegir að það er ekki hægt að ganga meðfram henni á löngum köflum.

Bæjarbúar hafa bent á það frá því á síðustu öld að allt frárennsli frá göturæsum og bílastæðum fer beint út í ána. En þrátt fyrir óteljandi ábendingar, áskoranir og þrumuræður á bæjarstjórnarfundum frá vinum Varmár þá hefur ekkert verið gert. Áfram er efnum dælt út í ána og áfram fáum við myndir og áhyggjufullar færslur frá bæjarbúum.

Einföld breyting
En það er hægt að breyta til og grípa til aðgerða fyrir Varmá. Það er bara pólítísk ákvörðun eins og svo margt annað. Hvað íbúum kann að finnast skiptir ekki máli ef bæjarstjórn er á öðru máli. En það þarf ekki að vera þannig. Þess vegna erum við Píratar með stefnu í byggðamálum þar sem markmiðið er að auka völd íbúa og auðvelda þeim að hafa áhrif á nærumhverfi sitt. Það má gera mjög auðveldlega, t.d. með því að breyta sveitarstjórnarlögum þannig að lægra hlutfall íbúa þurfi til að kalla til borgarafundar og til að óska eftir íbúakosningu um einstök málefni.

Mér persónulega finnst velferð Varmár vera slíkt málefni. Að fallegri Varmá taki á móti gangandi Mosfellingum og að sex mánaða sonur minn geti leikið sér við heilnæmari Varmá í framtíðinni.

Þórhildur Sunna Ævarsdóttir

Þegar sumir eru jafnari en aðrir

Elín Anna Gísladóttir

Það er ákveðin meginregla í siðmenntuðu samfélagi að við höfum sömu réttindi og gegnum sömu skyldum, að fólki sé ekki mismunað t.d. á grundvelli búsetu. En hvers vegna er það þá þannig að sumir eru jafnari en aðrir þegar það kemur að því að kjósa til Alþingis, æðstu stofnunnar landsins.
Skipta Mosfellingar og nágrannar okkar í Kraganum minna máli en vinir okkar sem búa í landsbyggðarkjördæmunum? Það virðist að minnsta kosti vera miðað við áhugaleysi ríkisstjórnarflokkanna til að rétta hlut okkar sem búum í fjölmennasta kjördæmi landsins. Svo mikill var munurinn á vægi atkvæða í síðustu kosningum að nærri því tvöfaldan fjölda atkvæða þurfti í okkar kjördæmi til að fá þingmann kjörinn á móti þingmanni í fámennasta kjördæminu, eða 5.350 atkvæði á móti 2.690 atkvæðum.
Viðreisn lagði fram tillögu á Alþingi í vor sem stuðla átti á réttlátara kosningakerfi. Allir þingmenn stjórnarflokkanna kusu gegn þeirri tillögu. Heyrst hefur frá stjórnarflokkunum í sumar að það hafi einfaldlega ekki gefist nægur tími í vor til þess að ræða þetta frumvarp og því hafi ekki verið hægt að samþykkja það.

Þorgerður Katrín Gunnarsdóttir

Við biðjum virðulega stjórnarþingmenn að hætta að slá ryki í augu kjósenda. Það var einfaldlega enginn vilji til þess að breyta þessu – þar sem að þessi misskipting er stjórninni í hag. Í okkar bókum kallast það sérhagsmunir.
Jafnt vægi atkvæða er jafnréttismál. Stjórnmálaflokkar eiga að fá þingsæti í samræmi við þá kosningu sem þeir hljóta. Þeir þingmenn sem eru kjörnir á þing starfa þar fyrir alla þjóðina, ekki bara sitt kjördæmi. Þannig náum við fram sanngirni, jafnrétti og samstöðu. Í þannig samfélagi viljum við búa.

Eftir Elínu Önnu Gísladóttur 3. sæti á lista Viðreisnar í Suðvesturkjördæmi
og Þorgerði Katrínu Gunnarsdóttur formann Viðreisnar og
1. sæti á lista Viðreisnar í Suðvesturkjördæmi

Gerum þetta saman

Kolbrún G. Þorsteinsdóttir

Nú þegar skólastarf hefst að nýju eru grunnskólanemendur fullir eftirvæntingar að mæta í skólann sinn eftir sumarfrí. Einnig er að færast líf í starfið á leikskólunum eftir gott sumar og líf okkar allra að færast í fastar skorður. Við vonuðum í vor að kórónuveirufaraldurinn yrði vond minning þegar skólar hæfust nú í haust, en við verðum því miður að kljást við veiruna eitthvað áfram.
Ljóst er orðið að skólastarf verður með einhverjum takmörkunum í vetur með tilheyrandi púsli. Nú er vitað að veiran getur lagst illa á börn og það er hlutverk okkar fullorðna fólksins að verja þau. Það gerum við með því að fara eftir þeim reglum sem settar eru og huga að persónulegum sóttvörnum. Þetta kunnum við allt.
Megin­áherslan er þó að verja skólastarfið og reyna að tryggja að það verði sem eðlilegast. Til að það gangi eftir þurfum við að standa saman og leggja af stað inn í þennan vetur með bjartsýni og samheldni að vopni.

Skólarnir okkar – hvað er nýtt?
Varmárskóla hefur verið skipt í tvennt og heitir eldri deildin nú Kvíslarskóli. Það hefur vart farið framhjá bæjarbúum. Kvíslarskóli hefst kl. 8.30 í stað 8.10 í vetur samkvæmt ósk frá SAMMOS, samtökum foreldrafélaga grunnskóla í Mosfellsbæ. Breyting sem þessi hefur reynst vel annars staðar og vonandi verða unglingarnir okkar ánægðir með að fá að sofa aðeins lengur.
Nýr skólastjóri hefur verið ráðinn í yngri deildina og bjóðum við Jónu Benediktsdóttur hjartanlega velkomna til starfa með okkur. Nýju fólki fylgja nýjar áherslur og verður áhugavert að fylgjast með skólaþróun í Varmárskóla á næstu árum.
Í Helgafellsskóla hefur nýr áfangi, sem hýsir unglingadeildina, verið tekinn í notkun og verður gaman að sjá deildina blómstra í höndum eldhuganna sem þar starfa. Á Huldubergi og Hlíð verða yngstu börnin á ungbarnadeildum en mikið kapp hefur verið lagt í að aðlaga útisvæðin að þörfum yngstu barnanna. Á Höfðabergi verða 3 – 5 ára börn í góðum höndum og sex ára börnin fara aftur í stóru byggingu Lágafellsskóla. Hér er eingöngu stiklað á stóru því hver skóli iðar af lífi þar sem framsækið og öflugt fólk hefur ráðist til starfa sem ber hag unga fólksins okkar fyrir brjósti. Ég hlakka til að fylgjast með starfi þeirra í vetur.

Skólasamfélagið í Mosfellsbæ
Það er hlutverk bæjaryfirvalda að standa við bakið á skólafólkinu okkar svo það fái að blómstra og þróast í starfi.
Skólastarf í hverju sveitarfélagi er það sem skiptir íbúana mestu máli og þess vegna viljum við gera eins vel og mögulegt er. Markmiðið er að nemendur eflist og styrkist í starfi og kveðji skólann sinn í lok 10. bekkjar vel undir það búin að taka næstu skref inn í framtíðina. Þá hefur okkur tekist ætlunarverkið.

Kolbrún G. Þorsteinsdóttir
bæjarfulltrúi og formaður fræðslunefndar

Um misvægi

Guðmundur Andri Thorsson

Eftir síðustu Alþingiskosningar vantaði átta atkvæði upp á að Kópavogsbúinn Margrét Tryggvadóttir yrði annar þingmaður Samfylkingarinnar fyrir Kragann.
Fyrir vikið varð þingflokkur Samfylkingarinnar manninum færri en þingflokkur Framsóknarflokksins – þrátt fyrir að Samfylkingin hefði fengið rúmlega 2500 fleiri atkvæði en Framsókn á landsvísu. Nú er ég kominn í annað sætið – og er út um allt að svipast um eftir þessum átta …

Sjálfur varð ég sá þingmaður sem hafði flest atkvæði á bak við sig á síðasta þingi – sem kannski er viss upphefð – en ég hefði samt frekar viljað hafa hana Möggu með mér. Það hefði hún líka verið ef atkvæði okkar í Kraganum hefðu ekki miklu minna vægi en atkvæði fólks sem býr í öðrum landshlutum.
Þegar kosningalög voru samþykkt undir lok þingsins reyndum við að koma á einfaldri leiðréttingu á þessari skekkju, með fjölgun jöfnunarþingsæta – auk mín lögðu fram málið Þorbjörg Sigríður Gunnlaugsdóttir frá Viðreisn og Píratinn Björn Leví Gunnarsson. Í gamla daga var stundum talað um „lýðræðisflokkana“ til aðgreiningar frá meintum alræðissinnum. Kannski er ástæða til að endurvekja þetta hugtak um þá flokka sem studdu þessa tillögu.

Við sem lögðum málið fram gerðum það í samráði við Þorkel Helgason, þann mann sem mest og best þekkir til kosningalaganna og við tókum líka mið af umsögn Ólafs Þ. Harðarsonar um kosningalagabreytingarnar svo að ekki er hægt að afgreiða þessa tillögu okkar sem hugdettu á síðustu stundu.
Stjórnarliðar sögðu að ekki hefði farið „næg umræða fram“, eins og jafnt kosningaréttur sé álitamál sem þurfi að ræða, en ekki grundvallar-mannréttindi sem við öðlumst um leið og við höfum aldur til. Stundum heyrist í þessari umræðu að slík forréttindi og hagræði fylgi því að ýmsar stofnanir hafi höfuðstöðvar sínar á höfuðborgarsvæðinu að réttlætanlegt sé mismuna fólki þegar kemur að kosningarétti.
Það er vissulega ástæða til að jafna hlut byggðanna – og ótal tækifæri sem gefast til þess á okkar netvæddu tímum, en kosningaréttinn á ekki að nota til þess, frekar en önnur mannréttindi. Misvægi á einum stað verður ekki lagað með misvægi á öðrum stað.

Það ríkti almenn sátt um það frá árinu 1987 að minnsta kosti, að jafna bæri vægi flokkanna og Alþingi hefur nokkrum sinnum tekist að gera það. En í þremur síðustu kosningum hafa Sjálfstæðismenn og Framsóknarmenn hins vegar skipst á að fá aukamann umfram það sem þeim ber samkvæmt atkvæðavægi. „Þetta er eitthvað sem þarf að skoða,“ er haft eftir forsætisráðherra um málið.
Ef við fáum til þess styrk í komandi kosningum þá er þetta hins vegar eitthvað sem við ætlum að breyta. Þá þurfa þessi átta að skila sér …

Guðmundur Andri Thorsson þingmaður Samfylkingarinnar
í Suðvesturkjördæmi og skipar annað sæti listans í komandi kosningum

Varmárósar og friðlýsing Leirvogs

Anna Sigríður Guðnadóttir

Samfylkingin í Mosfellsbæ hefur á stefnuskrá sinni að friðlýsa Leirvoginn vegna mikilvægis svæðisins fyrir fugla og vegna fjölbreyttra vistgerða á svæðinu. Nú þegar friðlýst svæði Varmárósa hefur verið stækkað virðist sem jarðvegur sé að skapast til að við málinu verði hreyft.
Varmárósar eru hluti af stærra svæði, Leirvoginum, sem er mikilvægur í alþjóðlegu samhengi sem áningarstaður margæsa og sendlings. Náttúrufræðistofnun hefur gefið það út að Leirvogurinn og Blikastaðakró séu verðmæt svæði í þessu tilliti og beri að líta á voginn og Varmárósa sem eitt svæði. Friðlýsing Leirvogsins er því eðlilegt og skynsamlegt næsta skref.
Verðmæti og verndargildi þessa svæðis er óumdeilt. Það er annar tveggja vaxtarstaða fágæts sefs, fitjasefs, sem er á válista Náttúrufræðistofnunar, auk þess sem svæðið er mikilvægt vistkerfi fyrir fugla. Friðlýsing Varmárósa felur í sér að rannsóknir og vöktun á lífríki svæðisins verða tryggð með áherslu á plöntuna fitjasef, búsvæði hennar og þær vistgerðir votlendis, strandlendis og fjöruvistgerða sem er að finna á svæðinu. Henni er einnig ætlað að treysta útivistar-, rannsóknar- og fræðslugildi svæðisins. Þess misskilnings hefur nefnilega gætt að friðlýsingar þýði bann við umferð manna um friðlýst svæði. Því fer fjarri. Friðlýsingum er beitt til að vernda svæði og náttúrufyrirbrigði til að þeirra megi njóta á ábyrgan og sjálfbæran hátt til framtíðar þannig að vistkerfi plantna og dýra raskist ekki.

Þórunn Sveinbjarnardóttir

Umræður um friðun Leirvogs og Blikastaðakróar í samstarfi við Reykjavíkurborg hafa farið fram í umhverfisnefnd Mosfellsbæjar og sameiginlegur starfshópur skipaður fulltrúum frá Mosfellsbæ, Reykjavík og Umhverfisstofnun hefur verið myndaður um málið. Auka þær umræður bjartsýni okkar á að hafinn verði undirbúningur að því þarfa verkefni að friðlýsa voginn. Þar mun Samfylkingin leggja sitt lóð á vogarskálarnar.
Leirvogurinn er vin á höfuðborgarsvæðinu. Hann er umkringdur þéttbýli að stórum hluta og norðan við hann er er iðnaðarstarfsemi Sorpu. Mosfellsbær hefur enn á sér yfirbragð sveitar í borg og það yfirbragð er almenn sátt um í bænum. Hingað sækja aðrir íbúar höfuðborgarsvæðisins til að njóta náttúrunnar til fjalls og fjöru. En þau lífsgæði að geta brugðið sér örstuttan spöl til að upplifa ósnerta náttúru er okkar að vernda og verja fyrir komandi kynslóðir.

Eftir Önnu Sigríði Guðnadóttur bæjarfulltrúa og Þórunni Sveinbjarnardóttur fv. umhverfisráðherra
sem leiðir lista Samfylkingarinnar í Suðvesturkjördæmi fyrir alþingiskosningarnar í haust.

Ritskoðun í Rusllandi

Sveinn Óskar Sigurðsson

Enn er talsvert fjör í bæjarstjórn Mosfellsbæjar og nýsköpun bætist við annars talsverða listsköpun forseta bæjarstjórnar í gegnum árin.
Í upphafi ársins 2021, nánar tiltekið 27. janúar, var tekið fyrir á bæjarstjórnarfundi nr. 775 mál er sneri að brunanum í SORPU 8. janúar þegar landsins stærsta gúanó, þ.e. hann Gýmir blessaður, kviknaði bókstaflega til lífsins. Um atburðarrásina segir í gögnum frá SORPU: ,,Aðfaranótt föstudagsins 8. janúar 2021 kom upp eldur í aflögðum móttökustað lífræns- og lyktarsterks úrgangs, Gými. Orsök brunans er sjálfsíkveikja þar sem eldur kviknaði í (lífrænum úrgangi), greinum, timbur- og dekkjakurli sem notað var sem yfirlag, ásamt því að komast í „lausarusl“ sem losað er í nágrenninu, og varð af mikið eldhaf.“
Byggðasamlagið SORPA, sem hefur gengið í gegnum fjárhagslegar hremmingar, hvorki náð að framleiða nothæfa moltu né koma Gas- og jarðgerðarstöðinni (GAJA) nægjanlega vel í gagnið leitaði þá á náðir annars byggðasamlags á höfuðborgarsvæðinu, þ.e. Slökkviliðs höfuðborgarsvæðsins. Það var gert til að berja Gými til hlýðni enda ekki vitað hvað hann vildi upp á dekk. Það tókst með tilsvarandi umhverfisspjöllum í formi mengunar sem stafaði af litríkum strókum er stóðu upp úr Gými rétt áður en í honum var slökkt.
Þessi áformaða „yfirtaka“ Gýmis á SORPU er líklega ein sú heiðarlegasta sem gerð hefur verið frá sveitarstjórnakosningunum árið 2018. Frá þeim tíma hefur forstjóra SORPU verið vikið úr starfi til að auðveldara yrði að draga fjöður yfir skelfileg mistök stjórnar SORPU, skilnings- og aðgerðarleysi svo árum skiptir.
Sökum þessa lagði greinarhöfundur fram eftirfarandi bókun á framangreindum fundi bæjarstjórnar Mosfellsbæjar: „Enn og aftur áréttar bæjarfulltrúi Miðflokksins að stjórn SORPU á að segja af sér. Sífellt eru að skapast vandræði í kringum þetta mikilvæga byggðasamlag. Hefur stjórn þessa samlags ekki sætt ábyrgð varðandi sóun, mengun og úrræðaleysi á mörgum sviðum í rekstri. E
innig virðist fulltrúi Mosfellsbæjar fara með fleipur um ákveðin mikilvæg mál er SORPU varðar er m.a. tengjast gjaldskrá og rekstur almennt. Fundagerðir eru illa unnar, ekki upplýsandi og vart hægt að sjá mun á fundargerð og dagskrá funda. Við framangreint hefur nú bæst við stórbruni, sem er mjög alvarlegt atvik og hefur örugglega ekki bætt loftgæði í Mosfellsbæ og þar með á höfuðborgarsvæðinu.“
Við tók eitt af lengri fundarhléum sem meirihlutinn í Mosfellsbæ hefur tekið. Kemur það greinarhöfundi spánskt fyrir sjónir í ljósi þess að á meðal þeirra er fulltrúi Vinstri hreyfingarinnar græns framboðs, þ.e. forseti bæjarstjórnar, sem segir sig vera skáld. Það kom loksins á daginn að „hæfileikarnir“ komu að gagni.
Lausn forseta bæjarstjórnar var þessi og færð til bókar undir þeim dagskrárlið er fjallaði um sorpbrunann við bæjardyr Mosfellinga: „Bæjarfulltrúi M-lista óskaði eftir að leggja fram tvær bókanir. Fundarstjóri bauð bæjarfulltrúa að stytta eða breyta bókunum sem var hafnað af hálfu bæjarfulltrúa M-lista. Fundarstjóri hafnaði bókununum.“
Hið rétta er reyndar að fulltrúi Miðflokksins lagði fram eina bókun og aðra til að leita sátta en báðum var hafnað. Efnislega voru þær eins. En það er þessi nýsköpun sem heillar, þ.e. hin frumstæða ritskoðun reiðinnar.
Gleðilegt sumar.

Sveinn Óskar Sigurðsson,
bæjarfulltrúi Miðflokksins í Mosfellsbæ.

Framtíðin er unga fólksins

Bryndís Haraldsdóttir

Öflugt atvinnulíf til framtíðar, framboð af húsnæði og góðar samgöngur eru forsenda framfara og undirstaða velferðarkerfisins á Íslandi. Samkeppni um unga fólkið er einn af hornsteinum framtíðarinnar. Getur unga fólkið byggt upp sitt líf í Mosfellsbæ, á höfuðborgarsvæðinu, á Íslandi eða velur það að fara eitthvað annað?

Við sem hér búum þekkjum kosti þess hversu mikil lífsgæði eru fólgin í því að hafa greiðan aðgang að náttúru og útivist. Mikilvægi okkar góðu skóla og leikskóla. Hvað samfélagið, félagsstarfið og samhugurinn gefur okkur öllum mikið. Allt þetta þurfum við að varðveita því það eru þessir þættir sem gera Mosfellsbæ að frábærum bæ.

Öflugt og fjölbreytt atvinnulíf
Það er hlutverk stjórnvalda að búa þeim framtíð, skapa heilbrigt og hvetjandi umhverfi fyrir atvinnulífið svo nýta megi krafta okkar einstaklinganna til fulls. Skattkerfið og regluverk atvinnulífsins á að vera einfalt og sanngjarnt og hvetja til fjárfestinga og eðlilegrar samkeppni. Stjórnmálamenn þurfa að skapa skýrt og stöðugt starfsumhverfi fyrir allar atvinnugreinar. Við þurfum að vera meðvituð um að tryggja meiri fjölbreytileika í íslensku atvinnulíf og það á ekki síður við hér í Mosfellsbæ.

Bryndís Haraldsdóttir í 2. sæti
Ég hef verið þeirrar gæfu aðnjótandi að sitja á þingi í 5 ár sem 2. þingmaður Suðvesturkjördæmis. Ég var bæjarfulltrúi hér í Mosfellsbæ í 8 ár og varabæjarfulltrúi 8 ár þar á undan. Ég var lengi formaður skipulagsnefndar og formaður bæjarráðs, ég var forseti bæjarstjórnar, stjórnarformaður Strætó og sat í svæðisskipulagsnefnd.

Ég hef látið mig ýmis mál varða, bæði í sveitarstjórn og á þingi, og eitt þeirra mála eru samgöngur á höfuðborgarsvæðinu. Það er mikilvægt að horft sé til framtíðar og horft sé á raunhæfar lausnir fyrir svæðið allt. Ég er stolt af því að hafa komið að og stutt höfuborgarsáttmálann, samning á milli ríkis og sveitarfélaga um alvöru uppbyggingu samgöngumannvirkja þar sem horft er til fjölbreyttra samgöngukosta, bæði einkabílsins og almenningssamgangna.
Ég hef líka kallað eftir Sundabraut strax og lagt fram þingsályktun um að hún verði boðin út í einkaframkvæmd.

Ég sækist nú eftir því að fá að vinna áfram fyrir Mosfellsbæ og unga fólkið okkar að því að byggja upp öruggt, frjálst og opið og gott samfélag þar sem allir geta nýtt tækifærin sín. Ég býð fram krafta mína, reynslu og þekkingu.

Bryndís Haraldsdóttir, þingmaður Sjálfstæðisflokks, gefur kost á sér í 2. sæti í prófkjöri flokksins í SV-kjördæmi 10.-12. júní næstkomandi.
Frekari upplýsingar www.bryndisharalds.is

Rödd atvinnulífsins inn á Alþingi

Sigþrúður Ármann

Öflugt atvinnulíf er grundvöllur velferðar, framþróunar og hagsældar fyrir alla. Atvinnulífið stendur undir grunnstoðum samfélagsins; menntakerfinu, heilbrigðiskerfinu, velferðarkerfinu, samgöngum, innviðum og menningu. Það er því hagur okkar allra að atvinnulífið blómstri.

Hvetjandi umhverfi
Við fæðumst með ólíka forgjöf. Bakland fólks er misjafnt en við þurfum öll að fá tækifæri til að nýta hæfileika okkar. Til þess þurfum við sem samfélag að standa saman og hafa það að sameiginlegu markmiði að byggja upp samfélag sem stuðlar að velferð, lífsgæðum og efnahagslegri sjálfbærni til framtíðar.
Við þurfum að skapa hvetjandi umhverfi þannig að hver og einn finni hvata til þess að láta til sín taka. Þennan hvata má ekki skerða þegar fólk kemst á efri ár. Tækifærin eru víða og við þurfum að virkja kraftinn. Minnka umsvif í rekstri hins opinbera og útvista verkefnum. Það er atvinnulífsins að leiða vöxt á vinnumarkaði og fjölga störfum en ekki hins opinbera.

Aukin verðmætasköpun
Við þurfum að auka verðmætasköpun með öflugri innlendri framleiðslu og treysta stoðir útflutningsfyrirtækja því að þar liggur grunnurinn að gjaldeyrisöflun landsins. Þannig tryggjum við stöðug lífskjör í landinu og löðum að erlendar fjárfestingar.
Við þurfum að efla atvinnulífið og auka ráðstöfunartekjur fólks með lágum sköttum og gjöldum. Samkeppnisforskot okkar er græn orka og við þurfum að nýta auðlindir okkar á sjálfbæran hátt til uppbyggingar atvinnulífs hér á landi.

Menntun, heilbrigði og nýsköpun
Aðgangur að framúrskarandi og fjölbreyttri menntun og góðu heilbrigðiskerfi er lykilatriði fyrir samfélagið allt. Við eigum að efla nýsköpun á öllum sviðum og bjóða upp á valfrelsi. Framþróun byggist á nýsköpun. Við þurfum að byrja strax í grunnskólum að þjálfa börn í að hugsa á skapandi hátt.

Með víðtæka reynslu úr atvinnulífinu
Ég vil nýta víðtæka reynslu mína úr atvinnulífinu á Alþingi. Ég er fædd og alin upp í heimi viðskipta. Ég er einn eigenda og stjórnarformaður framleiðslufyrirtækis í Hafnarfirði. Ég er fulltrúi í fjölskylduráði í Garðabæ sem jafnframt er barnaverndarnefnd bæjarins.
Félagsleg mál, málefni eldri borgara og fatlaðra heyra einnig undir nefndina. Ég brenn fyrir samfélagsmálum og finnst fátt meira gefandi en að eiga góð samskipti við fólk. Ég hef verið framkvæmdastjóri öflugs umræðuvettvangs í 15 ár, þar sem viðfangsefni eru rædd þvert á atvinnugreinar á málefnalegan, uppbyggilegan og árangursríkan hátt.

Nýir tímar kalla á ný vinnubrögð – þurfum skýra framtíðarsýn
Alþingi á að vera vettvangur fyrir uppbyggilega og málefnalega umræðu þar sem mótuð er skýr framtíðarsýn. Sem alþingismaður mun ég vinna markvisst að því að efla málefnalega umræðu á milli atvinnulífs og stjórnvalda.

Virk í starfi Sjálfstæðisflokksins
Í rúma tvo áratugi hef ég tekið virkan þátt í starfi Sjálfstæðisflokksins. Ég aðhyllist stefnu flokksins um frelsi einstaklingsins, atvinnufrelsi og jafnrétti. Ég býð mig fram í prófkjöri til að geta unnið að krafti á Alþingi að þessum hugsjónum. Sjá nánari upplýsingar á heimasíðu minni www.sigthrudur.is

Ég óska eftir þínum stuðningi í 3. sætið.

Sigþrúður Ármann
Höfundur er lögfræðingur og framkvæmdastjóri. Frambjóðandi í prófkjöri Sjálfstæðisflokksins í Suðvesturkjördæmi.

Hugsum stærra, gerum meira og gerum betur

Jón Gunnarsson

Það viðhorf er ekki óalgengt hjá fólki á öllum aldri að það skipti engu máli hverjir fari með stjórn landsins eða í sveitarfélögunum, það sé sami rassinn undir öllu þessu liði.
Engin ástæða sé til þess að drattast á kjörstað, þetta verði allt óbreytt eftir kosningar hvort eð er. En er það þannig? Skiptir virkilega engu máli hver heldur um stjórnartaumana?

Reynslan sýnir okkur að það skiptir miklu máli og þá er ég ekki að tala um fjarlæga fortíð, heldur nútímann. Auðvelt er að bera saman stöðu fjármála í sveitarfélögunum hér í Kraganum við ástandið í Reykjavík. Á meðan bæjarstjórnirnar í Kraganum reka bæjarsjóði af ábyrgð, skynsemi og með jákvæðri niðurstöðu við erfiðar aðstæður þessi misserin, en halda um leið uppi fullri þjónustu við bæjarbúa, þá er fjárhagur stærsta sveitarfélagsins á svæðinu – Reykjavíkurborgar – rjúkandi rúst. Og það gerist þrátt fyrir að hún sé langstærsta sveitarfélagið og með alla skattstofna fullnýtta.
Og hver skyldi nú vera galdurinn á bak við þetta? Jú, hann er einfaldur, sveitarfélögunum í Kraganum er stýrt af sjálfstæðismönnum, en Reykjavík lýtur forsjá vinstri flokkanna með Viðreisnarhækjuna sér til stuðnings.

Samgönguvandi í boði borgarinnar
Við sem búum í nágrenni borgarinnar þekkjum umferðarteppurnar sem fyrst og fremst eru heimatilbúinn vandi, vegna þess að Reykjavíkurborg sinnir ekki þeim skyldum sínum að greiða fyrir umferðinni. Öll þekkjum við tafirnar á gatnamótum Reykjanesbrautar og Bústaðarvegar, tafir sem kosta óheyrilegar fjárhæðir vegna vinnutaps.
En þótt umferð gangi á margan hátt greiðlega hér á svæðinu, þá þekkjum við nokkra staði þar sem hraða þarf framkvæmdum til þess að greiða okkur leið og auka jafnframt umferðaröryggi allra vegfarenda. Um þessar mundir eiga sér stað miklar framkvæmdir í samgöngumálum, ekki síst í nágrenni höfuðborgarinnar. Ýmsar þeirra eru verkefni sem ég barðist fyrir að kæmu til framkvæmda þegar ég gegndi embætti samgönguráðherra árið 2017.
En fyrirliggjandi framkvæmdaáætlanir munu ekki standast eins og skrifað var upp á í Samgöngusáttmálanum 2019, vegna þess m.a. að leiðsögn skortir hjá ríkinu á sama tíma og Reykjavíkurborg er látin komast upp með það að tefja lykilframkvæmdir. Þar á ég t.d. við mislægu gatnamótin á Reykjanesbraut við Bústaðaveg sem áttu að koma til framkvæmda á þessu ári.
Mér finnst sorglegt að þetta skuli látið viðgangast á meðan brýn lykilverkefni hér í Kraganum fá ekki jafn skjótan framgang og nauðsynlegt væri. Þar er ég m.a. að tala um Arnarnesveginn sem átti að klárast á þessu ári með mislægum gatnamótum við Breiðholtsbraut, en Reykjavíkurborg er látin komast upp með að tefja. Ekki síður er brýnt að hraða bráðnauðsynlegum framkvæmdum í Garðabæ, en þar er búið að setja áform um stokk á Hafnarfjarðarvegi í Garðabæ á framkvæmdaáætlun áranna 2028–2030, en þessi framkvæmd er mjög mikilvæg.
Og í Hafnarfirði er ekki síður aðkallandi að taka fyrr til hendinni en hugmyndir eru uppi um. Þar er ég með í huga algjöra lykilframkvæmd á Reykjanesbraut, þ.e. við Lækjargötu og Álftanesveg, Kaplakrika. Þetta verkefni á að teygja yfir árin 2024 til 2028. Framkvæmdir í Hafnarfirði eiga skv. þessu ekki að hefjast fyrr en í lok næsta kjörtímabils og í Garðabæ í lok þarnæsta kjörtímabils. Það er óásættanlegt.
Mér hefur oft fundist – og ég er alls ekki einn um það – að við framkvæmdir á vegum hins opinbera ríki of oft skammsýni og að unnt sé að hraða framkvæmdum og nýta fjármuni betur en gert er, með fyrirhyggju sem síðan leiðir til sparnaðar. Það hefur margoft komið í ljós að með því að hugsa stærra, gera meira og gera betur má ná fram aukinni hagkvæmni vegna stærðar og umfangs. Það mun, þegar upp verður staðið, geta sparað okkur milljarða í samgönguframkvæmdum. Þann ávinning mætti síðan nota í önnur verkefni, eða skattalækkanir sem ekki er vanþörf á.

Jón Gunnarsson
Höfundur óskar eftir stuðningi í 2. sætið í prófkjöri Sjálfstæðisflokksins í Kraganum dagana 10. – 12. júní.

Látum verkin tala

Kristín Thoroddsen

Íslendingar eru í grunninn samheldin þjóð og þegar á reynir stöndum við saman og klárum verkefnin. Áskoranir komandi missera verða margvíslegar og þar er einna stærsta verkefnið uppbygging og endurreisn atvinnulífsins.
Með því að taka lítil en ákveðin skref munum við komast í gegnum verkefnin. En til að halda uppi traustu og öflugu atvinnulífi þurfum við sterka einstaklinga, unga sem aldna og sterka forystu. Við þurfum að hlúa að fólkinu til að gera því kleift að takast á við verkefnin, fyrir okkur öll.

Stöndum með unga fólkinu okkar – framtíðaríbúum landsins
Á undanförnum árum hefur unga fólkið okkar þurft að færa fórnir og setja líf sitt á hilluna um stund og það er aðdáunarvert hvernig því hefur tekist það. Inn á milli leynast þó brotnir einstaklingar, líklega fleiri en okkur grunar, sem þurfa stuðning og skýr markmið fyrir framtíðina. Við státum okkur af sterku heilbrigðiskerfi og sterku menntakerfi. En erum við að gera allt sem við getum til að grípa unga fólkið?
Við höfum félagsmiðstöðvar fyrir ungt fólk að 16 ára aldri en eftir situr hópur ungs fólks á aldrinum 16-25 ára sem þarf á stuðningi að halda. Sem formaður fræðslumála hjá Hafnarfjarðarbæ og bæjarfulltrúi veit ég að líðan fjölda ungs fólks er alls ekki góð núna eftir COVID. Það er því einstaklega mikilvægt að nýta öll þau úrræði sem til eru. Þekking og reynsla er til staðar, en hún er dreifð og óaðgengileg. Það er því mikið baráttumál að stofnað verði miðlægt þekkingarsetur sem Samfés hefur nú þegar unnið grunninn að.
Meginmarkmið verkefnisins er að ná til þeirra sem vinna með ungu fólki á öllu landinu og tryggja þannig samræmt faglegt starf. Slíkt setur hefði það einnig að markmiði að veita ungu fólki stuðning, styðja við erlent samstarf, samþætta vinnu fagfólks og veita ráðgjöf og stuðning. Það ætti að vera baráttumál allra sem að stjórnmálum koma að veita þessu verkefni brautargengi. Ég mun leggja mitt af mörkum til að þekkingarsetur muni verða að veruleika, til að við getum stolt sagst hafa staðið með framtíð landsins og ungu fólki, hvar sem það er búsett á landinu.

Sköpum skilyrði fyrir fólk og fyrirtæki
Til að standa með unga fólkinu okkar er mikilvægt að bakland þess sé sterkt. Öll þekkjum við til fjölskyldna þar sem annar eða jafnvel báðir hafa misst vinnuna og standa höllum fæti sem hefur áhrif á alla fjölskylduna. Við erum baráttuþjóð sem breytir vandamálum í verkefni. Sköpum skilyrði svo hugmyndir fólks fái að vaxa og dafna.
Með því að styðja við einkaframtakið, treysta fólkinu og fyrirtækjum til að skapa hér vinnu og verðmæti munum við áður en langt um líður verða sterkari til að takast á við framtíð okkar og framtíð barna okkar. Þannig getum við byggt upp sterkt samfélag, þannig verðum við sterkari til að bregðast við áskorunum unga fólksins og þannig munum við leysa verkefni nánustu framtíðar. Látum verkin tala og bregðumst strax við vandanum. Við þekkjum söguna, við þekkjum afleiðingarnar. Sofnum því ekki á verðinum!

Kristín Thoroddsen bæjarfulltrúi Sjálfstæðisflokksins í Hafnarfirði.
Höfundur býður sig fram í 3. sæti í prófkjöri Sjálfstæðisflokksins í Suðvesturkjördæmi sem fram fer 10.-12. júní.

Snjallar lausnir og betri þjónusta í skólamálum

Kolbrún G. Þorsteinsdóttir

Skólamálin eru einn mikilvægasti málaflokkur Mosfellsbæjar og hefur meirihluti Sjálfstæðisflokks og Vinstri grænna ávallt lagt mikla áherslu á málaflokkinn ásamt því að auka og bæta þjónustu við barnafjölskyldur.
Í málefnasamningi flokkanna tveggja stendur m.a. að fjölga eigi plássum á ungbarnadeildum þannig að fleiri 12 mánaða gömul börn fái leikskólapláss á kjörtímabilinu, að lækka skuli leikskólagjöld og halda áfram að bæta upplýsingatæknimál skólanna. Einnig kemur fram í málefnasamningnum að endurbæta eigi skólahúsnæði, bæði ytra byrði húsanna og vinnuaðstöðu kennara og nemenda. Við þetta hefur verið staðið og áfram höldum við að gera góðan bæ enn betri.
Mikið átak hefur verið gert í upplýsingatæknimálum í grunnskólum og lengri sumarfrístund fyrir nemendur sem hefja skólagöngu í Varmárskóla og Lágafellsskóla er nýjasta viðbótin við bætta þjónustu við barnafjölskyldur í Mosfellsbæ.

Snjallir skólar
Árið 2019 hófst mikil umbótavinna varðandi upplýsingatæknimálin í grunnskólum bæjarins og í framhaldi af þeirri vinnu var gerð áætlun um tækjakaup til rafrænna kennsluhátta. Allir nemendur hafa nú aðgang að svokölluðum Krómbókum og spjaldtölvum og aukast nú tækifæri til að vinna að verkefnum með rafrænum hætti.
Gerður hefur verið samningur um See­saw aðgang fyrir alla nemendur í 1.-6. bekk og kennara þeirra en það eru rafrænar ferilmöppur sem einfalda kennurum, nemendum og foreldrum að fylgjast með náminu. Nemendur á unglingastigi vinna með Google for Education eða rafræna kennslustofu. Útdeiling á Krómbókum og spjaldtölvum miðaði við stöðu tækjaeignar í hverjum skóla og þess gætt að tækjakostur sé nú sambærilegur milli grunnskólanna.
Upplýsingateymi kennara og stjórnenda eru í skólunum og ráðinn hefur verið verkefnastjóri til að hafa yfirumsjón með upplýsingatæknimálum og búnaði. Skólarnir eru nú mun betur settir með að undirbúa nemendur fyrir framtíðina en tækniþróun er hröð og óhætt að segja að framtíðin er núna. Skólaþróun í Mosfellsbæ heldur áfram og eru þetta stór skref sem stigin hafa verið í rétta átt.

Sumarfrístund fyrir 6 ára börn
Frá 9.–20. ágúst næstkomandi verður boðið upp á Sumarfrístund fyrir sex ára börn í Varmárskóla og Lágafellsskóla. Sumarfrístund er eins konar skólaaðlögun fyrir sex ára börn sem eru að hefja skólagöngu og fá þau í sumarfrístund að kynnast betur skólahúsnæðinu og skólalóð. Með sumarfrístund er komið á móts við þarfir margar fjölskyldna þegar sumarfríum er að ljúka og skólarnir að hefjast. Það getur verið krefjandi tími í lífi barnafjölskyldna.
Árið 2019 var í fyrsta sinn boðið upp á sumarfrístund og var sú þjónusta í boði viku fyrir skólabyrjun. Sama fyrirkomulag var árið 2020 og þá einnig fyrir 2. bekk. Þetta fyrirkomulag mæltist vel fyrir hjá þeim foreldrum sem nýttu þjónustuna og hefur verður aukið við framboðið og einni viku bætt framan við. Sú vika kemur í stað námskeiðsviku hjá íþrótta- og tómstundaskólanum.

Barnvænt samfélag
Markmið Mosfellsbæjar er að leita sífellt leiða til að auka og bæta þjónustu við bæjarbúa. Mosfellsbær hefur laðað til sín barnafjölskyldur og leggur ríka áherslu á að mæta á sem bestan og fjölbreyttasta hátt þeim fjölskyldum sem á þjónustu bæjarfélagsins þurfa á að halda.

Kolbrún G. Þorsteinsdóttir
bæjarfulltrúi og formaður fræðslunefndar

 

Friðun Leirvogs

Michele Rebora

Töluvert hefur verið fjallað um friðun Leiruvogs, m.a. á samfélagsmiðlum og hér í bæjarblaðinu, sérstaklega í kjölfar stækkunar friðlands við Varmárósa nú á dögum. Það er engin furða, enda um mikilvægt svæði að ræða út frá sjónarmiði náttúruverndar.
Sá hluti Leiruvogs sem fellur innan sveitarfélagamarka Mosfellsbæjar er í raun hluti af stærra heildarsvæði sem nefnist Blikastaðakró-Leiruvogur og liggur á mörkum Reykjavíkur og Mosfellsbæjar. Svæðið afmarkast að vestan við Geldinganes og Gunnunes og nær inn voginn til austurs, þar sem Varmá og Leirvogsá renna til sjávar. Sjávarfitjar, grýttar þangfjörur og víðáttumiklar leirur einkenna svæðið og eru heimkynni fjölmargra smádýra- og fuglategunda. Náttúrufræðistofnun Íslands skilgreinir Blikastaðakró-Leiruvog sem alþjóðlega mikilvægt fuglasvæði en mikið fuglalíf er á öllum árstímum og tvær tegundir ná alþjóðlegum verndarviðmiðum; margæs á fartíma og sendlingur að vetri.
Svæðið er jafnframt vinsælt til útivistar og hreyfingar og liggja meðal annars fjölfarnir göngu- og reiðhjólastígar svo og reiðleiðir meðfram ströndinni. Hlíðavöllur Golfklúbbs Mosfellsbæjar liggur svo meðfram stórum hluta svæðisins.
Í tengslum við afstaðna vinnu við stækkun friðlandsins við Varmárósa bendir Náttúrufræðistofnun Íslands á í sinni umsögn að stofnunin „telur Blikastaðakró – Leiruvogur vera mikilvægt alþjóðlegt fuglasvæði sem þörf er að vernda, en Varmárós er aðeins lítill hluti af því svæði. Til að tryggja vernd fugla, vistgerða votlendis, strandlendis og fjöruvistgerða, þarf friðlýsta svæðið að vera mun stærra.“

Reykjavíkurborg hefur samþykkt að undirbúa friðlýsingu þess hluta svæðisins sem tilheyrir borginni.
Á síðasta fundi umhverfisnefndar lagði ég fram tillögu um að Mosfellsbær myndi beita sér fyrir því að friðlýsingin næði yfir allt svæðið þvert á sveitarfélögin, enda vistkerfi ekki bundin sveitarfélagamörkum frekar en fuglar.
Umhverfisstofnun hefur nú beðið Mosfellsbæ um að taka þátt í vinnuhópi um málið og er undirritaður þar einn af þremur fulltrúum bæjarins, ásamt formanni umhverfisnefndar og umhverfisstjóra Mosfellsbæjar. Mikil samstaða er um friðlýsingaráformin innan umhverfisnefndar og það sama virðist vera upp á teningum í bæjarstjórninni, svo ástæða er til bjartsýni.
Vinir Mosfellsbæjar munu að minnsta kosti leggja sitt af mörkum til að þessu dýrmæta svæði verði tryggð viðeigandi vernd svo komandi kynslóðir, bæði dýra og manna, geti notið þess.

Michele Rebora
Aðalmaður Vina Mosfellsbæjar í umhverfisnefnd

Fjölbreyttari ferðamáti

Valdimar Birgisson

Nú þegar farið er að hrinda í framkvæmd samgöngusáttmála höfuðborgarsvæðisins er eðlilegt að deilur um einstaka þætti hennar verði háværari.
Áætlað er að að framkvæmdin kosti 120 milljarða og því eðlilegt að sitt sýnist hverjum. Framkvæmdir hófust í raun 2019 með breikkun Vesturlandsvegar í Mosfellsbæ og Reykjanesbrautar í Hafnarfirði og er áætlað að þeim ljúki 2033 með lagningu Borgarlínu upp í Mosfellsbæ.
Í þessum sáttmála togast á tvö sjónarmið. Annars vegar áhersla á greiðari leið einkabílsins og hins vegar á aðrar samgöngubætur svo sem almenningssamgöngur og fjölgun hjóla- og göngustíga. Fjármagnið skiptist ca 50/50 á milli þessara tveggja áherslna. Greiðari samgöngur og fjölbreyttir ferðamátar.

Af hverju sáttmáli um samgöngur á höfuðborgarsvæðinu? Er eitthvert vandamál til staðar? Jú, það eru í grunninn þrjú vandamál sem þarf að leysa. Í fyrsta lagi þá annar gatnakerfið ekki umferð á háannatíma þegar fólk er að fara í og úr vinnu eins og fólk úr Mosfellsbæ þekkir allt of vel. Í öðru lagi er almenningssamgöngukerfið það ófullkomið að það er ekki raunhæfur valkostur og í þriðja lagi eru hjólastígar annað hvort ekki til eða ekki nothæfir með góðu móti.

En af hverju ekki að nota allt fé í að bæta samgöngur fyrir bíla? Svarið við þessu er að það einfaldlega ekki hægt. Því er spáð að umferð ökutækja, að öllu óbreyttu, muni aukast um 40% á næstu 15 árum. Það gefur því auga leið að það mun ekki vera hægt að anna þeirri aukningu með fjölgun vega þannig að við verðum að beina hluta af umferð annað. Svo er það hreinlega krafa stórs hluta íbúa að boðið sé upp á valkost við einkabílinn.

Fulltrúar Viðreisnar í borgar- og bæjarstjórnum höfuðborgarsvæðisins styðja áform um fjölbreyttari ferðamáta á höfuðborgarsvæðinu svo að val okkar um hvernig við kjósum að haga okkar ferðum verður meira.
Viðreisn styður líka lagningu Sundabrautar til þess að greiða fyrir umferð á svæðinu og létta á umferð í gegnum Mosfellsbæ.

Valdimar Birgisson

Lifandi málaskrá og dagbók – afdrif málsins

Stefán Ómar Jónsson

Á fundi bæjarráðs Mosfellsbæjar þann 30. mars sl. var fyrst á dagskránni mál mitt um „Rafrænan aðgang almennings að málaskrá Mosfellsbæjar“.
Málið er tvíþætt, annars vegar að birta með rafrænum hætti málaskrá stjórnsýslu Mosfellsbæjar og hins vegar að birta dagbók bæjarstjóra.
Í 4. tölublaði Mosfellings þann 1. apríl sl. var gerð ýtarleg grein fyrir aðdraganda og tilgangi þess að ég flutti málið en aðal­atriðið er að gera almenningi kleift að fylgjast með þeim málum sem beint er að stjórnsýslu Mosfellsbæjar og að fá innsýn í dagleg verkefni bæjarstjóra.
Til að upplýsa íbúa Mosfellsbæjar um afdrif málsins er skemmst frá því að segja að málinu var, að tillögu minni, vísað til umsagnar þjónustu- og samskiptadeildar Mosfellsbæjar og er niðurstöðu deildarinnar nú beðið, en um sex vikur eru síðan málið var til afgreiðslu í bæjarráði.
Mikið er talað um að gera almenningi kleift að fylgjast með og hafa innsýn í daglega stjórnsýslu hins opinbera. Aðkoma almennings er stundum bundin í lög og reglur eins og t.d. aðkoma að skipulagsmálum og nú aðgangur að málaskrá Stjórnarráðs Íslands, en annað er valfrjálst eins og til að mynda ofangreint mál mitt.
Hvað varðar Mosfellsbæ er í 1. kafla í Lýðræðisstefnu bæjarins, um stjórnsýslu og gegnsæi, meðal annars talað um að íbúar skuli hafi greiðan aðgang að öllum gögnum sveitarfélagsins. Í því ljósi geri ég ráð fyrir því að þjónustu- og samskiptadeild Mosfellsbæjar muni leggja fram tillögur um með hvaða hætti opna má aðgang að málaskrá Mosfellsbæjar og dagbók bæjarstjóra.

Ég færi öllum íbúum og starfsmönnum Mosfellsbæjar óskir um gleðilegt sumar.

Stefán Ómar Jónsson,
bæjarfulltrúi Vina Mosfellsbæjar.