Eitt af meginverkefnum sveitafélaga eru skipulagsmál. Á vettvangi sveitarstjórnarmála er oft rætt af miklum þunga um mikilvægi þess að skipulagsvaldið sé hjá sveitafélögunum til þess að undirstrika sjálfstæði þeirra við að móta samfélagið eftir vilja þeirra sem það byggja. Samt veltum við skipulagsmálum sjaldnast fyrir okkur nema kannski þegar kemur að því að gera eigi breytingar í okkar næsta umhverfi.
Einn veigamikill þáttur í skipulagi er að móta umhverfið þannig að það stuðli að fjölbreyttu og mannvænu umhverfi. Ein leið að því markmiði er að góð blöndun sé í hverfum með tilliti til aldurs og efnahags þeirra sem þar búa. Þetta getum við gert með því að skipuleggja mismunandi húsagerðir á nýjum byggingarreitum og að bjóða upp á mismunandi búsetuform sem henta mismunandi hópum.

Hamraborgarreitur
Nú er í skipulagsferli svokallaður Hamraborgarreitur sem afmarkast af Langatanga, Bogatanga og bensínstöð Olís. Í þeim tillögum sem liggja fyrir er gert ráð fyrir blandaðri byggð af einbýlishúsum, raðhúsum og fjölbýlishúsum.
Umræddur byggingarreitur er gæddur mörgum kostum m.a. hvað varðar staðsetningu þar sem öll helsta þjónusta og verslun er í göngufæri og stutt er í góðar samgöngur, hver sem ferðamátinn er. Einnig mun fyrirhuguð Borgarlína liggja nálægt skipulagsreitnum. Mikill skortur hefur verið á ódýru og öruggu leiguhúsnæði hér í bæ eins og víðar á landinu fyrir tekjulága einstaklinga og fjölskyldur á vinnumarkaði.

Bjarg íbúðafélag
Í kosningastefnu Samfylkingarinnar fyrir kosningar 2018 lagði flokkurinn áherslu á að samstarf yrði tekið upp við óhagnaðardrifin leigufélög um uppbyggingu leiguíbúða.
Í samræmi við þá áherslu flokksins lagði undirritaður fram tillögu í skipulagsnefnd um að bæjaryfirvöld settu sig í samband við Bjarg íbúðafélag og ræddu hvort hér væri ekki á ferðinni vænlegur kostur til að byggja fjölbýli á þeirra vegum þar sem þeir kostir sem ég hef tiltekið falla mjög vel að hugmyndum félagsins.
Skipulagsnefnd samþykkti einróma að vísa tillögunni til bæjarráðs til skoðunar. Bæjarráð samþykkti að vísa tillögunni til bæjarstjóra til afgreiðslu í tengslum við þau samskipti sem nú eiga sér stað á milli Mosfellsbæjar og Bjargs íbúðafélags varðandi mögulega uppbyggingu í Mosfellsbæ.
Vonandi veit það á gott og áður en langt um líður verði hafist handa við uppbyggingu á góðu og öruggu leiguhúsnæði á vegum Bjargs íbúðafélags fyrir tekjulága íbúa í Mosfellsbæ.

Ólafur Ingi Óskarsson,
áheyrnarfulltrúi S-lista í skipulagsnefnd.

Við getum gert svo ótrúlega margt. Sem barn vildi ég gera svo ótrúlega margt og lifa lífinu, leika mér og sjá heiminn, helst allan í einu.
Það voru ekki allir á því að þetta væri leiðin en ég var alveg með það á tæru hvað ég vildi gera. Það var ekki hægt að vera með eitthvað múður við mig. Það sem ég sá að aðrir vildu var ekki endilega það sem ég vildi og alls ekki vildi ég þrýsta á aðra að gera það sem ég vildi gera. Ég tel alveg fullvíst að börn hafi ekkert breyst hvað þetta varðar.

Hvað hefur þá breyst? Krafan er hugsanlega meiri bæði á börn í skólum og aðstandendur þeirra, foreldra. Hvað ef mamma og pabbi hafa ekki húsnæði? Hvað með vörumerkjasamkeppnina? Hvað með eineltið og þau börn sem hafa ekki sama aðbúnað, öryggi og umhyggju? Hvað er það sem veldur því að tölur Embættis landlæknis sýna að sjálfsvígum ungs fólks á aldrinum 18-29 ára rýkur upp á milli áranna 2019 og 2020? Hvað veldur því að um 17,9 karlar af hverjum 100.000 íbúa á Íslandi völdu sjálfsvíg að meðaltali árlega frá 2011 til 2020 en 5,1 kona? Hvað getum við gert til að búa fólk undir lífið svo það velji ekki að yfirgefa það?

Skólar eru skjól. Því þurfum við að tryggja í framtíðinni að starfsfólk þessara stofnana geti tekist á við vandann, sé með aukna þekkingu á þessu sviði og að umbúnaður skólanna verði bættur til að tryggja að þeir sýni enn betur að þar séu allir velkomnir eins og við vitum að er. Hér í Mosfellsbæ þarf að skoða það alvarlega að búa til fleiri úrræði og bæta við starfsfólki með sérþekkingu. Við búum nú þegar að því að eiga í Mosfellsbæ frábæra kennara og aðra starfsmenn sem gera sitt allra, allra besta. En hvernig getum við bætt í með skynsömum hætti?

Það er spurning hvort samtakamáttur bæjarbúa geti leitt til þess að hér verði sett á laggirnar greiningarmiðstöð fyrir ungmenni og fleiri leiðir verði boðnar börnum í skólakerfinu en aðeins þessi hefðbundna. Í bænum okkar eru fjölmörg fyrirtæki sem starfa á mörgum sviðum. Þar gætu gefist tækifæri til verklegrar kennslu og nýlega hafa framhaldsskólar fengið heimildir til að sjá um kennslu iðngreina og nú jafnframt geta þeir stuðlað að því að koma t.a.m. nemendum í starfsgreinum á samning. Þetta eigum við að kynna í skólum enn meira en áður. Við eigum að dekra meira við börnin okkar og hjálpa forráðamönnum þeirra að gera það líka, auka samveru foreldra og barna í skólunum og sýna virkilega fram á að börn, hvernig sem þau eru af Guði gerð séu velkomin nú sem fyrr. Skólinn er og á að vera börnum skjól. Kennum börnum því að lesa, reikna, leika og lifa.

Sara Hafbergsdóttir, varafulltrúi Miðflokksins
í fræðslunefnd Mosfellsbæjar

Það birtist frétt fyrir nokkru af krökkum í Reykjabyggð í Mosfellsbæ að spila fótbolta með höfuðljós á óupplýstum fótboltavelli.
Þau höfðu sent bæjarráði handskrifað bréf þar sem þau óskuðu eftir lýsingu á völlinn og helst gervigras líka. Þessi frétt barst víða og var meira að segja sýnd í sjónvarpinu í Danmörku. Þessu erindi þeirra var vel tekið í bæjarráði og vísað til umsagnar í stofnunum bæjarins. Það er aðdáunarvert þegar ungir krakkar taka sig til og fara með mál til bæjarráðs og biðja um úrbætur eins og þau gera.

En við ættum öll að biðja um úrbætur því að aðstaða til íþróttaiðkunar er alls ekki nógu góð í Mosfellsbæ og við eigum að gera betur. Það er nokkuð ljóst.

Það er á fjárhagsáætlun fyrir næsta ár að hefja byggingu á félagsaðstöðu við Varmá. Löngu tímabær bygging því það hefur skort félagsaðstöðu og búningsklefa í langan tíma. Það vantar líka ýmislegt annað. Það eru tvær sundlaugar í Mosfellsbæ og hvorug er lögleg keppnislaug. Aðstaða fyrir frjálsar íþróttir hefur drabbast niður vegna þess að viðhaldi hefur ekki verið sinnt. Fótboltinn hefur ekki almennilegan keppnisvöll og vantar svæði til þess að æfa.
Helsta afrek meirihlutans á síðasta kjörtímabili er viðhald á íþróttasal á Varmá sem sami meirihluti hefur látið sitja á hakanum. Það sem var gert á kjörtímabilinu fyrir utan viðhald var bygging á knattspyrnuhúsi sem er mun minna en önnur sveitarfélög hafa verið að byggja og uppsetning á bráðabirgða áhorfendastæði við fótboltavöllinn. Áhorfendasvæðið er sunnan meginn við völlinn þar sem áhorfendur eru með vindinn í fangið og sólina í bakið.
Þetta eru þessi stórkostlegu afrek sem meirihlutinn getur státað sig af. Jú og reddað fjárhag golfklúbbsins. Löngu fyrirséður vandi sem golfklúbburinn var kominn í vegna byggingar golfskálans.

Við þurfum að gera betur. Það þarf að skipuleggja Varmársvæðið til framtíðar. Fjölga völlum á svæðinu og byggja upp aðstöðu fyrir frjálsar íþróttir. Nú hefur verið tekin ákvörðun um að byggja löngu tímabæra félagsaðstöðu og hefst vinna við það á þessu ári. Það verður verkefni næstu bæjarstjórnar sem og að byggja íþróttahús við Helgafellsskóla.

Við þurfum líka að gera betur við að byggja göngu og hjólastíga í nágrenni Mosfellsbæjar. Það er leyndur fjársjóður sem við eigum í náttúrunni í kringum Mosfellsbæ. Þannig opnum við fellin fyrir útivist. Við þurfum að tryggja að aðstaða til hreyfingar og íþrótta fyrir börn, fullorðna, eldri borgara og allra annarra íbúa sé til fyrirmyndar og standa þannig undir nafni sem heilsueflandi samfélag.

Valdimar Birgisson
bæjarfulltrúi Viðreisnar í Mosfellsbæ

Það vill oft verða þegar tekist er á í stjórnmálum að þeir sem takast á eru í raun ekki að tala hver við annan.
Maður sér þetta oft á Alþingi Íslendinga að pólitíkusar eru ekki að reyna að sannfæra hver annan um eigin málstað heldur eru þeir sem tala í raun bara að tala við kjósendur. Ekki er verið að miðla málum til að finna bestu lausnina heldur er áherslan lögð á að klekkja á andstæðingnum. Menntamál eru fyrirferðarmikil í pólitískri umræðu í öllum sveitarfélögum.
Allir hafa skoðun á skólakerfinu og eru umræður oft fyrirferðarmiklar á samfélagsmiðlum og Mosfellsbær er engin undantekning í því. Fræðslunefnd Mosfellsbæjar hefur starfað með ágætum þetta kjörtímabil og málefnaleg umræða verið um öll þau mál sem koma fyrir nefndina. Auðvitað hafa flokkarnir stundum mismunandi áherslur en það er augljóst á því góða fólki sem nú skipar nefndina að allir bera hag skólanna fyrir brjósti. Því hefur andrúmsloft samvinnu og virðingar svifið yfir vötnum á fundum nefndarinnar.
Eitt af stóru verkunum nú undir lok kjörtímabilsins hefur verið að smíða nýja menntastefnu Mosfellsbæjar. Skipuð var fagleg nefnd með fulltrúum allra skólastiga til að vinna þessa vinnu og haldnir hafa verið fjölmargir rýnifundir með hagaðilum til að fá sem flestar raddir til að hljóma. Fundað hefur verið með starfsfólki skóla, með skólabörnum og sérstakur opinn fundur var haldinn með íbúum bæjarins, þar sem allir gátu fengið að tjá sig og koma með hugmyndir. Upp úr þessum fundum hefur nú verið smíðuð menntastefna sem er á lokastigum og verður frábært leiðarljós fyrir skólastarf í bænum.
Á þessu kjörtímabili hefur mikið áunnist í skólamálum. Frábært þróunarstarf í leikskólamálum og fjölgun plássa. Við höfum verið að taka í notkun glæsilegasta skólahús landsins í áföngum og endurbætur á eldra skólahúsnæði hefur verið með þeim hætti að önnur sveitarfélög eru að taka það til fyrirmyndar. Þrátt fyrir það heyrast oft raddir sem reyna að rífa niður þetta ágæta starf og tilgangurinn virðist ekki vera að bæta skólastarfið heldur einungis að koma höggi á stjórnmálamenn. Það er mikilvægt að friður sé um skólastarf á öllum stigum og að ekki sé verið að nota skólamál til að koma pólitísku höggi á andstæðinga með þeim hætti að það bitni á skólunum.
Höldum áfram góðu og uppbyggilegu samtali um skólamál þar sem allar raddir fá að hljóma en hættum skítkasti og skotgrafahernaði.

Valgarð Már Jakobsson, varaformaður
fræðslunefndar Mosfellsbæjar fyrir hönd VG.

Fyrir fjórum árum síðan tók ég þátt í því að koma á laggirnar stjórnmálaflokk hér í Mosfellsbæ, Viðreisn í Mosfellsbæ.
Þátttaka mín í þeirri vegferð kom ekki til af því ég skilgreindi sjálfa mig sem manneskju sem hefði brennandi áhuga á pólitík, heldur kom hún til af einlægri ást minni á bænum mínum – Mosfellsbæ.
Ég var ekkert endilega þeirrar skoðunar að hér væri allt ómögulegt, meira þeirrar skoðunar að það væri hægt að gera betur. Og jafnvel ennþá betur en hafði verið gert.
Það sem hefur komið mér hvað mest á óvart í þessari vegferð sem þetta hefur verið frá síðustu sveitarstjórnarkosningum er hversu ótrúlega gaman þetta hefur verið. Ég hef í gegnum stjórnmálin kynnst ótrúlega fjölbreyttum hópi fólks, en einnig hef ég eignast dýrmæta vini í félögum mínum í Viðreisn.
Það er nefnilega þannig að þátttaka sem þessi getur gefið manni svo margt. Vináttu, reynslu, tækifæri til þess að hafa áhrif, innsýn inn í hið dýrmæta samfélag sem við eigum hér í Mosfellsbæ og margt fleira. Ég er þakklát fyrir þetta og langar til þess að fleiri sem kannski eru núna á sama stað og ég var fyrir fjórum árum taki skrefið og taki þátt.
Ef þú hefur áhuga á því að vera með okkur í málefnavinnunni, ef þú vilt bjóða þig fram á lista hjá okkur, ef þú vilt deila af reynslu þinni, ef þú vilt vita eitthvað meira um félagið, ef þú vilt taka þátt í þessari vegferð með okkur þá hvet ég þig til þess að setja þig í samband við okkur á mosfellsbaer@vidreisn.is, í gegnum facebook síðuna okkar eða í gegnum einhvern af okkar fulltrúum.
Saman getum við nefnilega ennþá gert betur!

Elín Anna Gísladóttir
Formaður stjórnar Viðreisnar í Mosfellsbæ

Sjálfstæðisflokkurinn heldur prófkjör hér í Mosfellsbæ um komandi helgi.
Sjálfstæðisflokkurinn var eina stjórnmálaaflið sem hélt fjölmenn prófkjör í öllum kjördæmum fyrir síðustu alþingiskosningar. Í þeim tóku yfir 20.000 félagsmenn þátt í að stilla upp á lista sem boðnir voru fram í kosningum þar sem Sjálfstæðisflokkurinn náði áfram þeim árangri að vera stærsti flokkurinn á þingi og burðarafl í ríkisstjórn sem hélt velli. Ekkert annað stjórnmálaafl stillir framboðslistum sínum upp með jafn lýðræðislegum hætti og með aðkomu svo stórs hluta kjósenda landsins.
Nú heldur veislan áfram og þér gefst kostur á að velja milli 17 frambærilegra einstaklinga sem allir vilja vinna fyrir þig að því að gera sveitarfélagið okkar framúrskarandi. Að prófkjörinu kemur fjöldi fólks. Auk þeirra 17 sem bjóða sig fram, fjölskyldna þeirra og stuðningsmanna, eru fjölmargir sjálfboðaliðar sem koma að framkvæmd prófkjörsins. Ég þakka ykkur öllum fyrir ykkar framlag.

Kosið um nýjan oddvita
Sitjandi oddviti Sjálfstæðisflokksins og bæjarstjóri Mosfellsbæjar til margra ára, Haraldur Sverrisson, hefur ákveðið að stíga til hliðar. Frá árinu 2007 hefur Haraldur leitt sveitarfélagið og meirihlutasamstarf Sjálfstæðismanna og Vinstri grænna í gegnum margvíslegar áskoranir. Mosfellsbær er vel rekið sveitarfélag þar sem þjónusta sveitarfélagsins mælist með því besta sem gerist á landinu.
Ég vil nota tækifærið og þakka Haraldi fyrir vel unnin störf en honum, ásamt bæjarstjórn og ómetanlegum starfsmönnum bæjarins, hefur tekist að gera þjónustufyrirtækið Mosfellsbæ að því sem það er. Sveitarfélagi sem ávallt kemur vel út í mælingum, sveitarfélagi og samfélagi sem í búar geta verið stoltir af því að tilheyra.
Nú gefst okkur tækifæri til að kjósa nýjan oddvita og vonandi með því nýjan bæjarstjóra beri Sjálfstæðisflokknum áfram gæfa og traust til að stýra sveitarfélaginu okkar. Tækifærið er þitt, íbúi góður, til að taka þátt í að stilla upp öflugum lista sjálfstæðisfólks, fólks sem vill vinna fyrir þig að því að gera bæinn okkar enn betri.
Mættu og taktu þátt í lýðræðisveislunni!

Bryndís Haraldsdóttir
Þingmaður Mosfellinga og fyrrverandi bæjarfulltrúi.

Sjálfstæðisflokkurinn í Mosfellsbæ heldur prófkjör 4.-5. febrúar þar sem kosið verður á lista fyrir bæjarstjórnarkosningar sem fara fram þann 14. maí.
Alls eru 17 glæsilegir frambjóðendur á öllum aldri í boði, 9 konur og 8 karlar. Þetta fólk er hlaðið hæfileikum, með fjölbreyttan bakgrunn, reynslu og þekkingu í farteskinu.
Þessi hópur á það sameiginlegt að hafa brennandi metnað fyrir velferð Mosfellsbæjar og vill leggja sitt af mörkum að gera ánægju íbúa enn meiri og halda áfram þeim fjölmörgu jákvæðu og spennandi verkefnum sem eru í gangi í sveitarfélaginu.

Meirihlutasamstarf D- og V-lista hefur gengið ákaflega vel á þessu kjörtímabili þrátt fyrir ýmsar krefjandi áskoranir. Við höfum náð að uppfylla allflest okkar markmið sem komu fram í málefnasamningi flokkanna og er það gríðarlega ánægjulegt miðað við þær krefjandi aðstæður sem komu upp m.a. tengdar faraldrinum.
Ég er stoltur að vera hluti af þessum öfluga hópi sem hefur myndað meirihlutann á þessu kjörtímabili og hlakka til að halda áfram að sinna mikilvægum verkefnum það sem eftir er þessa kjörtímabils og á næsta kjörtímabili.

Sterkur leiðtogi skiptir máli
Að prófkjöri loknu fer fram vinna við uppstillingu listans fyrir kosningarnar í maí og að því loknu hefst kosningabaráttan. Við munum ganga til kosninga stolt af verkum okkar og bjartsýn á framtíðina og hlökkum til að kynna fyrir Mosfellingum lista flokksins og stefnu, sem mun tryggja að bærinn okkar haldi áfram að blómstra og dafna til lengri og skemmri framtíðar.
Það þarf sterkan reynslumikinn leiðtoga til að leiða það verkefni áfram. Hann þarf að hafa skýra sýn, höfða til sem flestra, vera heiðarlegur og traustur, hafa góða ímynd og orðspor. Víðtæk reynsla mín og þekking sem stjórnandi og leiðtogi í viðskiptalífinu, auk mikillar reynslu af mannauðs- og félagsmálum hafa reynst mér vel í minni vinnu í bæjarstjórn Mosfellsbæjar og munu gera áfram.
Ég er tilbúinn í það hlutverk og að axla þá ábyrgð að leiða listann til sigurs í næstu kosningum og þess vegna býð ég mig fram í 1. sæti á lista Sjálfstæðisflokksins í prófkjöri 4.-5. febrúar næstkomandi og treysti á þinn stuðning í 1. sætið.

Ásgeir Sveinsson
Frambjóðandi í 1. sæti í prófkjöri Sjálfstæðisflokksins í Mosfellsbæ.