Fjölbreyttari ferðamáti er allra hagur

Valdimar Birgisson

Við erum sjálfsagt öll orðin langþreytt á þeim umferðarteppum sem myndast á álagstímum til og frá Mosfellsbæ.
Það er fátt leiðinlegra en að þurfa að bíða í endalausri bílaröð þegar hægt væri að nýta tímann í eitthvað annað. Samgönguframkvæmdir á höfuðborgarsvæðinu hafa verið of litlar í langan tíma og afleiðingin er þessi. Við þurfum að hanga í bílum til þess að komast til vinnu og svo aftur heim. Það var fyrirséð að umferð myndi aukast með auknum fólksfjölda og tilraunir með að fá fólk til þess að nota almenningssamgöngur hafa verið veikburða og ekki skilað tilætluðum árangri.
Nú er hins vegar farið að hylla undir breytingar. Verið er að hrinda í framkvæmd samgöngusáttmála höfuðborgarsvæðisins þar sem ríki og bæjarfélög sameinast um að leysa þennan vanda.
Fjármagnið skiptist c.a. 50/50 á milli almenningssamgangna og umferðarmannvirkja annars vegar og göngu- og hjólastíga hins vegar.
Við í Viðreisn leggjum áherslu á að jafnframt verði hafist handa við lagningu Sundabrautar sem allra fyrst. Það mun létta á umferð um Mosfellsbæ og minnka umferðartafir í Ártúnsbrekku, sem hefur bein áhrif á umferð úr Mosfellsbæ.
En af hverju ekki að nota allt fé í að bæta samgöngur fyrir bíla? Svarið við þessu er að það einfaldlega ekki hægt.
Því er spáð að umferð ökutækja, að öllu óbreyttu, muni aukast um 40% á næstu 15 árum. Það gefur því auga leið að það mun ekki vera hægt að anna þeirri aukningu með fjölgun vega eða akreina þannig að við verðum að beina hluta af umferð annað. Svo er það hreinlega krafa stórs hluta íbúa að boðið sé upp á valkost við einkabílinn.

Bættar almenningssamgöngur og fjölgun á göngu- og hjólreiðastígum mun leiða til þess að fólk hafi meira val um að velja sér ferðamáta. Viðreisn styður áform um fjölbreyttari ferðamáta á höfuðborgarsvæðinu.

Valdimar Birgisson

Fólk eða flokka í bæjarstjórn?

Anna Sigríður Guðnadóttir

Það er stundum sagt og skrifað að stjórnmálaflokkar séu til óþurftar. Má skilja á stundum að stjórnmálafólki sem starfar innan stjórnmálaflokka sé ekki treystandi til að starfa af heilindum að hagsmunum bæjarbúa.
Í síðasta Mosfellingi birti bæjarfulltrúi framboðsins Vinir Mosfellsbæjar grein þar sem fram kom sú skoðun að óháður bæjarlisti þar sem einungis hagsmunir bæjarbúa ráði för eigi fullt erindi í Mosfellsbæ. Nú ætla ég ekki að dæma um það hvaða flokkar eða framboð eiga erindi í bæjarstjórn, það er kjósenda að ákveða það. Ég vil hins vegar draga fram af hverju það er kostur að þeir aðilar sem bjóða sig fram og setjast við bæjarstjórnarborðið séu hluti stjórnmálahreyfingar með skýr stefnumið.

Á hverju byggjum við okkar störf?
Við sem störfum í bæjarstjórn og nefndum bæjarins í nafni Samfylkingarinnar vinnum að sjálfsögðu af fullum heilindum að hagsmunum bæjarfélagsins og íbúa þess. En á hverju byggjum við þær ákvarðanir sem við tökum? Við byggjum þær á stefnu flokksins sem við störfum innan, jafnaðarstefnunni. Okkar starf miðar að því að efla velferðarsamfélagið með frelsi, jafnrétti, samábyrgð og réttlæti að leiðarljósi. Leiðarljósið er þessi öfluga stjórnmálastefna sem norræn velferðarsamfélög eru reist á. Þetta eru grunngildi Samfylkingarinnar.
Á sveitarstjórnarstigi er veitt sú þjónusta og teknar flestar þær ákvarðanir sem hafa hvað mest áhrif á daglegt líf og lífsgæði íbúa, á hvaða aldri sem þeir eru. Gott samfélag verður til þegar allir íbúar fá tækifæri til að taka virkan þátt í samfélaginu og enginn er skilinn eftir, þar sem íbúar upplifa frelsi, samstöðu og samhygð.

Áskoranir framtíðar
Við sem samfélag stöndum frammi fyrir áður óþekktum áskorunum. Það eru áskoranir í umhverfismálum, velferðarmálum og atvinnumálum sem við verðum að bregðast við á markvissan og öflugan hátt. Þessum áskorunum verður ekki mætt á fullnægjandi hátt nema með aðkomu sveitarfélaga og samstarfi sveitarfélaga. Þess vegna er mikilvægt að í sveitarstjórnum sitji fólk með framtíðarsýn sem byggist á stefnu um jöfn tækifæri allra, stefnu um heilbrigt og öflugt atvinnulíf sem gengur ekki á rétt komandi kynslóða um heilnæmt umhverfi og sjálfbæra nýtingu auðlinda. Fólk sem lítur fyrst og fremst til velferðar barna og fjölskyldna í öllum sínum störfum.

Framtíðarákvarðanir
Á hverju fjögurra ára kjörtímabili koma upp ýmis álitaefni og mál til afgreiðslu í bæjarstjórn sem ómögulegt er að sjá fyrir í kosningabaráttu eða í upphafi tímabilsins. Það að kjörnir fulltrúar séu hluti stjórnmálahreyfingar með heildstæða stefnu um uppbyggingu velferðarsamfélags fyrir okkur öll, hefur forspárgildi um á hverju ákvarðanir síðar á kjörtímabilinu verði byggðar. Í tilfelli bæjarfulltrúa Samfylkingarinnar verða þær byggðar á jafnaðarstefnunni, stefnunni um velferðarsamfélagið sem byggist á jöfnuði og réttlæti.

Anna Sigríður Guðnadóttir,
oddviti framboðslista Samfylkingarinnar.

Skarhólabraut í Mosfellsbæ

 

Sveinn Óskar Sigurðsson

Í gegnum árin hefur verið fjallað á margvíslegan þátt um stytting einn hér í Mosfellsbæ sem ber heitið Skarhólabraut sem liggur frá Vesturlandsvegi, fram hjá slökkvistöðinni í bænum, upp með Úlfarsfellinu og yfir í Reykjahverfi.
Fallegt íbúðahverfi hefur mótast á þessu svæði og þar er að finna göturnar Aðaltún, Lækjartún, Hamratún, Hlíðartún og Grænumýri. Steinsnar þar hjá er iðnaðarhverfið við Flugumýri og Desjamýri.
Auglýst hefur verið deiliskipulag á svæðinu. Íbúum og fjárfestum hefur verið kynnt það ítrekað þegar á að fjárfesta á svæðinu og við önnur tilefni. Finna má deiliskipulagið á kortavef Mosfellsbæjar og þar sagt að það hafi verið samþykkt í bæjarstjórn 12. mars 2008 og er því nýlega orðið 14 ára gamalt. Það er önnur saga og óljós.
Eftir stendur undirritað skjal af þáverandi bæjarritara Mosfellsbæjar sem liggur á kortavef bæjarins og hefur ítrekað verið kynnt, t.a.m. í október 2007 í auglýsingu í Morgunblaðinu, þá sem „skematísk“ mynd, þar sem auglýstar voru atvinnuhúsnæðislóðir. Var myndin af Skarhólabrautinni eins og framangreint deiliskipulag gerir ráð fyrir, þ.e. með eyjum og öllu tilheyrandi.
Síðan eru þær lóðir allar seldar og búið að byggja á þeim, starfsemi einnig hafin. En Skarhólabrautin hefur vart tekið nokkrum breytingum og alls ekki í samræmi við það deiliskipulag sem kynnt hefur verið og liggur enn á kortavef bæjarins.
Frábær fyrirtæki eru á þessu svæði þar sem Skarhólabraut liggur um. Þar eru starfandi aðilar sem hafa metnað og vilja búa í góðri sátt við alla í bæjarfélaginu og umhverfið sitt. Enn er verið að selja lóðir upp með allri Desjamýrinni og umferðin um svæðið eykst.
Stórvirkar vinnuvélar eru á förum þarna fram og til baka og stórir flutningabílar fara þarna um sem þarf að þjónusta í einu stærsta og metnaðarfyllsta bifreiðaverkstæði landsins sem er komið á svæðið.
Íbúarnir á svæðinu þurfa að þola ágang þessara tækja illu heilli því Skarahólabrautin, sem á að beina umferð inn á iðnaðarsvæðið og fram hjá íbúabyggð, hefur ekki verið fullunnin. Skarhólabraut er illa fær bæði stórum og minni ökutækjum. Vegna þessa aka þessi tæki fremur um Flugumýri og fram hjá íbúðarbyggðinni þar. Þetta boðar ekki gott.
Í greinum að undanförnu hef ég fjallað um brotin loforð meirihlutans í Mosfellsbæ. Má þar m.a. finna brot á eigin málefnasamningi þessa meirihluta. Þar er af nógu að taka. Skarhólabrautin átti að hafa verið komin í gagnið fyrir margt löngu. Hvað tefur? Þetta snýr ekki aðeins að þjónustu við þá sem hafa þarna fjárfest heldur einnig að öryggismálum, loftslagsmálum og loforðum sem þessum aðilum hafa verið gefin sem þarna starfa og búa.

Sveinn Óskar Sigurðsson,
bæjarfulltrúi Miðflokksins í Mosfellsbæ.

Er gott að vera eldri borgari í Mosó?

Kolbrún Jónsdóttir

Í sumar eru fyrirhugaðar miklar byggingaframkvæmdir að Eirhömrum og Hömrum í Mosfellsbæ. Sennilega hefjast þessar framkvæmdir í júlí, jafnvel fyrr.
Það á að byrja á að byggja tengibyggingu ofan á elstu og best byggðu eininguna á Eirhömrum. Í þessari einingu eru 6 íbúar í jafn mörgum íbúðum og okkur hefur verið gert að flytja út, tæma íbúðirnar alveg. Þessar framkvæmdir geta tekið ca. tvö ár, en Eir segist munu sjá um flutninginn og útvega okkur íbúðir á þeirra vegum, enginn kostnaður af okkar hálfu, bara ótrúlega mikil fyrirhöfn. Ef við flytjum í dýrari íbúð en þá sem við erum í, þá borgum við ekki meira fyrir þá íbúð, en samt bara meðan á framkvæmdum stendur.

Fyrirhugað er að byggja 4-5 hæða blokk við Bjarkarholt, samtals um 100 íbúðir, síðan á að byggja nokkrar hæðir ofan á Hamra. Á meðan verðum við sexmenningarnir annars staðar, kannski á Eirhömrum, Eirborgum, í Spönginni eða Eir í Grafarvogi. Hljómar spennandi …?
Ég verð að viðurkenna að mér hrýs hugur við að fara að pakka niður þegar ég hef loksins klárað að koma mér fyrir hérna. Þegar ég flutti úr Miðholtinu eftir 24 ár, þá hélt ég að sá pakki væri búinn, en nei, aldeilis ekki.

En Mosfellsbær þarf ekki að hafa áhyggjur af okkur, bærinn er löngu búinn að afsala sér eldriborgararéttindum til Eirar. Við borgum mismunandi háa leigu til Eirar, td. er leigan fyrir 60 fermetra íbúð núna „aðeins“ 250 þús. á mánuði. Innifalið í því er rekstrargjald sem er mismunandi hátt eftir íbúðum.
Ljótt að segja það, en Mosfellsbær er ekki til staðar fyrir okkur. Því miður.

Ég vona að ég sé ekki að fara með neinar rangar staðreyndir í þessari litlu grein. Þetta er bara það sem okkur hefur verið sagt um áformin. Ég hef ekki verið í samráði við aðra sem þurfa að flytja.
Mér bara ofbýður.

Kolbrún Jónsdóttir

Kosningavor

Bjarki Bjarnason

Á almennum félagsfundi VG í Mosfellsbæ, sem haldinn var 12. mars sl., var framboðslisti félagsins í komandi kosningum samþykktur einróma. Listann skipa 22 einstaklingar, í samræmi við fjölgun bæjarfulltrúa úr 9 í 11.

Við erum afar þakklát fyrir það traust sem okkur er sýnt við að leiða listann, hann er skipaður einstaklingum úr ýmsum stéttum samfélagsins, þeir hafa svipuð lífsviðhorf þar sem félagslegt jafnrétti, samfélagsleg ábyrgð og umhverfismál eru sett á oddinn.

VG hefur starfað í meirihluta bæjarstjórnar á þessu kjörtímabili; á því tímaskeiði hefur fjölmargt áunnist, má þar nefna byggingu Helgafellsskóla, byggingu knatthúss á Varmársvæði sem var vígt haustið 2019, unnið hefur verið markvisst að friðlýsingu Leiruvogs og afar vönduð umhverfisstefna bæjarins verið samþykkt. Um leið og við horfum stolt um öxl lítum við til framtíðar, hafin er stefnumótunarvinna hjá VG-Mos fyrir komandi kosningar og mun niðurstaða þeirrar vinnu birtast í stefnuskrá framboðsins.

Kolbrún Ýr Oddgeirsdóttir

Veturinn hefur verið óvenju rysjóttur að þessu sinni og veður bæði grimm og dimm á köflum. En senn snúum við baki við vetrinum og vorið tekur við – það verður kosningavor. Að þessu sinni verður það ekki einungis grænt – heldur vinstri grænt!

Bjarki Bjarnason, skipar 1. sæti V-lista.
Kolbrún Ýr Oddgeirsdóttir, skipar 2. sæti V-lista.

Viðreisn setur þjónustu við fólk í fyrsta sæti

Valdimar Birgisson

Fyrir fjórum árum stofnuðum við nokkrir félagar í Viðreisn félag í Mosfellsbæ og hófum undirbúning að framboði fyrir sveitastjórnarkosningarnar vorið 2018.

Við veltum því vandlega fyrir okkur hvort við ættum að blanda okkur í þennan slag, hvort við ættum brýnt erindi við kjósendur og hvort við gætum látið gott af okkur leiða til að gera mannlífið betra og rekstur sveitarfélagsins skilvirkari og opnari.
Niðurstaða okkar var sú að okkar hugmyndir um framfarir hér í bæ og stefna Viðreisnar um að setja almannahagsmuni framar sérhagsmunum ættu sannarlega erindi við kjósendur.

Það sem við settum á oddinn voru lýðræðislegar umbætur og ábyrgð í fjármálum. Við vildum komast að til þess að breyta. Ekki til þess að gera einhvern að bæjarstjóra sem gekk með það í maganum eða til höfuðs bæjarstjóra. Við kærðum okkur kollótt um slíkt. Við vildum einfaldlega þjóna bæjarbúum og gera betur.

Við náðum þeim árangri að vera með næstflest atkvæði af þeim átta framboðum sem buðu fram og höfum því undanfarin fjögur ár átt bæjarfulltrúa í bæjarstjórn Mosfellsbæjar og fulltrúa í nefndum sveitarfélagsins.
Við höfum unnið eftir þeim áherslum sem við settum okkur í upphafi og teljum líkt og fyrir fjórum árum að breytinga sé þörf í Mosfellsbæ og því er þörf á frjálslyndu afli í stjórn Mosfellsbæjar.

Okkar áherslur undanfarin fjögur ár markast helst af því að við höfum veitt meirihlutanum aðhald með því að gera kröfur um fagleg vinnubrögð og gagnsæja stjórnsýslu.
Við höfum lagt áherslu á málefni barna og fjölskyldna með því að minna stöðugt á að stjórnsýslan snýst um að veita þeim þjónustu sem þurfa á að halda.

Okkar markmið er að komast í meirihluta þannig að áherslur okkar fái enn meira vægi í stjórnun bæjarins og vonumst við eftir því að kjósendur veiti okkur það brautargengi í næstu kosningum. Við setjum þjónustu við fólk í fyrsta sæti.

Valdimar Birgisson,
bæjarfulltrúi Viðreisnar.

Velferð og þjónusta í Mosfellsbæ

Jana Katrín Knútsdóttir

Orðið velferð þýðir samkvæmt íslenskri nútímamálsorðabók að „einhverjum farnist vel“.
Samkvæmt lögum ber stjórnvöldum að tryggja velferð sinna þegna og markmið þeirrar velferðarþjónustu sem Mosfellsbær veitir ætti því að vera að auka lífsgæði og stuðla að því að allir íbúar Mosfellsbæjar eigi kost á að lifa með reisn. Velferð skarast á svo mörgum sviðum samfélagsins en hér verður aðeins tæpt á fjölbreyttum þörfum barna, fjölskyldna og einstaklinga á öllum aldri.
Innan skólakerfisins er í dag, sem aldrei fyrr, þörf á hæfu og reyndu starfsfólki sem hefur metnað fyrir því sem það er að gera. Einnig þarf að tryggja að stoðþjónusta sé til staðar, á réttum tíma og á réttum stað. Öðruvísi getur ekki farið fram faglegt og gott starf sem stuðlar að menntun, þroska og velferð nemenda. Kennarar og aðrir sem starfa með börnum (s.s. í frístund eða tómstundastarfi) eru að veita þjónustu sem oft er langt umfram „hefðbundna“ kennslu.
Kennarar í dag vinna að því alla daga að vinna traust sinna nemenda, lesa í þarfir hvers og eins og með lausnamiðuðum hætti finna leið fyrir hvern einstakling að námi og árangri. Stuðningur við heimili er einnig umfangsmikill þáttur í starfi kennarans ekki síst í vaxandi fjölbreytileika samfélagsins. Í einhverjum tilfellum gegna þeir jafnvel því hlutverki að uppfylla þarfir, sem nemendur fá ekki uppfylltar á sínu heimili.
Aðstoð og þjónusta við fatlað fólk og eldri borgara á eigin heimilum og á stofnunum eru líka hluti velferðarþjónustu hvers sveitarfélags.
Ef standa á við alþjóðlegar skuldbindingar sem Ísland hefur gengist við og uppfylla lög um mannréttindi og réttinn til heilsu þá er mikilvægt bjóða upp á búsetu við hæfi og að veita viðeigandi þjónustu á öllum stigum. Þannig er hægt að tryggja að það fjármagn sem veitt er til þessarar þjónustu nýtist sem best.
Störf sem þessi krefjast mikils af þeim sem þeim sinna. Það er staðreynd að þeir sem starfa í nánum og krefjandi mannlegum samskiptum eru í aukinni hættu á kulnun í starfi með tilheyrandi neikvæðum afleiðingum á heilsu og lífsgæði en ekki síður afleiðingum fyrir gæði þeirrar þjónustu sem er veitt. Starfsumhverfi, samskipti, stuðningur, stjórnun og stjórnsýsla hefur mikil áhrif á þessa þætti og því mikilvægt að rýna í og skoða hvort þar sé gert eins vel og hægt er.
Margoft hefur verið bent á að ekki hafi verið rétt gefið þegar þessi þjónusta fluttist frá ríki til sveitarfélaga og vissulega eru sveitarfélögin bundin af kjarasamningum þessara stétta, en við þurfum að horfa á allt þetta umhverfi með gagnrýnum huga og skoða hvort gera megi betur.

Jana Katrín Knútsdóttir
Höfundur er í 2. sæti á lista Sjálfstæðisflokksins fyrir komandi sveitarstjórnarkosningar

Af því að það skiptir máli

Aldís Stefánsdóttir

Tilvera okkar er full af áreiti og álitaefnum. Til dæmis hvort maður eigi að bjóða sig fram til setu í sveitastjórn eða ekki.
Það eru ótrúlega margar ástæður fyrir því að gera það ekki. Trúið mér, ég er búin að fara yfir þær allar. En á endanum varð niðurstaðan sú að ég vil leggja mitt af mörkum. Mér finnst skipta máli hverjir stjórna og hvernig er stjórnað. Það er pláss við borðið fyrir fjölbreyttar skoðanir og það er mikilvægt að nýjar raddir fái að heyrast.

Við búum í samfélagi sem hefur alla burði til að geta þróast með kröfum nútímans og svarað kalli framtíðarinnar.
Þjónusta sveitarfélaga er gríðarlega mikilvæg og snertir hvert einasta heimili. Þegar þjónusta er þróuð, skipulögð og veitt skiptir mestu máli að hlusta á þá sem þiggja hana og ennfremur þá sem veita hana. Ég tel að reynsla mín og þekking á starfsemi sveitarfélagsins geri mig að góðum hlustanda.

En það er ekki nóg að hlusta og hafa skoðanir. Það þarf líka að hafa reynslu og þekkingu til að greina aðalatriði frá aukaatriðum, kunna að afla sér upplýsinga og síðast en ekki síst að hafa nægilegan styrk til að geta tekið góðar ákvarðanir. Ég trúi því að áralöng reynsla í krefjandi verkefnum á vinnumarkaði geri mig hæfa til ákvarðanatöku.

Mosfellsbær hefur allt til að bera til að vera fyrirmyndarsveitarfélag. Það er mikilvægt að við leyfum okkur að hugsa stórt og hugsa lengra. Okkar bíða áskoranir við að byggja upp Mosfellsbæ framtíðarinnar.
Eftirköst heimsfaraldursins, mótttaka og aðlögun innflytjenda, áhrif loftslagsbreytinga, breytt aldurssamsetning þjóðarinnar, frekari uppbygging íbúðarhúsnæðis, fjölgun íbúa og efling innviða. Þetta eru áskoranir sem við sem samfélag stöndum frammi fyrir bæði til lengri og skemmri tíma. Það er af nægu að taka.

Ég er tilbúin að leggja mitt af mörkum og hlakka mikið til að heyra hvað brennur á íbúum í bænum. En svona verkefni vinnur enginn einn. Það skiptir máli að vera í góðum hópi fólks og eiga góða að.
Framsókn í Mosfellsbæ er fjölbreyttur og hæfileikaríkur hópur fólks sem brennur fyrir því að auka velferð í samfélaginu okkar og treystir sér til að hlusta á íbúa og taka góðar ákvarðanir.

Þetta verður eitthvað!

Aldís Stefánsdóttir

Mosfellsbær – bærinn minn og þinn

Ragnheiður Ríkharðsdóttir

Öflugt atvinnulíf er forsenda verðmætasköpunar og á sama hátt er traustur og ábyrgur rekstur hvers sveitarfélags undirstaða velferðar borgaranna og góðrar þjónustu við þá.
Við Sjálfstæðismenn höfum alltaf lagt áherslu á að fara vel með fjármuni til þess að geta eflt enn frekar góðar stofnanir bæjarins í að veita sem besta þjónustu.
Þjónusta í þína þágu, kæri Mosfellingur, hefur alltaf verið markmið bæjarfulltrúa Sjálfstæðisflokksins og það markmið verður áfram okkar leiðarstef.

Ég er stolt af því að búa í Mosfellsbæ og kalla mig Mosfelling. Nálægðin við ósnortna náttúru og víðátta móta sérstöðu bæjarins.
Við sem höfum valið að búa hér lítum á Mosfellsbæ sem valkost númer eitt hjá fólki sem kýs sambýli við náttúruna og fallegt umhverfi frekar en ys og skarkala borgarinnar. Þess vegna þarf að halda í þessi ómetanlegu gæði og vanda vel skipulag bæjarins inn í framtíðina til þess að tryggja að hér verði áfram betra að búa en annars staðar. Öflugir inniviðir eru fjárfesting til framtíðar fyrir íbúa Mosfellsbæjar.

Mosfellsbær er sannarlega útivistar– og íþróttabær. Öflugt íþrótta– og æskulýðsstarf hrífur til sín fólk á öllum aldri, styrkir það félagslega og líkamlega og vekur okkur öll til umhugsunar um gildi góðrar hreyfingar og holls lífernis.
Traustur rekstur er grundvöllur þess að hægt sé að byggja íþróttamannvirki s.s. íþróttahús, sundlaugar, knattspyrnu-, golf- og reiðvelli, göngu-, hjóla- og reiðstíga. Við viljum vinna með íþróttafélögum og bæjarbúum að framtíðarsýn þessara mála.

Í Mosfellsbæ eru öflugir leik– og grunnskólar sem hafa á að skipa frábæru fagfólki og það er metnaðarfullt markmið að vilja verða leiðandi í skólastarfi. En til þess að svo megi verða þarf að auka enn frekar sjálfstæði skólanna því rannsóknir sýna að það skilar sér í betra námi fyrir nemendur og meiri starfsánægju innan skólanna.
Okkar markmið eru skýr, við viljum samráð og samvinnu við skólasamfélagið og foreldrafélögin með hagsmuni barnanna okkar að leiðarljósi. Þess vegna er mikilvægt að hér verði áfram traustur og skilvirkur rekstur bæjarsjóðs.

Í bænum okkar, Mosfellsbæ, þar sem allir skipta máli, viljum við Sjálfstæðismenn tryggja öruggan, ábyrgan og skilvirkan rekstur.
Við viljum veita íbúum á öllum aldri framúrskarandi þjónustu og við viljum opin samskipti við íbúa bæjarins um málefni sem snerta okkur öll.

Kæri Mosfellingur, ég segi XD fyrir enn betri bæ, XD fyrir fólk eins og þig og mig og vona að þú viljir verða mér samferða.

Ragnheiður Ríkharðsdóttir

Skipulagsvald sveitarfélaga

Ólafur Ingi Óskarsson

Skipulagsmál eru eitt þeirra lögbundnu verkefna sem sveitarfélögum ber að sinna. Með skipulagsvaldinu er kjörnum fulltrúum gert kleift að móta ásýnd og umhverfi sveitarfélagsins og setja fram framtíðarsýn um uppbyggingu innan þess.

Aðalskipulag – deiliskipulag
Stóra myndin í hverju sveitafélagi er sett fram í aðalskipulagi sem er stefnumótun til lengri tíma og ber að endurskoða með reglubundnum hætti. Allt annað skipulag, s.s. rammaskipulög og deiliskipulög sveitarfélaga, þarf að taka mið af aðalskipulagi.
Nú er það svo að borgir og bæir eru sjaldnast byggðir að fullu í einu lagi. Bæir stækka oftast jafnt og þétt eftir því sem íbúum fjölgar og atvinnulífið blómstrar. Því eru óbyggð landsvæði deiliskipulögð í samræmi við aðalskipulag sveitarfélagsins. Eins getur það hent að eldri deiliskipulög séu tekin upp og þeim breytt til þess að mæta breyttum þörfum eða áherslum.
Það er því hverju sveitarfélagi mikilvægt að hafa mótað sér stefnu í skipulagsmálum sem fyrst og fremst tekur mið af þörfum íbúa, núverandi sem og væntanlegra, og framtíðarsýn um þróun samfélagsins. Uppbyggingarreitir á nýju eða áður skipulögðu landi taki síðan mið af þeirri stefnu og framtíðarsýn.

Skipulag á forsendum hverra?
Í Mosfellsbæ er því þannig háttað að mestallt land er í einkaeigu eða á forræði lóðarhafa sem leigja það af bæjarfélaginu. Eðlilega vilja þeir sem með þessi réttindi fara hámarka þann arð sem þeir geta haft af uppbyggingu þar.
Hagsmunir þeirra aðila þurfa þó ekki endilega að fara saman við hagsmuni meginþorra íbúanna.
Uppbyggingu í bæjarlandinu á ekki að vera stýrt á forsendum verktaka, lóðarhafa eða landeigenda heldur forsendum okkar íbúanna sem munum búa hér áfram með okkar fjölskyldum.
Það er því mjög mikilvægt að skipulagsvaldinu sé beitt með þeim hætti fyrir núverandi íbúa og þá sem seinna koma að bærinn okkar haldi sínum einkennum, bjóði upp á fjölbreytt byggðamynstur, þróist í takt við nýjar áskoranir, stuðli að félagslegri blöndun og fjölskylduvænu umhverfi í tengslum við okkar dásamlegu náttúru. Að þessu munum við jafnaðarmenn stefna og berjast fyrir almannahagsmunum gegn sérhagsmunum nú sem fyrr.

Ólafur Ingi Óskarsson, skipar 2. sæti
á framboðslista Samfylkingarinnar

 

Samtalið gerir Mosfellsbæ að betri bæ

Hilmar T. Guðmundsson

Fólk talar saman af ýmsum ástæðum. Við deilum upplýsingum til að gera okkur lífið auðveldara, eflum félagsleg tengsl okkar við aðra og samtalið gerir okkur kleift að hafa áhrif á hvernig aðrir upplifa okkur.
Löngunin í að hafa samskipti er forrituð í okkur öll. Við getum bara ekki þagað endalaust. Við tölum um veðrið og hvað á að vera í matinn í kvöld en mest þó um það sem aðrir eru að tala um.

Samtöl okkar á milli tryggja að við skiljum hvert annað, við erum stödd á sömu plánetu. Við hefjum yfirleitt samræður til að efla félagsleg tengsl og einnig af einskærri forvitni. Þetta á líka við á netinu. Fólk uppfærir stöðu sína til að skapa tengsl, jafnvel þegar fólk er landfræðilega fjarlægt.
Stöðuuppfærslur innihalda oft félagslegar ábendingar eða spurningar og fólk bregst oft við með því að „líka við” eða skrifa athugasemdir. Ekki vegna þess að því líkar við efnið heldur vegna þess að það vill senda frá sér einföld skilaboð til að ýta undir áhuga þinn á málefninu.
Í mörgum tilfellum er svo samtalið sem kemur í kjölfar stöðuuppfærslu mun mikilvægara eða skemmtilegra en stöðuuppfærslan sjálf.

Þó að fólk tali saman til að gera líf sitt auðveldara, til að mynda félagsleg tengsl og til að hjálpa öðrum, eru flest samtöl okkar eins konar markaðssetning á okkur sjálfum.
Við upphefjum okkur sjálf með því að segja frá persónulegri upplifun okkar eða jafnvel slúðra um hver sé að gera hvað með hverjum. Yfirleitt er aðeins örlítill hluti gagnrýni eða neikvæðni. Langflest þessara samtala eru jákvæð þar sem við erum alltaf að passa upp á okkar ímynd.
Sjálfsmynd okkar mótast stöðugt af samtölunum sem við eigum við aðra. Hvort sem þú vilt eða ekki er gildum okkar og skoðunum deilt áfram, út frá fyrri samtölum við fjölskyldu, vini og frá fólkinu sem þú hittir, jafnvel örstutt á förnum vegi eða þú rekst á á rafrænni götu.

Gerum Mosfellsbæ betri með því að tala saman. Heilsumst út á götu, köstum kveðju á aðra í heita pottinum, gefum jákvæða strauma á netmiðlum.
Tökum þátt í samtalinu en virðum skoðanir annarra og veljum að taka það samtal sem okkur líður best með.
Geymum gargið og hávaðann innra með okkur á meðan við vinnum úr því og eyðum síðan orkunni sem myndast í eitthvað jákvætt.

Hilmar T. Guðmundsson.
Höfundur er í 9. sæti á framboðslista Framsóknar í Mosfellsbæ.

Látum kerfin ekki þvælast fyrir okkar veikasta fólki

Valdimar Birgisson

Einn mælikvarði á velsæld þjóða er hvernig komið er fram gagnvart þeim sem veikust eru. Hvernig til tekst að skapa þeim eins gott líf og aðstæður leyfa hverju sinni. Flest erum við sammála um að þetta er markmið sem við eigum að setja okkur. En hvernig tekst okkur til?

Ríkið vill spara sér fé til hjúkrunarheimila
Samkvæmt lögum skipta ríki og sveitarfélög með sér verkum við þjónustu fyrir veika, fatlaða og aldraða. Skipting á því hver sér um hvað er bundin í lög. Þannig er starfsemi hjúkrunarheimila á forræði ríkisins. Hins vegar hefur það atvikast þannig að sveitarfélög víða um land hafa tekið að sér að reka hjúkrunarheimili og gert samning um þann rekstur við ríkið til að flýta fyrir uppbyggingu þeirra. Það á t.d. við hér í Mosfellsbæ þar sem bærinn er ábyrgur fyrir rekstri hjúkrunarheimilisins Hamra. Mosfellsbær hefur líkt og fleiri sveitarfélög deilt við ríkið um framlög til reksturs þessara heimila.
Ríkið skammtar of lítið fé til þess að veita veikasta fólkinu okkar á hjúkrunarheimilum mannsæmandi þjónustu, það er öllum ljóst. Þannig hafa sveitarfélög verið nauðbeygð til þess að nota útsvarstekjur til þess að brúa bilið. Þrátt fyrir að ríkisstjórnin hafi lofað því að styrkja rekstrargrundvöll hjúkrunarheimila hefur biðin eftir efndum verið löng. Biðin bitnar á öldruðu og mjög veiku fólki.

Aldraðir í tómarúmi
Þjónusta við aldraða skiptist á milli sveitarfélaga og ríkisins þannig að ríkið sér um heilbrigðisþjónustu en sveitarfélög sjá um aðra nauðsynlega þjónustu fyrir aldraða. Ódýrast og best er að hjálpa fólki að búa heima hjá sér eins lengi og unnt er. Fyrir fólk fylgir því í flestum tilfellum aukin lífsgæði að fá að vera lengur heima hjá sér.
Til að fólk geti verið lengur heima þarf að vera fyrir hendi þétt samstarf við heilsugæslur um nauðsynlega samþættingu heimahjúkrunar og heimaþjónustu. Þarna þarf samstarf ríkis og sveitarfélaga að vera öflugra. Þetta er nauðsynlegt að laga.

NPA samningar stranda á ríkinu
Málefni fatlaðra eru hins vegar á forræði sveitarfélaga sem fá framlög úr framkvæmdasjóði fatlaðra til þess að fjármagna þá þjónustu. Ein af þeim þjónustum sem fötluðu fólki stendur til boða eru NPA samningar en það er skammstöfun fyrir notendastýrða persónulega aðstoð. Fólk sem þarf á aðstoð að halda getur þannig gert samninga um þjónustu. Það stýrir því sjálft hvar það fær aðstoð, hvenær, hvernig og hver aðstoðar.
Slíkir samningar eru fyrir fólk sem þarf töluverða aðstoð í daglegu lífi og skiptir sköpum að þessi aðstoð sé veitt. Sveitarfélög kosta þessa þjónustu á móti ríkinu sem borgar 25%. Ríkið hefur hins vegar takmarkað fjölda samninga sem gerðir eru og afleiðingin af því er að sveitarfélög hafa hætt að gera fleiri samninga þar til ríkið stendur við sitt. Félagsmálaráðherra þarf að gera betur. Þetta bitnar á fötluðum.

Lögum kerfin
Fólk á ekki að vera fórnarlömb kerfislægs vanda í samskiptum ríkis og sveitarfélaga. Við sem erum kosin á Alþingi og í sveitarstjórnir eigum að gera betur og laga þetta kerfi. Það skiptir fólk sem notar þjónustuna eða borgar fyrir hana ekki máli úr hvaða vasa er borgað heldur að þjónustan verði veitt með skilvirkum hætti þannig að velsæld fólks verði hámörkuð.
Það þarf skýrari verkaskiptingu á milli ríkis og sveitarfélaga. Ríkið þarf að veita meira fé í hjúkrunarheimili. Sveitarfélög þurfa meira fé til þess að sinna öldruðum heima og að uppfylla skyldur sínar gagnvart fötluðu fólki. Ég mun gera að forgangsmáli á næsta kjörtímabili að laga þessi kerfi.

Valdimar Birgisson,
bæjarfulltrúi Viðreisnar.

Væringar á vígstöðvum

Sveinn Óskar Sigurðsson

Eftir að úrslit prófkjörs lágu fyrir hér í Mosfellsbæ nýlega virðist sem að upp á yfirborðið hafi leitað sjóðheit mál sem virðast hafa kraumað lengi undir niðri. Hér er um innanbúðarátök að ræða.
Okkur sem sitjum í bæjarstjórn Mosfellsbæjar var gert að tryggja í upphafi kjörtímabilsins að rétt kynjahlutföll yrðu að vera jöfn í ráðum og nefndum Mosfellsbæjar. Hneykslast var á því í upphafi kjörtímabilsins að bæjarfulltrúi Miðflokksins hafi ætlaði að tilnefna konu í fræðslunefnd. Hafði formaður nefndarinnar á orði að það gengi ekki að Miðflokkurinn tilnefndi konu þar sem Sjálfstæðisflokkurinn væri með tvær konur sem aðalmenn af 5 í nefndinni og Viðreisn eina. Það gengi því alls ekki að það væru of margar konur í nefndinni.

Í janúar, nánar tiltekið 6. janúar sl., barst oddvita Miðflokksins í Mosfellsbæ árétting frá Jafnréttisstofu þess efnis að fyrir næstu kosningar ætti að „viðhalda jöfnu kynjahlutfalli í bæjar- og borgarstjórnum ásamt því að minna á mikilvægi fjölbreytileika.“
Það er rétt að taka undir þetta en í sama erindi var fjallað um hvatningabréf frá Kvenréttindafélagi Íslands sem er sagt vera hluta af herferðinni og verkefni sem tilheyrir Byggðaáætlun ríkisins. Með þetta í veganesti í upphafi kjörtímabils, bæði fyrir sveitarstjórnarkosningarnar 2018 og nú 2022, er mikilvægt að huga að breytingum. En hvað gerðist á kjörtímabilinu?

Í fyrsta lagi virðist sem einn íþróttafrömuður í Mosfellsbæ vilji ekki annan íbróttafrömuð í forystu hjá Sjálfstæðisflokknum. Í annan stað var formanni bæjarráðs Mosfellsbæjar vikið til hliðar á miðju kjörtímabilinu, þ.e. því sem senn er á enda. Við það fór forysta Sjálfstæðisflokksins og Vinstri hreyfingarinnar græns framboðs gegn áréttingum Jafnréttisstofu enda er nú bæjarstjórinn karl, formaður bæjarráðs karl og forseti bæjarstjórnar líka karl.
Ekki ætla ég að útlista mig sérstaklega hvort þetta sé gott en vegna bæði samsetningar á pólitískum flokkum og einstaklingum þarna tel ég þetta öllu verra en t.d. ef einn karlinn væri úr Miðflokknum, a.m.k. hefur oddviti þess flokks einhverja innsýn inn í jafnréttismálin.

Í málefnasamningi Sjálfstæðisflokksins í Mosfellsbæ og Vinstri hreyfingarinnar græns framboðs kemur fram að „D- og V-listi vilja stuðla að efla jafnrétti í öllum birtingamyndum þess orðs.“ Niðurstaða þessara framboða virðist ítrekað benda til brota á eigin loforðum en í upptalningu í málefnasamningnum kemur einnig fram að það eigi að „horfa til jafnréttissjónarmiða í allri ákvarðanatöku sveitarfélagsins.“
Það er því spurning hvort framboðum, sem hafa starfað lengi saman en fara lítt eftir eigin áformum, sé treystandi til að stjórna Mosfellsbæ næstu misserin. Það þarf að gæta festu við stjórn sveitarfélaga og jafnréttis.

Sveinn Óskar Sigurðsson,
oddviti Miðflokksins í Mosfellsbæ og bæjarfulltrúi allra Mosfellinga.

Farsæll grunnskóli

Anna Sigríður Guðnadóttir

Grunnskólarnir okkar eru ein megin samfélagsstoðin í bænum okkar. Öll höfum við gengið í skóla og vitum hversu mikilvægt hlutverk grunnskólanna er í fræðslu, uppvexti og félagslegri mótun barna.
Grunnskólinn hefur tekið geysilegum breytingum og framförum undanfarna áratugi frá því rekstur skólanna var fluttur frá ríki til sveitarfélaganna árið 1996. Við flutninginn var gert samkomulag milli sveitarfélaga og ríkisins um hvernig fjármagna skyldi reksturinn og hvaða upphæðir væri um að ræða. Allar götur síðan hefur verið deilt um hvort rétt hafi verið gefið í því spili.

Skóli margbreytileikans
Grunnskólinn hefur tekið mjög miklum breytingum á þeim tíma sem rekstur hans hefur verið á höndum sveitarfélaganna. Þar ber einna hæst stefnu stjórnvalda um skóla án aðgreiningar. Í skóla án aðgreiningar á að vera pláss fyrir öll börn og þau eiga að fá þá þjónustu sem þau þurfa til að þroska hæfileika sína.
Börnin eiga að fá aðstoð við að finna fjölina sína og skólinn á að útvega þeim þær bjargir sem þeim eru nauðsynlegar til að ná þeim markmiðum sem stefnt er að. En erum við að veita þá þjónustu sem börnin eiga skilið?

Kennarar og aðrir sérfræðingar
Kennarar eru sérfræðingar í kennslu og miðlun þekkingar og búa yfir gríðarlegri sérþekkingu á sínu sviði. Skóli margbreytileikans gerir mjög ríkar kröfur til kennara um að mæta öllum nemendum þar sem þeir eru staddir og veita öllum börnum þær bjargir sem þau þurfa til að uppfylla þær kröfur sem skólinn setur fram. En enginn kennari er sérfræðingur í öllu sem viðkemur börnum og þeim fjölbreytilegu þörfum sem þau hafa.
Til að búa börnum okkar sem vænlegust skilyrði til vaxtar og þroska þarf að fjölga öðrum sérfræðingum innan skólakerfisins til að starfa við hlið kennaranna. Ef við viljum að skóli án aðgreiningar nái markmiðum sínum verður að fjölga fagfólki með fjölbreytta þekkingu inni í skólunum. Til dæmis ættu þroskaþjálfar, talmeinafræðingar, iðjuþjálfar og sálfræðingar að vera hluti af starfsliði skólanna í ríkari mæli til að styðja við það starf sem sérfræðingar í kennslu stýra svo hvert barn fái sem besta möguleika á að þroska sína styrkleika. Með því að grípa þau börn sem það þurfa snemma og veita þeim þá þjónustu sem þau þurfa tímanlega er verið að fyrirbyggja vandamál síðar meir og leggja inn fyrir farsæld á fullorðinsaldri.

Fjármögnun og farsæld
Um hvað snúast sveitarstjórnarmál í grunninn? Þau snúast um þjónustu við íbúana, að íbúar fái þá þjónustu sem þeir þurfa á að halda þegar hennar er þörf. Ekki síst á þetta við um þjónustu við börn þar sem hvert ár er óendanlega mikilvægt í þroskaferli þeirra.
Það er skylda sveitarfélaga að búa þannig að skólastarfi að það uppfylli þarfir barnanna og stuðli að farsæld þeirra. Það er verkefni næstu bæjarstjórnar Mosfellsbæjar, í samstarfi við önnur sveitarfélög, að halda áfram að þrýsta á ríkisvaldið um að styrkja tekjustofna sveitarfélaganna þannig að þeim sé gert kleift að uppfylla margbreytilegar þarfir barna í skóla án aðgreiningar sem er jú stefna stjórnvalda.

Anna Sigríður Guðnadóttir,
bæjarfulltrúi Samfylkingarinnar.

Að rækta garðinn sinn

Bjartur Steingrímsson

„Maður verður að rækta garðinn sinn“ sagði Birtíngur í lok samnefndrar bókar eftir Voltaire. Það er hægt að leggja margs konar merkingu í þessi orð, en ein túlkun er sú að hver og einn beri ábyrgð á því að skapa sína eigin paradís í samspili við nærumhverfi sitt og samferðamenn.
Ef Mosfellsbær er okkar heimili þá mætti segja að fellin í kringum okkur, heiðarnar, skógarnir, árnar og vogarnir séu okkar garður og höfum við bæjarbúar skyldu til að rækta hann svo hann verði sem blómlegastur.

Eitt af höfuðeinkennum Mosfellsbæjar hefur verið hugmyndin um „sveit í borg“ og spila fyrrnefnd náttúra og víðerni þar höfuðhlutverk. Aðdráttarafl Mosfellsbæjar fyrir öllum þeim sem vilja njóta útivistar og óspilltrar náttúru er skýrt enda fjölgar bæjarbúum dag frá degi og færri komast að en vilja. Slíkri uppbyggingu og fólksfjölgun fylgja áskoranir, en jafnframt tækifæri til að hugsa hlutina upp á nýtt og gera betur. Þétting byggðar, stuðningur við fjölbreytta samgöngumáta, rík áhersla á lýðheilsu og útivist og grænar áherslur í skipulagi eru meðal atriða sem núverandi meirihluti bæjarstjórnar hefur horft til í uppbyggingu bæjarins. Það er mikilvægt að sú uppbygging verði framsækin og umhverfismiðuð, en einnig í samræmi við þann bæjarbrag sem við höfum notið hingað til, svo að við glötum ekki því sem gerði bæinn okkar svo eftirsóttan til að byrja með.

Það hefur ýmislegt áunnist í umhverfismálum í Mosfellsbæ á liðnu kjörtímabili sem við getum verið stolt af. Ný og róttæk umhverfisstefna Mosfellsbæjar var gefin út árið 2019 sem markaði skýra sýn í umhverfisvernd, sjálfbærri landnýtingu, fræðslu og úrgangsmálum svo fátt eitt sé nefnt. Á kjörtímabilinu átti umhverfisnefnd bæjarins frumkvæði að því að stækka friðland við Varmárósa til að vernda enn fremur viðkvæmt votlendi og stefnt er að því í samstarfi við Reykjavíkurborg að friðlýsa Leiruvog og og Blikastaðarkró. Ef það heppnast mun Mosfellsbær hafa komið að því að friða alla þá ósnertu strandlengju og hafsvæði sem bærinn á land að fyrir komandi kynslóðir til að njóta. Í samstarfi við fyrirtækið Resour­ce International mun Mosfellsbær hefja reglubundnar loftgæðamælingar innan bæjarmarkanna á næstu misserum. Það er stöðug vinna að styðja við fjölbreytta og umhverfisvæna samgöngumáta, en bærinn hefur sýnt þann stuðning í verki með samstarfi um Borgarlínu og áframhaldandi uppbyggingu göngu- og hjólastíganets í bænum.

Umhverfis og loftslagsmál eru og munu halda áfram að vera stærsta staka áskorun og áhyggjuefni nútíma samfélags. Það þarf engan að undra sem hefur rætt þann málaflokk við yngri kynslóðir okkar. Liðinn er sá tími að umhverfismál og umhverfisvernd séu einungis til punts, nú er það okkur beinlínis nauðsyn að finna sjálfbærari leiðir til að lifa á þessari jörð og nýta hana. Eitt brýnasta verkefni stjórnvalda er að finna leiðir til að virkja hvern og einn einasta einstakling í því verkefni. Sveitarfélagið sem minnsta lýðræðislega stjórnsýslueiningin er kjörinn vettvangur fyrir slíkt, en hvar byrjar sú vinna ef ekki í skólunum, í lífi og leik út í náttúrunni, í umræðum við kvöldverðarborðið?
Það er hagur okkar allra að Mosfellsbær sé til fyrirmyndar í umhverfismálum, og að okkur bæjarbúum sé kleift að taka sem virkastan þátt í því verkefni. Þannig getum við haldið áfram að rækta garðinn okkar, svo að vist þeirra sem á eftir komi verði ávallt örlítið farsælli.

Bjartur Steingrímsson,
formaður Umhverfisnefndar Mosfellsbæjar fyrir hönd Vinstri Grænna.