Hilmar Gunnarsson ritstjóri Mosfellings.

Bæjarblaðið Mosfellingur hefur verið gefið út frá árinu 2002. Nú eru öll tölublöð frá upphafi aðgengileg á timarit.is en það er Landsbókasafn Íslands – Háskólabókasafn sem rekur vefinn.
Mosfellingur gerði samning við Landsbókasafnið í vetur um varðveislu alls efnis á timarit.is og hefur sú vinna staðið yfir ásamt skönnun á elstu tölublöðunum.
Nú eru hátt í 300 blöð Mosfellings aðgengileg á stafrænu formi á vefnum.

Öflug leitarvél á vefnum
„Við erum að skrifa hina nýju sögu Mosfellsbæjar,“ segir Hilmar Gunnarsson ritstjóri Mosfellings. „Það er ánægjulegt að blöðin séu komin í trausta varðveislu og aðgengileg öllum hvenær sem er. Þetta eru miklar og sögulegar heimildir bæði í texta og myndum síðastliðin 17 ár.“
Öflug leitarvél er á vefnum og hægt er að prenta út valdar síður. Notendur geta leitað í gagnagrunninum að efni sér til fróðleiks og skemmtunar.

Yfir 8.000 blaðsíður í stafrænu formi
„Blaðsíður Mosfellings á timarit.is telst okkur að séu komnar yfir 8.000 talsins þannig að það má alveg gleyma sér yfir þeim.
Auk frétta úr bæjarlífinu hverju sinni eru viðtöl Ruthar Örnólfsdóttur, Mosfellingurinn, nú orðin 200 og Heilsumolar Gaua, Guðjóns Svanssonar að verða 100 talsins. Þá eru gömlu myndirnar í umsjón Birgis D. Sveinsson orðnar óteljandi og allar myndirnar hans Ragga Óla ómetanlegar, svo eitthvað sé nefnt,“ segir Hilmar.
Framvegis verða blöðin uppfærð á nokkurra mánaða fresti eftir því sem tækifæri gefst til. Einnig má minna á heimasíðu blaðsins www.mosfellingur.is þar sem finna má vefútgáfu af nýjasta tölublaði Mosfellings auk þess sem birtar eru helstu fréttir úr blaðinu á vefsíðunni.

—-

Tímarit.is er stafrænt safn sem veitir aðgang að milljónum myndaðra blaðsíðna á stafrænu formi af þeim prentaða menningararfi sem varðveittur er í blöðum og tímaritum. Aðgangur er öllum opinn og stuðst er við nýjustu tækni í geymslu og miðlun upplýsinga.

Kristín tekur við viðurkenningunni úr höndum Ólafar Sívertsen verkefnisstjóra Heilsueflandi samfélags.

Heilsudagurinn í Mosfellsbæ var haldinn 27. maí. Dagurinn hófst með morgungöngu og endaði með málþingi í Listasalnum.
Sölvi Tryggvason fjölmiðlamaður hélt fyrirlestur og Gulrótin var afhent.
Gulrótin er lýðheilsuviðurkenning sem ætlað er að hampa einstaklingi, hópi, fyrirtæki eða stofnun fyrir brautryðjendastarf í þágu heilsueflingar og bættrar lýðheilsu íbúa Mosfellsbæjar.
Það eru Heilsuvin og Mosfellsbær sem standa að baki viðurkenningunni sem felur í sér þakklæti fyrir frumkvæði og störf í anda lýðheilsu og á jafnframt að vera hvatning til allra á þessum vettvangi í bæjarfélaginu.

Leikur að læra og Morgunfuglar
Þetta er í þriðja sinn sem viðurkenningin er veitt en hana hafa hlotið Svava Ýr Baldvinsdóttir íþróttakennari sem hefur m.a. séð um Íþróttaskóla barnanna hjá Aftureldingu í fjöldamörg ár og hjónin Guðjón Svansson og Vala Mörk hjá Kettlebells Iceland.
Í ár það Kristín Einarsdóttir, íþróttakennari, sem hlýtur viðurkenninguna fyrir óendanlegan drifkraft og frumkvæði að aukinni hreyfingu barna og fullorðinna í gegnum kennsluaðferðina „Leikur að læra“ og skokkhópinn Morgunfuglana.
Í rökstuðningi með tilnefningunni segir að hún hafi unnið ötullega að því að innleiða kennsluaðferðina Leikur að læra í leik- og grunnskóla á Íslandi. Aðferðin nýtir hreyfingu og leik markvisst í námi barnanna og miðar að því að efla líkamlega, andlega og félagslega vellíðan þeirra. Hún hefur síðustu ár haldið úti námskeiðum í aðferðinni fyrir kennara á Spáni og eru þeir ófáir kennarnir sem hafa nýtt sé þau.
Ekki nóg með það heldur hefur hún einnig haldið úti hlaupahópnum Morgunfuglunum hér í Mosfellsbæ.

Verkfræðistofan EFLA hefur lokið vinnu við heildarúttekt á öllu húsnæði Varmárskóla en verkfræðistofan hefur á síðustu tveimur árum unnið þrjár úttektir fyrir Mosfellsbæ á rakaskemmdum.
Niðurstöður sýnatöku EFLU gefa til kynna að almennt sé ástand húsnæðis Varmárskóla gott og jafnvel betra en sambærilegur húsakostur af sama aldri. Ekki er þörf á bráðaaðgerðum né lokun skólans en úrbóta er þörf og að hluta til umfram það sem þegar hefur verið ákveðið. Þetta kemur fram í tilkynningu frá Mosfellsbæ.
Lagt er til að unnið verði að því að fjarlægja á nokkrum afmörkuðum stöðum rakaskemmd byggingarefni innandyra samhliða endurbótum á ytra byrði yngri deildar sem boðnar voru út í vor. Framkvæmdir eru við það að hefjast.

Endurnýjun á elstu húshlutum
Áður en EFLA lauk við heildarúttektina lágu fyrir áform um endurbætur á elstu húshlutum Varmárskóla og hófust þær framkvæmdir við skólaslit Varmarskóla.
Endurnýja á hluta þakefna og glugga auk múrviðgerða og málunar. Innandyra þarf að fara í úrbætur sem Efla leggur til þar sem rakaskemmd byggingarefni verða fjarlægð, steinslípað, hreinsað og málað.
Miðað er við að verktakar með sértæka þekkingu á vinnubrögðum við viðgerðir á rakaskemmdu húsnæði verði fengnir í verkefnið. Stærri aðgerðum á veðurkápu húsanna hefur verið áfangaskipt og forgangsraðað til næstu þriggja ára í samræmi við niðurstöður fyrirliggjandi úttekta.
Við þessa vinnu er mikilvægt að horfa til framtíðar varðandi endingu hins endurnýjaða húshluta og mæta kröfum byggingarreglugerðar í dag.

Ástand húsnæðis Varmárskóla sambærilegt eða betra en búast mátti við
Í heildarúttekt EFLU kemur fram að það er helst eldri hluti skólans sem þarfnast endurbóta. Ráðgjafar EFLU taka fram í niðurstöðum sínum að alltaf megi búast við að finna svæði með rakaskemmdum í eldra húsnæði en nú sé hins vegar þekking til staðar til að greina slík svæði og því hægara um vik að bregðast við áður en í óefni er komið.
Að mati EFLU hafa þær aðgerðir og endurbætur sem farið hafa fram síðustu tvö ár skilað Varmárskóla betri húsakosti. Enn eru þó nokkur viðfangsefni til staðar og heildarúttektin er góð leiðsögn um æskileg næstu skref.
Niðurstöður EFLU má bæði nýta til forgangsröðunar aðgerða og til leiðbeiningar um verklag við endurbæturnar. Lagt er til að forgangur verði settur í að bæta innivist og aðstöðu nemenda og starfsfólks.

Kynning heildarúttektarinnar
Samkvæmt upplýsingum frá Mosfellsbæ voru helstu niðurstöður heildarúttektar EFLU kynntar fyrir skólastjórum Varmárskóla, starfsmönnum skólans og stjórnendum Mosfellsbæjar sl. föstudag.
Skýrsla EFLU verður kynnt í bæjarráði þann 13. júní og skólasamfélaginu í heild þann 19. júní kl. 18.00 á opnum fundi í Varmárskóla sem jafnframt verður streymt á YouTube rás Mosfellsbæjar.
„Mosfellsbær fagnar því að heildarúttekt EFLU staðfesti að ástand húsnæðis Varmárskóla er almennt gott og jafnvel betra en við mátti búast. Við sinnum okkar húsnæði af kostgæfni og fylgjum góðum ráðum EFLU um æskileg næstu skref.
EFLA hefur nú veitt okkur leiðbeiningar um áherslur næstu mánaða og Mosfellsbær mun bregðast við þessum niðurstöðum af festu og einurð og hér eftir sem hingað til tryggja nemendum og starfsmönnum heilsusamlegt starfsumhverfi,“ segir Haraldur Sverrisson bæjarstjóri Mosfellsbæjar.

Niðurstaðan skýr
„Við starfsmenn Varmárskóla fengum kynningu á niðurstöðum heildarúttektar EFLU síðasta föstudag og hlökkum til að vinna með þeim og umhverfissviði Mosfellsbæjar að endurbótum á húsnæði skólans nú í sumar. Niðurstaðan er skýr um að hvorki reyndist þörf á bráðaaðgerðum né lokun skólans og okkar verkefni er að bæta við þeim úrbótaverkefnum sem ekki eru á áætlun sumarsins. Ég vona eindregið að allir aðilar geti sammælst um þau mikilvægu verkefni,“ segir Þórhildur Elfarsdóttir skólastjóri Varmárskóla.

Ærslabelgur mun rísa á Stekkjarflöt og búið verður til skíða- og brettaleiksvæði í Ævintýragarðinum í Ullarnesbrekkum í kjölfar íbúakosninga um verkefni í lýðræðisverkefninu Okkar Mosó. Íbúar kusu einnig meðal annars að fá flokkunarruslafötur, merkja toppa bæjarfella og fjalla og bætta lýsingu á göngustígum.
Metþátttaka var í kosningum sem stóðu frá 17. til 28. maí eða 19,1% sem er mesta þátttaka sem hefur verið í sambærilegum kosningum á Íslandi.
Alls hlutu 11 hugmyndir brautargengi en 35 milljónum verður varið í framkvæmd verkefnanna. Framkvæmd þeirra hefst í sumar en lýkur haustið 2020.

Kosningaþáttaka aukist töluvert
Tæplega 1.800 manns tóku þátt í kosningunni sem er 19,1% Mosfellinga 15 ára og eldri. Um 61% þátttakenda voru konur, tæplega 39% karlar. Þegar reiknað er út hlutfall þátttakenda innan hvers aldursbils sem kaus kemur í ljós að þátttakendur á aldrinum 31−40 ára voru fjölmennastir eða 32%.
Síðast þegar kosið var í Okkar Mosó árið 2017 tóku 14% íbúa 16 ára og eldri þátt í kosningunum. Síðan hefur bæði fjölgað talsvert í bæjarfélaginu en einnig voru fleiri á kjörskrá í ár vegna lækkaðs kosningaaldurs. Þátttaka hefur því aukist talsvert.

11 hugmyndir kosnar til framkvæmda
1 – Ærslabelgur settur upp á Stekkjarflöt.
2 – Skíða- og brettaleiksvæði í Ævintýragarðinum í Ullarnesbrekkum
3 – Flokkunarruslafötur settar upp á þremur stöðum við göngustíga
4 – Merkingar á toppum bæjarfella og fjalla
5 – Betri lýsing á göngustíg milli Hulduhlíðar 30−32
6 – Miðbæjartorgið gert skemmtilegt með leiktækjum
7 – Ungbarnarólur fyrir yngstu börnin í Hagaland og Leirvogstungu
8 – Hvíldarbekkir og lýsing meðfram göngustígum við Varmá
9 – Kósý Kjarni – notalegri aðstaða til samvista
10 – Lýsing sett upp á malarstíg frá Álafosskvos að brú við Ásgarð
11 – Fræðsluskilti með sögu Álafossverksmiðjunar sett upp í Kvosinni

Anna Greta Ólafsdóttir hefur verið ráðin sem skólastjóri Varmárskóla tímabundið til eins árs. Anna Greta hefur kennaramenntun og leyfisbréf til kennslu á grunnskólastigi, hefur lokið meistaranámi á sviði stjórnunar og hefur þekkingu á áætlunargerð, fjármálstjórnun og stefnumótunarvinnu. Anna Greta hefur reynslu af stjórnun menntastofnana en hún hefur gegnt stöðu skólastjóra við tvo grunnskóla, starfað sem kennari og stýrt menningarviðburðum.

Anna Greta tekur við starfi skólastjóra yngri deildar Varmárskóla 1. ágúst nk. og mun gegna því starfi til 1. ágúst 2020. Þóranna Rósa skólastjóri Varmárskóla lætur af störfum í lok sumars og tekur við Rimaskóla.

StephenLockhart og Gunnhildur Edda Guðmundsdóttir skipuleggja hátíðina.

Dagana 13.-15. júní fer fram metal-tónlistahátíðin Ascension MMXIX í Hlégarði í Mosfellsbæ. Á hátíðinni munu koma fram um 30 hljómsveitir, bæði erlendar og innlendar.
Það eru Mosfellingarnir Gunnhildur Edda Guðmundsdóttir og Stephen Lockhart sem standa fyrir viðburðinum. Þetta er í fyrsta sinn sem hátíðin er haldin með þessu sniði en þau hafa þrisvar áður haldið sambærilega tónlistarhátíð undir nafninu Oration í Reykjavík við góðan orðstír.
Edda er menntaður hönnuður og hefur starfað mikið við verkefnastjórnun. Stephen starfar sem hjóðupptökumaður og rekur hljóðstúdíóið Studio Emissary í Mosfellsbæ.
„Upphafið að þessu tónleikahaldi má eiginlega rekja til þess að ég var að taka upp fyrir bæði erlendar og innlendar hljómsveitir og langaði að halda viðburð fyrir þær. Þetta var fjótt að vinda upp á sig og í ár koma um 30 hljómsveitir fram og við búumst við að það verði uppselt. Sérstaða okkar er að yfir 60% af tónlistargestum eru útlendingar,“ segir Stephen.

Hlégarður passar fullkomlega
„Við erum rosalega ánægð að halda tónlistahátíðina hér í Mosó. Hlégarður passar fullkomlega utan um viðburðinn. Við höfum fengið mjög jákvæð viðbrögð bæði frá Mosfellsbæ og íbúum.
Við hlutum menningarstyrk frá Mosfellsbæ og það er okkar von að hátíðin setji skemmtilegan svip á bæinn. Það er mikið skipulag og utanumhald um viðburð sem þennan og til að mynda eru rútuferðir úr miðbænum alla dagana í tengslum við tónleikahaldið,“ segir Edda.

Miðasala í fullum gangi
Allar upplýsingar um tónlistarhátíðina má finna á heimasíðunni www.ascensionfestivaliceland.com og kaupa miða á tix.is.
„Það er enn hægt að fá miða en við hvetjum þá sem hafa áhuga að tryggja sér miða sem fyrst. Það verður ekki hægt að kaupa miða á einstaka tónleika, einungis er hægt að kaupa passa sem gildir alla dagana,“ segir Edda sem er spennt og þakklát.

—–

30 hljómsveitir komar fram:
• Above Aurora (PL/IS)
• Akhlys (US)
• Akrotheism (GR)
• Antaeus (FRA)
• Almyrkvi (IS)
• Aoratos (US)
• Auroch (CAN)
• BÖLZER (CH)
• Carpe Noctem (IS)
• Common Eider, King Eider (US)
• Drab Majesty (US)
• Gost (US)
• Jupiterian (BRA)
• Kaleikr (IS)
• Kælan Mikla (IS)
• King Dude (US)
• Misþyrming (IS)
• Mitochondrion (CAN)
• Naðra (IS)
• NYIÞ (IS)
• THE ORDER OF APOLLYON (FR)
• Rebirth of Nefast (IRL/IS)
• Sinmara (IS)
• SÓLSTAFIR (IS)
• Svartidauði (IS)
• Treha Sektori (FR)
• Tribulation (Official) (SE)
• Vástígr (AT/IS)
• Wolvennest (BE)
• Zhrine (IS)

Á 40 ára afmælishátíð skólakórs Varmárskóla veitti foreldrafélag Varmárskóla Guðmundi Ómari Óskarsyni kórstjóra og tónmenntakennara sérstök heiðursverðlaun fyrir ötult og óeigingjarnt starf við tónlistarkennslu og eflingu tónlistar í skólastarfinu.

Órjúfanlegur hluti af skólastarfinu
Guðmundur Ómar eða Ómar eins og flestir kalla hann hóf störf sem tónmenntarkennari við Varmárskóla árið 1979 og sama ár hófst reglubundið kórstarf sem hefur alla tíð síðan verið undir hans stjórn. Tónlist Ómars hefur verið órjúfanlegur hluti af skólastarfinu og hann komið að tónlistaruppeldi fjölda Mosfellinga.
Í gegnum árin hefur skólakórinn komið fram víða bæði innanlands og utan en tónleikarnir í Guðríðarkirkju voru síðustu opinberu tónleikar kórsins undir stjórn Ómars þar sem hann lætur nú af störfum eftir 40 ára farsælan feril. Síðasta verkefni Ómars verður að leiða kórinn í söngferð til Spánar í júní.

Farsæll og árangursríkur ferill
Inga Elín Kristinsdóttir leirlistarkona og einn af bæjarlistamönnum Mosfellsbæjar var fengin til samstarfs um hönnun á heiðursverðlaunum foreldrafélagsins sem veitt eru starfsmanni skólans sem á að baki langan, farsælan og árangursríkan starfsferil. Sigríður Ingólfsdóttir afhenti Ómari verðlaunin fyrir hönd foreldrafélagsins á afmælishátíð skólakórsins og henni til aðstoðar voru kórfélagarnir Valgerður Kristín Dagbjartsdóttir og María Qing Sigríðardóttir. Er þetta í fyrsta sinn sem heiðursverðlaun foreldrafélags Varmárskóla eru veitt og er Ómari óskað innilega til hamingju með heiðurinn.