Ástríða mín liggur í að miðla tónlist

Berglind Björgúlfsdóttir tónlistarmiðlari og frumkvöðull segir tækifærin til að mennta og efla ungviðið liggja í náttúrutengingunni.

Hún er söngkona, kennari, tónlistarmiðlari og frumkvöðull og hefur víðtæka menntun og reynslu af tónlistaruppeldi með börnum og fjölskyldum. Hún hefur stjórnað fjölmörgum barnakórum, haldið tónleika víða um heim og námskeið hennar vekja ávallt mikla lukku. Það sem hún tekur sér fyrir hendur gerir hún með mikilli næmni, hún helgar rýmið og spinnur töfraþráðinn þar sem náttúran ræður ríkjum.
Hún stofnaði fyrirtækið Samleikur.is árið 2019 og býður upp á hin ýmsu Uku­lele-námskeið ásamt því að sjá um sérsniðna viðburði fyrir fyrirtæki og hópa. Konan sem um ræðir heitir Berglind Björgúlfsdóttir.

Berglind fæddist í Reykjavík 7. október 1965. Foreldrar hennar eru þau Pálína Jónsdóttir og Björgúlfur Þorvarðarson en þau eru bæði menntuð kennarar. Berglind á fjögur systkini, Þorvarð f. 1962, Bergstein f. 1963, Sigurbjörgu f. 1970 og Bjarka f. 1974.

Lærðum að vinna í sveitinni
„Ég átti mér sumar- og vetrarhaga eins og Samarnir í Norður-Skandinavíu. Ég ólst upp í Garðabænum en var svo farin í sveitina í Rangárvallasýslu í maí ár hvert til að hjálpa til í sauðburði, reka beljur, raka og sæta tún. Í sveitinni upplifði ég mikið frelsi og var mikið út í náttúrunni með mínu fólki. Ég fékk næði til að dunda, rannsaka, skapa, veiða og síðast en ekki síst að umgangast húsdýrin. Í sveitinni lærðum við líka að vinna.“

Ef væri ég söngvari syngi ég ljóð
„Ég var nemandi í Barnaskóla Garðahrepps sem nú heitir Flataskóli og fór þaðan­ í Garðaskóla. Allt skapandi skólastarf og íþróttir höfðuðu til mín. Mér gekk vel í því sem ég hafði áhuga á, „þar er allur sem unir“, eins og máltækið segir“.
Ég man eftir fyrsta tónlistartímanum, átta ára gömul, hjá Guðmundi Norðdal tónmenntakennara. Við sungum, „Ef væri ég söngvari syngi ég ljóð, um sólina vorið og land mitt og þjóð“. Þetta er sterk minning og lýsir svolítið mér og mínu lífi“.
Ég byrjaði níu ára í Skólakór Garðabæjar og söng þar hjá Guðfinnu Dóru kórstjórnanda fram undir menntaskólaárin. Fimleikar voru mér hugleiknir og ég stundaði þá hjá Fimleikafélaginu Björk. Ég þurfti svo að velja á milli fimleikanna og söngsins og söngurinn varð fyrir valinu“.

Á nokkra óvenjulega titla
Berglind hefur sterkar skoðanir á menntun og námsumhverfi og vill ekki vera stimpluð eða skilgreind eftir þeim menntastofnunum sem hún hefur sótt en gaf mér samt innsýn í mennta- og atvinnuveginn.
Eftir skólaskyldu fór hún í Menntaskólann í Reykjavík og lauk stúdentsprófi frá fornmáladeild. Á sumrin starfaði hún sem umsjónarmaður skólagarðanna í Garðabæ og á Vífilsstaðaspítala. Hún hélt síðan í Iðnskólann í Reykjavík og lærði tækniteiknun því hún ætlaði sér að verða arkitekt. Leiðin lá svo í Kennaraháskólann með myndmennt sem aðalfag.
Hún lauk 7. stigs söngprófi frá Tónlistarskóla Garðabæjar árið 1991 og meistaragráðu í listkennslufræðum frá Listaháskóla Íslands árið 2015.
Í nokkur ár starfaði hún á Stöð 2, meðal annars sem þula. Berglind gengur einnig undir nöfnunum, kálkonan og fuglakonan og þykir vænt um þá titla.

Áttum góð ár í Bandaríkjunum
„Ég giftist Sigurði Frey Björnssyni sumarið 1991 og um haustið fórum við í nám til Bandaríkjanna. Hann fór að læra kvikmyndagerð og ég fór í söngnám. Ég sótti tíma hjá óperudívu í San Francisco sem kenndi Belcanto söngtækni. Ég lauk BA prófi í söng 1994 frá Mills College.
Við Sigurður áttum saman góð ár í Bandaríkjunum og þar eignuðumst við dætur okkar þær, Brynhildi f. 1997 og tvíburana, Önnu Pálínu og Ólöfu Pálínu f. 2000. Árið 2005 héldum við fjölskyldan heim til Íslands, við vildum ala dætur okkar upp hér heima.“

Þetta eru einstök lífsgæði
„Það var stutt í náttúruna í Garðbænum í vetrarhögum æsku minnar. Mosfellsbær minnir mig á æskuslóðirnar, sveit í bæ, en hingað fluttum við fjölskyldan árið 2006.
Það eru ómetanleg þessi náttúrutengsl í nærumhverfinu, þetta eru einstök lífsgæði sem ekki allir búa við. Ég var ekki flutt inn þegar ég var farin að skipta mér af umhverfismálum í bæjarfélaginu. Stóð meðal annarra fyrir því að stofna Varmársamtökin og var formaður þeirra fyrstu árin.
Við Sigurður lögðum okkur fram í að ferðast mikið innanlands með dætrum okkar. Við vorum í mosfellskum fjölskyldugönguhóp sem gekk á milli fjallaskála á hinum ýmsu stöðum á landinu. Stórfjölskylda mín er mikið í hestamennsku og við höfum farið í margar fjölskylduhestaferðir með þeim. Mikið sem ég er þakklát þeim fyrir þær ferðir.
Leiðir okkar Sigurðar skildu árið 2018.“

Krílasálmar fyrir foreldra og börn
Ástríða Berglindar liggur í að miðla tónlist og náttúruupplifun í samfélagi okkar, þjóðararfi, menningu, dýralífi og flóru Íslands. Hún hefur kennt mikið í gegnum tíðina, verið með barnakóra í kirkjum og krílasálma fyrir foreldra og ungbörn.
Einnig hefur hún verið með tónlistarleikhús fyrir börn í Kramhúsinu, haldið námskeið í tónlist og skapandi hreyfingu á fjölmörgum leikskólum. Hún kenndi tónmennt í Ísaksskóla og tónlist í Waldorfskólanum Lækjabotnum. Eins hefur hún kennt börnum í alþjóðadeild Landakotsskóla.
Í Mosfellsbæ kenndi hún í yngri deild Lágafellsskóla, þar sá hún tækifærin í umhverfinu, stutt var í fjöruna og út á tún. Berglind lagði sig fram við að efla tengslin við nærsamfélagið með því að láta börnin syngja m.a. fyrir eldri borgara á Eir, heimilisfólkið á Skálatúni og vélavini á Blikastöðum.

Tækifærin liggja í náttúrutengingunni
„Í LHÍ öðlaðist ég sýn, að upplifun, náttúra og listir eru þeir hornsteinar sem ég vil fylgja í aðkomu minni að námi annarra. Ég vil valdefla nemendur mína, efla sjálfstraust þeirra, gefa þeim hvatningu, innblástur og tengsl við jörðina.
Tækifærin til að mennta og efla ungviðið hér á landi liggja að mínu mati í náttúrutengingunni sem við höfum aðgang að í okkar nærumhverfi,“ segir Berlind og brosir.

Úr varð fimm mánaða dvöl
„Ævintýrin elta mig, í ársbyrjun 2020 heimsótti ég bróðurdóttur mína til Marokkó, þar ætlaði ég að dvelja í einn mánuð, en örlögin réðu því að úr varð fimm mánaða dvöl. Í Marokkó býr einstakt hagleiksfólk sem er í mikilli snertingu við hringrás lífsins. Þar bauðst mér starf í alþjóðlegum Waldorfsskóla og ég var yfir leikskóladeild skólans.
Í dag kenni ég tónlist, handverk og myndmennt í Barnaskóla Hjallastefnunnar, í Öskjuhlíð og Nauthólsvík, þar er stutt í útiævintýri. Ég rek líka mitt eigið fyrirtæki og býð upp á ýmis námskeið og ævintýri.“

Kannski ég gerist náttúruprestur
„Nú er ég komin á þann stað í ljóðinu forðum, sem er mér svo minnisstætt. Hér er seinni ljóðlínan. „En „mömmu“ ég gæfi mín ljúfustu ljóð, hún leiðir mig verndar og er mér svo góð.“
Ég er farin að semja lög um móður jörð og ætla að halda því áfram. Að koma með boðskap með hvatningu til sjálfbærni og að bera virðingu fyrir landinu okkar. Kannski tek ég upp nýtt starfsheiti og gerist bara náttúruprestur,“ segir Berglind og brosir sínu fallega brosi er við kveðjumst.

Æskuvinkonur opna vefverslun

Æskuvinkonurnar Ísfold Kristjánsdóttir og Tanja Rut Rúnarsdóttir opnuðu í júlí vefverslunina Narníu sem selur hágæða barnaföt og barnavörur. Nafnið Narnía hefur yfir sér ævintýrablæ en skírskotar líka til þessa ævintýris þeirra vinkvennanna.
„Ég hef allar tíð haft mikinn áhuga á fallegri hönnun og gæða vörum og mig hefur lengi dreymt um að stofna mitt eigið fyrirtæki. Ég nefndi þetta við Foldu sumarið 2019 og síðan þá höfum við verið að undirbúa þetta.
Styrkleikar okkar skarast fullkomlega og verkaskiptingin hjá okkur er skýr,“ segir Tanja en þær stöllur eru í stórum og barn mörgum æskuvinkvennahópi úr Mosó sem heldur hópinn vel.

Gæði og þægindi
„Það er gaman að segja frá því að við stofnuðum fyrirtækið 22. júní sem er merkisdagur hjá okkur báðum því að við eigum báðar syni sem eiga afmæli þennan dag, en samtals eigum við sjö börn.
Vefverslunin opnaði svo formlega þann 25. júlí, viðtökurnar hafa vægast sagt verið frábærar en við ætluðum alltaf að byrja hægt og rólega og bæta svo í vöruúrvalið.
Þetta hefur samt gengið mun hraðar en við bjuggumst við,“ segir Folda en mikil vinna hefur farið í að velja vel þau merki og þær vörur sem þær bjóða uppá og leggja þær mikla áherslu á gæði og tímalausa hönnun.

Eru með þrjú vörumerki
„Við vorum svo heppnar að komast í samstarf við lítið fyrirtæki í Póllandi sem er með merkið A baby brand sem er með barnalínu úr hágæða lífrænni bómull. Þá erum við með sílikon smekki, snuddubönd og þroskaleikföng frá danska merkinu Mushie og leikfanga- eða skipulagskassa frá Aykasa.
Við erum stoltar af vörunum okkar og ótrúlega þakklátar fyrir viðtökurnar en það hvetur okkur bara til að halda áfram og bæta í. Framtíðardraumurinn okkar er svo að opna búð og þá helst í Mosó.“


Narnía býður öllum Mosfellingum 15% afslátt dagana 8.-15. október. Þetta er hægt að nýta sér með því að nota kóðann MOSO20 í vefversluninni www.narnia.is

Reykjalundur 75 ára

Katrín Jakobsdóttir forsætisráðherra og Pétur Magnússon forstjóri Reykjalundar á dögunum.

Til stóð að halda afmælisviku á Reykjalundi, með fjölda viðburða í tilefni afmælis hans, en eins og ástandið er í þjóðfélaginu fer lítið fyrir þeim hátíðarhöldum. Forsætisráðherra gaf sér þó tíma, fyrir hertar sóttvarnareglur, til að stilla sér upp með Pétri Magnússyni nýjum forstjóra Reykjalundar.
Reykjalundur er einn stærsti vinnustaðurinn Mosfellsbæjar með tæplega 200 starfsmenn. Pétur segist finna samhug og metnað í að byggja Reykjalund áfram upp sem öflugan, metnaðarfullan og skemmtilegan vinnustað.

Hugmyndin var að vera með afmælisviku 5.-9. október. Hápunktur afmælisársins átti að vera afmælisráðstefna Reykjalundar á hótel Natura undir yfirskrifinni „Mikilvæg endurhæfingar í íslensku samfélagi“ með þátttöku, meðal annars, heilbrigðisráðherra og landlæknis. „Ráðstefnunni hefur verið aflýst og höldum við bara enn glæsilegri viðburð á 80 ára afmælinu,“ segir Pétur Magnússon forstjóri Reykjalundar.

Einungis berklasjúklingar fyrstu árin
Reykjalundur er heilbrigðisstofnun í eigu SÍBS og hófst starfsemin árið 1945. Fyrstu 15 árin dvöldu aðeins berklasjúklingar á Reykjalundi en um 1960, þegar berklaveikin fór að láta undan síga, varð ljóst að ekki væri lengur þörf á endurhæfingu fyrir þennan sjúklingahóp í sama mæli og áður.
Á næstu árum breyttist starfsgrundvöllur Reykjalundar og áhersla í endurhæfingu varð fjölbreyttari. Reykjalundur breyttist í alhliða endurhæfingarmiðstöð. Nýbyggingar og stærra viðhald á húsnæði Reykjalundar er að meginhluta fjármagnað með hagnaði frá Happdrætti SÍBS.

Yfir 100 sjúklingar sækja þjónustu á Reykjalundi á degi hverjum.

Stærsta endurhæfingarstofnun landsins
Reykjalundur er stærsta endurhæfingarstofnun landsins og þjónar öllu landinu. Á Reykjalundi fer fram alhliða endurhæfing sem miðar að því að bæta lífsgæði, færni og sjálfsbjargargetu þeirra sem þangað leita. Endurhæfing Reykjalundar einkennist af samvinnu fagfólks sem mynda átta sérhæfð meðferðarteymi ásamt Miðgarði sem veitir sólahringsþjónustu. Einnig eru fjöldi gistirýma í boði fyrir fólk sem vegna landfræðilegra, eða annarra, ástæðna getur ekki farið heim að lokinni meðferð á daginn. Markmið endurhæfingarinnar er að sjúklingar endurheimti fyrri getu sína eða bæti heilsu sína.
Um 110-130 sjúklingar sækja þjónustu á degi hverjum. Á hverju ári fara um það bil 1.300 manns í gegnum endurhæfingarmeðferð á Reykjalundi, flestir í 4-6 vikur í senn. Auk þess kemur fjöldi fólks í viðtal á göngudeild á hverju ári.

Mannauðurinn gegnir lykilhlutverki
Starfsemi Reykjalundar stendur og fellur með því fólki sem hjá Reykjalundi starfar. Reykjalundur hefur notið þeirrar gæfu að hafa haft á að skipa úrvals fólki í gegnum tíðina.
Það er því óhætt að segja að mannauðurinn gegni lykilhlutverki í velgengni Reykjalundar og sé hornsteinn að markvissum og vönduðum vinnubrögðum ásamt því að skapa þægilegt og aðlaðandi andrúmsloft fyrir starfsfólk og sjúklinga.
Reykjalundur hefur verið í efstu sætum í starfsánægjukönnunum árum saman. Starfsánægja hefur mælst mikil og starfsaldur er hár á íslenskan mælikvarða.
Á Reykjalundi starfa tæplega 200 starfsmenn í um 170 stöðugildum.

Hvað er endurhæfing?
Endurhæfing skiptir sköpum þegar kemur að líkamlegri og andlegri heilsu. Eftir alvarleg veikindi, slys, áföll eða aðgerð þá er mikilvægt að fá endurhæfingu til að hjálpa til við að ná aftur fótfestu í hversdagslegu lífi.
Læknisfræðileg endurhæfing er sérhæfð meðferð sem byggir á þeirri hugmyndafræði að taka heildrænt á afleiðingum sjúkdóma og slysa. Endurhæfingin byggir á samvinnu margra fagaðila, sjúklings og hans nánustu. Beitt er sálfræðilegum, líkamlegum og félagslegum aðferðum með það að markmiði að uppræta, minnka eða bæta fyrir skerðingu í færni og virkni sem sjúkdómur eða slys hafa valdið.
Endurhæfing er teymisvinna sem er einstaklingsmiðuð fyrir hvern sjúkling. Tekið er mið af getu hans og færni sem og persónulegum þáttum eins og menntun, fjölskyldu, búsetu, kyni, vinnu og fleira allt eftir því hvað er verið að vinna með. Mikil áhersla er lögð á fræðslu og þátttöku sjúklings. Lögð er áhersla á grunnþætti heilbrigðs lífs svo sem heilsusamlegt mataræði, reykleysi, hæfilega hreyfingu og góðan svefn.
Markmið endurhæfingarinnar er að bæta líðan og lífsgæði sjúklings og getu hans til að nýta sér ýmis bjargráð sem honum eru kennd.

Vettvangur þverfaglegrar samvinnu
Í upphafi voru aðeins læknar og hjúkrunarfræðingar starfandi á Reykjalundi. En fagfólki hefur fjölgað jafnt og þétt í gegnum árin. Meðal helstu fagstétta sem koma að beinni meðferð sjúklinga á Reykjalundi eru félagsráðgjafar, heilsuþjálfarar, hjúkrunarfræðingar, sjúkraliðar, iðjuþjálfar, læknar, næringarfræðingar, sálfræðingar, sjúkraþjálfarar og talmeinafræðingar.

Þjálfun í sundleikfimi nýtur mikilla vinsælda.

Saman unnið að betri líðan
Hjartað í starfsemi Reykjalundar er teymisvinna fjölbreytts hóps sérhæfðs heilbrigðisstarfsfólks sem mynda meðferðarteymi.
Í meðferðarteymunum er sett upp einstaklingsmiðað endurhæfingarprógramm fyrir hvern og einn sjúkling sem miðar að því að bæta líkamlega getu og andlega og félagslega líðan. Misjafnt er hvernig endurhæfingu hver og einn þarf á að halda og því skiptir miklu máli að heilbrigðisstarfsfólk með ólíka sérfræðiþekkingu vinni saman að bættri líðan. Markmið teymisvinnu er að veita þverfaglega, heildræna meðferð byggða á gagnreyndri þekkingu. Áhersla er lögð á samtalsmeðferð, einstaklings- og hópmeðferð, fjölbreytta hreyfingu, námskeið og fræðslu.

Fyrsta flokks aðstaða á Reykjalundi
Á Reykjalundi er fyrsta flokks aðstaða til endurhæfingar á öllum sviðum. Markmiðið er að hafa heimilislegt, vinalegt og þægilegt umhverfi svo öllum líði sem best. Á Reykjalundi er æfingatækjasalur, fullbúinn íþróttasalur, meðferðarstofur, vinnustofur, smíðaverkstæði, rými fyrir alls kyns handmennt, æfingaeldhús, fræðsluherbergi, slökunarsalur, hvíldarherbergi, setustofur, starfsendurhæfingar vinnustaður og tvær sundlaugar svo eitthvað sé nefnt. Á Reykjalundi eru tiltæk hvers kyns hjálpartæki til að aðstoða fólk með mismunandi líkamlega færni við daglega iðju.

Hollvinasamtök Reykjalundar
Hollvinasamtök Reykjalundar voru stofnuð árið 2013. Tilgangur samtakanna er að styðja við þá endurhæfingarstarfsemi sem fram fer á Reykjalundi í samráði við stjórnendur Reykjalundar.
Fyrrum sjúklingar Reykjalundar og aðrir velunnarar stóðu að stofnun samtakanna og hafa þau gefið Reykjalundi gjafir fyrir rúmar 60 milljónir. Allir eru velkomnir í Hollvinasamtökin. Skráning fer fram á heimasíðu Reykjalundar.

Heilbrigðisþjónusta hornsteinninn
„Þrátt fyrir að flestir telji heilbrigðisþjónustu vera einn af hornsteinum samfélagsins, er ljóst að fjármunir í heilbrigðismál eru og munu verða takmarkaðir. Vegna þessa er mjög mikilvægt að nota þessa fjármuni með eins markvissum hætti og mögulegt er með það að leiðarljósi að hámarka þjónustu og gæði.
Mín skoðun er sú að endurhæfing og forvarnir séu vannýttur þáttur í því sambandi og við getum gert töluvert betur. Með fjölgun þjóðarinnar og vaxandi meðalaldri er nauðsynlegt að skoða og tileinka sér aukna þjónustu og nýja möguleika,“ segir Pétur Magnússon forstjóri Reykjalundar.
„Það eru mörg tækifæri og möguleikar í stöðunni í framtíðarsýn Reykjalundar og ég er spenntur að fá að leggjast á árar með starfsfólki að gera þetta að veruleika með hagsmuni samfélagsins að leiðarljósi.“

Endurhæfing Covid-sjúklinga
Í upphafi faraldursins gerðu Reykjalundur og Landspítali samning um að Reykjalundur myndi sinna endurhæfingu Covid-sjúklinga af Landspítala. Það voru þá sjúklingar sem lagst höfðu inn á spítalann með Covid og þurftu endurhæfingu til að geta útskrifast; komast á fætur og aftur út í hið daglega líf. Sextán einstaklingar fóru í gegnum þetta ferli á Reykjalundi í vor.
Í sumar og haust hefur orðið töluverð umræða um eftirköst þeirra sem sýkst hafa af Covid og endurhæfingu þeirra.
„Þetta er hópur fólks sem sýktist en fékk ekki mikil einkenni, a.m.k. ekki það mikil að þurfa að leggjast inn á spítala. Hins vegar eru komnar margar beiðnir á Reykjalund um endurhæfingu þessa hóps. Enginn veit hvað hópurinn er stór en leitt hefur verið að því líkum að það séu að minnsta kosti 10%.
Þó nákvæmari rannsóknir skorti ennþá er flestum að verða ljóst að töluverður hluti þeirra sem sýkjast og jafnvel fá ekki mikil einkenni, geta verið að glíma við eftirstöðvarnar mörgum vikum eftir sýkingu, sem lýsa sér í formi þreytu, úthaldsleysis og öndunarfæraeinkenna svo dæmi séu nefnd. Nú er komnir sjö í meðferð inn á Reykjalund með þessa lýsingu og yfir fjörtíu einstaklingar eru á biðlista,“ segir Pétur að lokum.

Fulli gaurinn í partýinu

Covid er orðið eins og fulli gaurinn með endalausa úthaldið í partýinu sem átti að vera löngu búið, vill ekki hætta, vill ekki fara. Við komum gaurnum ekki út, hann er þarna og við þurfum að sætta okkur við það. Hann fer einhvern tíma, en bara þegar honum sýnist.

Eitt af því sem mér finnst mikilvægt á svona tímum eru einfaldar venjur sem láta manni líða vel. Þessar venjur vilja gjarna verða út undan á erfiðum tímum. En skipta virkilega máli. Ég gleymi venjunum stundum. Átta mig svo á því þegar ég finn þær aftur og kem þeim inn í daglega rútínu, hvað þær gefa mér mikið. Ég fann til dæmis DuoLingo aftur í gærmorgun, hafði „gleymt“ því að opna það og æfa mig í tungumálum. Hafði verið að vinna mikið í þýsku til þess að geta bjargað mér í Ölpunum, en þar átti ég að vera í síðasta mánuði með föngulegum félögum að keppa í Spartan Race. Ég hafði gaman af þýskunni, en spænskan er alltaf uppáhaldið og það var virkilega góð stund þegar ég opnaði Duo í gær og skellti mér í nokkrar umferðir í spænsku. Duo tók vel á móti mér, ég rifjaði upp spænska nútíð og leið vel á eftir.

Ég fór líka í morgungöngu, ekki á fell, heldur bara stuttan hring í hverfinu. Fylgdi þeim yngsta áleiðis í skólabílinn og rölti svo meðfram ánni og aftur heim. Gerði þetta aftur í morgun. Þessi byrjun á degi, smá Duo og stutt ganga er töfralyf þegar fulli gaurinn neitar að fara úr partýinu. Maður steingleymir honum á meðan, hann skiptir engu máli. Og þessar einföldu venjur gefa manni stóran orkuskammt sem endist langt fram á dag. Þá er gott að eiga eina eða tvær góðar venjur í pokahorninu til að endurnýja orkuna fram á kvöld.

Heilsumolar Gaua
Mosfellingur 8. október 2020

Gefa út sína fyrstu plötu

Ísak Andri, Þorsteinn, Kristján Ari og Nói Hrafn.

Rokkhljómsveitin Red Line hefur gefið út sína fyrstu hljómplötu á Spotify.
Hljómsveitin er skipuð fjórum ungum og efnilegum Mosfellingum, þeim Kristjáni Ara Haukssyni söngvari, Nóa Hrafni Atlasyni bassaleikara, Ísaki Andra Valgeirssyni gítarleikara og trommaranum Þorsteini Jónssyni.
„Við stofnuðum hljómsveitina í janúar og sömdum þrjú lög fyrir Músík­tilraunir en vegna COVID19 var hætt við keppnina í ár. Þarna kviknaði neisti hjá okkur, við höfum allir einbeitt okkur að þessu síðan og nú er árangurinn að koma fram með þessari plötu,“ segir Kristján Ari.

Spenntir að fá viðbrögð
Á plötunni má finna átta frumsamin lög og nefnist platan 13:18. „Nafnið 13:18 varð hugmynd vegna þess að við leigðum hús á Laugaveginum til að semja og spila lög. Fyrsta daginn þar dó veggklukkan okkar á tímanum 13:18 svo öll lögin okkar eru samin á þeim tíma í þessu húsi, sem er einnig húsið framan á plötuumslaginu.
Við höfum fengið mjög góð viðbrögð, við sjáum að þeir sem hafa hlustað á plötuna gera það aftur og aftur. Nú þurfum við bara að gera okkur sýnilega og fá fleiri til að hlusta og erum spenntir að fá meiri viðbrögð,“ segir Kristján Ari.
Lagið Summer Nights er mest spilaða lag hljómsveitarinnar og hefur sveitin gefið út myndband með því lagi sem meðal annars er tekið upp hér í Mosfellsbæ.

Þoli illa tvíverknað og tilgangsleysi

Ítalski Mosfellingurinn Michele Rebora eða Tittí eins og hann er ávallt kallaður flutti til Íslands árið 2001 en hann er alinn upp í þorpi nálægt Genova.
Það var aldrei ætlun hans að flytja frá heimalandi sínu en eftir að hann hitti bláeygða draumadís frá Laugarvatni var hann fljótur að slá til.
Þau hjónin hafa komið sér vel fyrir í Mosfellsbænum og eru orðin fjórum börnum ríkari.

Michele fæddist 20. október 1978 í heimahúsi í Sant’Olcese sem er lítill bær rétt fyrir utan Genova á Ítalíu. Foreldrar hans eru þau Alessandra Toni húsmóðir og Luigi Rebora líffræðingur, verktaki á sviði vatnshreinsunarstöðva.
Michele á einn bróður, Vittorio f. 1977.

Með villisvín og dádýr í bakgarðinum
„Það má segja að ég sé alinn upp í sveit þótt það hafi ekki sömu merkingu og hér á landi. Ég bjó ekki á bóndabæ þar sem voru stórgripir en húsið okkar var hluti af strjálbýlu þorpi í fjallshlíðunum á bak við Genova. Það er umkringt skógi og túnum og við vorum með villisvín og dádýr í bakgarðinum. Föðurfjölskylda mín á rætur sínar að rekja til þessara slóða langt aftur í aldir.
Ég á stóran frændsystkinahóp þannig að það var alltaf nóg að krökkum til að leika við.“

Ólumst upp við frjálsræði
„Við bræðurnir ólumst upp við frjálsræði, við vorum berfættir frá skólalokum í júní til septemberloka. Við hlupum um í skóginum, svömluðum í ám og bjuggum til ævintýraheima.
Það var ekki búið að finna upp snjall­símana á þessum tíma og lítið var af tölvuleikjum en það voru til svona stórir spilakassar sem gleyptu 500 lírur eins og enginn væri morgundagurinn.“

Innleiddi pappírsflokkun
„Ég gekk í sveitaskólann í bænum og við vorum einungis fimm í fyrsta bekk. Ég elskaði kennarann minn hana Marisu og ég tíndi oft blóm handa henni.
Mér gekk vel í skólanum og átti auðvelt með að læra. Það er gaman að segja frá því að í þriðja bekk innleiddi ég pappírsflokkun í skólanum með aðstoð pabba sem sá um að tæma tunnurnar.
Ég fór svo í gagnfræðaskóla í Campo­morone sem er höfuðstaður sveitarfélagsins og ég man hvað mér fannst hann vera langt í burtu. Ég var vinamargur og mjög virkur í félagslífinu, það mætti jafnvel segja að ég hafi verið fyrirferðarmikill,“ segir Tittí og brosir.

Heimurinn stækkaði til muna
„Þegar ég var 14 ára gekk ég í latínuskóla í Genova og heimurinn stækkaði til muna. Maður vaknaði eldsnemma til að fara í skólann, fór smá spöl á vespu, svo í rútu, síðan í lest og svo gekk maður restina af leiðinni. Ég kynntist nýjum krökkum sem ég held enn sambandi við í dag, þar á meðal Fabio sem er minn besti vinur en hann hefur búið á Íslandi í 16 ár.
Ég lét strax til mín taka í skólapólitíkinni, ég var fyrst kosinn bekkjarfulltrúi og svo fulltrúi nemanda í skólaráði. Ólga var í skólasamfélaginu á þessum árum og mikið um kröfugöngur og verkföll sem við tókum iðulega þátt í. Haustið sem ég var í 2. bekk yfirtóku nemendur skólann og þar réðu þeir ríkjum í um tvær vikur. Það er skrítið til þess að hugsa núna en þetta var merkileg reynsla.
Leiðin lá síðan í háskólann í Genova þar sem ég nam alþjóðleg stjórnmálafræði.“

Sendi mömmu og vinkonu á svæðið
„Fjölskylda mín á hús í fjöllunum heima og þar eyddum við vinirnir oft helgunum, sérstaklega eftir að við fengum vespu 16 ára gamlir. Við grínuðumst oft með það þegar bankað var á dyrnar hjá okkur að nú væri kominn hópur af sænskum skátastelpum.
Eitt sinn þegar við vorum að ganga upp að fjallakofanum spurði ég vin minn hvort hann vissi hvort fleiri ætluðu að koma. Hann nefndi einn og svo annan sem ég þekkti ekki. Sá gat ekki komið og ætlaði að senda mömmu sína og vinkonu hennar í staðinn. Frábært, hugsaði ég, fertugur maður sem kemst ekki og ætlar að senda þær tvær í staðinn, það verður eitthvað,“ segir Tittí og hlær að minningunni.
„Það kom svo á daginn að þessi vinkona var í raun undurfögur tvítug pía, ljóshærð og bláeygð og ég féll strax fyrir henni. Hún var sem sagt í heimsókn hjá vinkonu sinni og ég varð að leggja mig allan fram til að vinna hana á mitt band. Hún var nefnilega staðráðin í því að finna sér ekki mann á Ítalíu. Seiglan og þrautseigjan urðu til þess að við byrjuðum saman og ég elti hana til Íslands sumarið 1999.“

Tek kveðjuna góðu alltaf til mín
„Fyrstu tvö árin bjuggum við og störfuðum hér á landi á sumrin en vorum svo úti í Genova á veturna. Við fluttum síðan alfarið heim 2001. Heim, segi ég, því hér á ég heima, ég hef alltaf tekið kveðjuna góðu til mín um borð í flugvélum Icelandair þegar sagt er velkomin heim.
Draumadísin mín er frá Laugarvatni, heitir Heiða Björg Tómasdóttir og starfar sem ráðgjafi. Við eigum saman fjögur börn, Aldísi Leoní f. 2004, Elio Mar f. 2007, Þórdísi Láru f. 2012 og Livio Frey f. 2015.“

Vaskar upp og lætur leirtauið þorna
„Ég hóf störf sem gæðastjóri VIRK starfsendurhæfingarsjóðs í febrúar á þessu ári, korter í COVID. Það var mjög spes þar sem vinnustaðurinn dreifðist mjög fljótt og allir fóru að vinna heima. Ákveðin áskorun að byrja á nýjum stað svona en þarna er mjög gott að vera.
Ég starfaði áður í 14 ár sem ráðgjafi í gæðastjórnun. Aðstoðaði aðallega fyrirtæki við að greina ferli sín og undirbúa sig fyrir vottun en líka varðandi umhverfismál, upplýsingaöryggi, jafnréttismál o.s.frv.
Ég þoli illa tvíverknað og tilgangsleysi og hef því gaman af því að velta fyrir mér leiðum til að einfalda hlutina og spara vinnu. Eins og í daglega lífinu, t.d varðandi uppvaskið, þá vaskar maður upp og lætur svo leirtauið þorna en þurrkar það ekki.“

Nýt þess að vera úti í náttúrunni
„Ég hef líka gríðarlegan áhuga á umhverfismálum og þá helst „ruslinu“. Í gegnum starf mitt sem ráðgjafi hef ég m.a. fengið tækifæri til að hafa áhrif og hef tekið þátt í heildarendurskoðun á flokkunarreglum fyrir höfuðborgarsvæðið og framsetningu þeirra á vef SORPU.
Ég nýt þess að vera úti í náttúrunni og finnst æðislegt að komast í „óbyggðir“ með því að ganga í nokkrar mínútur að heiman. Ég er virkur í bæjarmálunum og líka í samfélagi Ítala hér á landi og læt mig málin varða.
Ég er líka nokkuð óvirkur sportkafari og nokkuð virkur mynt- og seðlasafnari svo ég hef alltaf nóg að gera,“ segir Tittí er við kveðjumst.

Skógræktarfélagið hlýtur umhverfisviðurkenningu Mosfellsbæjar

Á myndinni má sjá formenn Skógræktarfélags Mosfellsbæjar síðustu ára eða fulltrúa þeirra.

Umhverfisnefnd Mosfellsbæjar veitti á dögunum árlegar umhverfisviðurkenningar. Viðurkenningarnar eru veittar þeim aðilum sem taldir eru hafa skarað fram úr í umhverfismálum.

Skógræktarfélag Mosfellsbæja  fær viðurkenningu fyrir góð störf að skógræktarmálum í Mosfellsbæ um margra ára skeið. Skógræktarfélagið hefur áratugum saman unnið óeigingjarnt starf við skógrækt í Mosfellsbæ með uppbyggingu fallegra skógarlunda og útivistarsvæða og þannig stuðlað að fallegra umhverfi í bænum og aukinni útivist og heilsurækt íbúa.
„Við erum gríðarlega þakklát fyrir þessa viðurkenningu og fyllumst stolti. Þetta hvetur okkur svo sannarlega til að halda áfram á sömu braut,“ segir Björn Traustason formaður skógræktarfélagsins en viðurkenningin var veitt í Hamrahlíð, glæsilegu útivistarsvæði Mosfellinga.
Til stóð að aðalfundur Skógræktarfélags Íslands yrði haldinn með mikilli dagskrá í Hlégarði í byrjun september. Vegna sóttvarnarreglna og fjöldatakmarkana þurfti því miður að fresta honum og þeirri dagskrá sem búið var að undirbúa í tilefni 90 ára afmæli félagsins.

Þá fengu þrír garðar verðlaun. 

Bergholt 10
Guðlaug Helga Hálfdánardóttir og Ásbjörn Þorvarðarson fá viðurkenningu fyrir fallegan og fjölskrúðugan garð að Bergholti 10 sem sinnt hefur verið af mikilli natni um langt skeið.

Einiteigur 4
Guðlaug Anna Ámundadóttir og Snorri Böðvarsson fá viðurkenningu fyrir sérlega fallegan og vel skipulagðan garð að Eini­teig 4 þar sem lögð er áhersla á fallegt umhverfi og tengingu við náttúruna í kring.

Litlikriki 68
Ragnhildur Sigurðardóttir og Jón Andri Finnsson fá viðurkenningu fyrir fallegan og vel skipulagðan garð að Litlakrika 68 þar sem lögð er áhersla á frumlega hönnun og tengingu við náttúruna.

 

Handbolti.is kominn í loftið

Ívar Benediktsson og Kristín Reynisdóttir láta hendur standa fram úr ermum.

Þann 3. september opnaði vefurinn Handbolti.is. Vefurinn er gefinn út af Snasabrún ehf, sem er í eigu Mosfellinganna Ívars Benediktssonar blaðamanns og Kristínar B. Reynisdóttur sjúkraþjálfara.
Ívar er ritstjóri og ábyrgðarmaður. Hann var í hartnær aldarfjórðung íþróttafréttamaður hjá Morgunblaðinu og mbl.is og fylgdist á þeim tíma grannt með handknattleik, jafnt innanlands sem utan.

Öflugur fréttaflutningur af handbolta
„Það urðu breytingar í vinnu hjá mér, mér var sagt upp störfum hjá Morgunblaðinu og þar af leiðandi var ég atvinnulaus. Það höfðu margir haft á orði við mig að fara af stað með miðil tengdan handboltanum og ætli mig hafi ekki bara alltaf vantað þor til þess að stíga þetta skref,“ segir Ívar.
„Handbolti.is mun halda úti öflugum fréttaflutningi af handknattleik, bæði innanlands og utan, af þeirri íþrótt sem hefur sameinað þjóðina á ótal gleðistundum í gegnum tíðina.“
„Auk fregna af innlendum og erlendum vettvangi og landsliðum Íslands í öllum aldursflokkum er ætlunin að vera með fingur á púlsi fjölmenns hóps íslensks handknattleiksfólks og þjálfara sem starfa utan landssteina Íslands. Og ekki stendur til að gleyma dómurunum.
Handbolti.is verður opinn fyrir skoðunum þeirra sem að íþróttinni koma og vilja viðra á opinberum vettvangi. Ýmislegt fleira er í bígerð,“ segir Ívar en vefinn hannaði Daníel Rúnarsson hjá Kasmir vefhönnun og merki vefjarins teiknaði Mosfellingurinn Pétur Baldvinsson.

Góðar viðtökur
Vefurinn hefur fengið frábærar viðtökur en um þessar mundir er allt að fara í gang í handboltanum. „Við höfum fengið mjög góð viðbrögð, erum að fá skilaboð og pósta frá fólki úr öllum áttum sem er þakklátt fyrir þetta framtak og vilja jafnvel leggja vefnum lið á margan hátt allt frá því að kaupa auglýsingar, skaffa mér myndir og aðstoða mig á allan hátt.
Það er okkur mjög mikilvægt að fá þessi viðbrögð og hvetur okkur til dáða að halda áfram. Auk þess að vera með vefsíðuna þá erum við líka á Instagram, Twitter og Face­book,“ segir Ívar að lokum og hvetur alla sem áhuga hafa á handbolta til að fylgjast með.

Veitir innsýn í líf fólks af erlendum uppruna

Mikael Rafn Steingrímsson varaformaður lýðræðis- og mannréttindanefndar Mosfellsbæjar, Jewells Chambers og Haraldur Sverrisson bæjarstjóri.

Jafnréttisviðurkenningu Mosfellsbæjar 2020 hlýtur Mosfellingurinn Jewells Chambers. Jewells er fædd og uppalin í Brooklyn í New York en flutti hingað til Íslands árið 2016. Hún er gift Gunnari Erni Ingólfssyni og búa þau saman hér í Mosfellsbæ. Jewells er verkfræðingur að mennt frá Rensselaer Polytechnic Institute og starfar sjálfstætt í dag.

Vekur athygli á kynþáttahyggju og fordómum
Jewells hefur vakið athygli á kynþáttahyggju og fordómum sem byggjast á hörundslit fólks hér á Íslandi. Hún hefur meðal annars tekið áhugaverð viðtöl við einstaklinga sem eru af erlendu bergi brotnir, þar sem upplifun af því hvernig það er að tilheyra minnihlutahópi á Íslandi er lýst. Til að mynda vakti YouTube myndband þar sem hún og Tabitha Laker deila upplifun sinni af því hvernig er að vera þeldökkur einstaklingur á Íslandi mikla athygli á meðal almennings.
Jewells er afar virk á samfélagsmiðlum (Instagram, YouTube og Facebook) þar sem hún veitir innsýn inn í líf fólks af erlendum uppruna. Hún heldur úti heimasíðunni From Foreign to Familiar og er einnig með podcastið All Things Iceland. Mosfellingar eru hvattir til að fylgjast með öllu því áhugaverða sem hún er að gera.

Uppbyggilegt og réttlátt samfélag fyrir alla
Mosfellsbær fagnar fjölbreytileikanum og leggur áherslu á að stuðla að uppbyggilegu og réttlátu samfélagi fyrir alla, óháð uppruna. Með viðurkenningunni vill lýðræðis- og mannréttindanefnd Mosfellsbæjar hvetja íbúa Mosfellsbæjar sem og aðra til að gera slíkt hið sama.
Gerum jafnréttismálum hátt undir höfði og verum meðvituð um að koma fram við alla af virðingu, jákvæðni og umhyggju. Jewells sýnir aðdáunarverða framsækni og framlag hennar til okkar samfélags er mjög mikilvægt.

RAFRÆNN JAFNRÉTTISDAGUR

Vegna samkomutakmarkana ákvað lýðræðis- og mannréttindanefnd Mosfellsbæjar að jafnréttisdagur Mosfellsbæjar yrði rafrænn í ár.
Þar sem mikil umræða hefur skapast undanfarið um kynþáttafordóma og kynþáttahatur hérlendis og erlendis fannst nefndinni áhugavert að heyra hvernig einstaklingar af erlendum uppruna upplifa þessi mál.
Lýðræðis- og mannréttindanefnd fékk þær Aldísi Amah Hamilton, leikkonu og Sunnu Söshu Larosiliere, stjórnmálafræðing, til að segja frá því hvernig þær upplifðu það að alast upp hér á landi og hvar skórinn kreppir þegar kemur að fordómum.
Viðtölin við Aldísi og Sunnu og afhending jafnréttisviðurkenningar Mosfellsbæjar 2020 verða birt á samfélagsmiðlum Mosfellsbæjar; mos.is, á Instagram- og facebook síðu Mosfellsbæjar og Instagram síðu Mosfellings.
Lýðræðis- og mannréttindanefnd hvetur Mosfellinga eindregið til að fylgjast með því sem þær hafa að segja. Áhugasamir geta fylgst með þessum flottu konum
á samfélagsmiðlinum Instagram: @aldisamah og @sunnasasha

sdf sdf

Nýtt starfsfólk í Lágafellssókn

sdf sdf

Sigurður Rúnar Ragnarsson, Oddný Sigrún Magnúsdóttir og Bogi Benediktsson. 

Sigurður Rúnar Ragnarsson mun gegna stöðu sem þriðji prestur í Mosfellsprestakalli til júní 2021. Hann er fyrrverandi sóknarprestur í Norðfjarðarprestakalli. Hann vígðist til Mosfellsprestakalls og Lágafellssóknar sem prestur vorið 1998 og starfaði við Lágafellssókn frá vígslu til júní 1999 er hann fékk Norðfjarðarprestakall.
Hér í Mosfellsbæ var hann búsettur frá árinu 1978 til ársins 1999. Hann hefur undanfarið ár, vegna breytinga á prestaköllum á Austfjörðum, verið í sérþjónustu á Biskupsstofu og gegnt ýmsum störfum við prestaköllin á Austurlandi.
Eiginkona Sigurðar Rúnars er Ragnheiður Hall og eiga þau þrjú börn, Ragnar Árna, Þóru Kristínu og Katrínu Halldóru.

Oddný Sigrún nýr rekstrarstjóri
Í byrjun árs tók til starfa nýr rekstrarstjóri Lágafellssóknar, Oddný Sigrún Magnúsdóttir. Hlutverk rekstrarstjóra er daglegur rekstur og bókhald Lágafellssóknar. Oddný Sigrún er viðurkenndur bókari og hjúkrunarfræðingur að mennt. Síðustu 20 ár hefur hún rekið sitt eigið fyrirtæki ásamt manni sínum.

Nýr æskulýðsfulltrúi
Nýr æskulýðsfulltrúi tók til starfa í byrjun september og heitir hann Bogi Benediktsson. Bogi mun hafa umsjón með æskulýðsstarfi Lágafellssóknar, sunnudagaskólanum kl. 13 og unglingastarfinu á þriðjudögum kl. 20. Einnig hefur hann umsjón með kirkjugörðum Lágafellssóknar og sér um heimasíðu og samfélagsmiðla. Allar nánari upplýsingar um starfsemi kirkjunnar má finna á www.lagafellskirkja.is

Óskar Einarsson bæjarlistamaður Mosfellsbæjar 2020

„Þetta er fyrst og fremst frábær heiður að hljóta þessa viðurkenningu og er ég mjög þakklátur og snortinn,“ segir tónlistarmaðurinn Óskar Einarsson, bæjarlistamaður Mosfellsbæjar 2020.
Það er menningar- og nýsköpunarnefnd sem stendur fyrir útnefningunni líkt og síðastliðin 25 ár.
Óskar er fæddur á Akureyri en hefur verið búsettur í Mosfellsbæ síðan árið 2003 og segist hvergi annars staðar vilja vera.
Hann stundaði píanó- og saxófónnám við tónlistarskólann á Akureyri, stundaði nám við FÍH og lauk blásarakennaraprófi frá Tónlistarskólanum í Reykjavík 1995. Hann hefur lokið mastersgráðu í útsetningum frá University of Miami. Auk píanóleiks og kórstjórnar leikur hann á flautu, saxófón og klarinett.

Þekktastur fyrir gospeltónlist
Gospeltónlist er sú tegund tónlistar sem Óskar er þekktastur fyrir. Hann var stofnandi og stjórnandi Gospelkórs Reykjavíkur og hefur verið tónlistarstjóri Hvítasunnukirkjunnar í Reykjavík í um 30 ár. Hann starfar sem tónlistarstjóri í Lindakirkju í Kópavogi og stýrir þar öflugum kirkjukór sem heldur reglulega gospeltónleika.
Óskar lét ekki sitt eftir liggja í COVID-19 bylgjunni í vor og stóð fyrir viðburðinum Hittumst heima ásamt félögum sínum í Gospeltónum.
Óskar Einarsson er öflugur tónlistarmaður sem hefur komið víða við og er vel að heiðrinum kominn.
„Ég man fyrst eftir að hafa séð mynd af mér í blaði, eins árs gömlum, við píanóið heima þar sem stóð „Litli píanósnillingurinn“. Þar byrjaði þetta. Svo hef ég verið í tónlistarnámi frá því ég man eftir mér, hlustað á músík og unnið við þetta alla ævi.“
Dagarnir hjá Óskari eru mjög fjölbreyttir. „Ég spila í brúðkaupum, útförum og sé um tónlist í sjónvarpi, leikhúsunum og auðvitað í kirkjunni.“
Óskar hefur fylgst með blómlegu kóralífi í Mosfellsbæ og meðal annars útsett og stjórnað tónleikum með Karlakórnum Stefni og verið með tónleika með Álafoss­kórnum. Þá hefur hann fengið sinn kór, Gospelkór Reykjavíkur, til að halda tónleika hér auk þess sem hann hefur margoft spilað með mosfellskum listamönnum eins og Gretu Salóme og Diddú.

Kynnir sig og verk sín á næstunni
Á því ári sem bæjarlistamaður er tilnefndur kynnir hann sig og verk sín innan Mosfellsbæjar í samvinnu við menningar- og nýsköpunarnefnd. Auk nafnbótarinnar er listamanninum veittur menningarstyrkur.
„Ég er strax búinn að undirstinga mitt fólk með að gera eitthvað skemmtilegt hér í Mosfellsbæ á næstunni og fæ jafnvel Pál Rósinkrans með mér í einhver verkefni,“ segir Óskar að lokum og hafði aldrei hugsað svo langt að maður eins og hann, á bakvið tjöldin, væri vel að slíkri viðurkenningu kominn.

 

Þakklæti í verki

Ég var í sambandi við elsta son minn í morgun, spjallaði aðeins við hann um þennan pistil, um hvað hann ætti að fjalla. Hann stakk upp á að pistillinn fjallaði um þakklætisgöngur – það er þegar maður fer í rólegan göngutúr og einbeitir sér að því, hluta göngutúrsins, að hugsa um það sem maður er þakklátur fyrir. Mér leist vel á það.

Hann sagðist vera að vinna með sína eigin útgáfu af þakklætis­göngum. Hún snýst um að byrja daginn á því að hugsa um eitthvað sem maður er þakklátur fyrir og ákveða síðan að gera eitthvað sama dag sem tengist því. Hann kom með dæmi, sagði mér frá því að hann hefði hugsað um fyrir nokkrum dögum að hann væri þakklátur fyrir ömmu Dóru (ég er það líka, svo það sé nú á hreinu, hún er frábær tengdamóðir) og hann fagnaði því þakklæti með því að hringja í hana seinna sama dag og spjalla við hana um lífið og tilveruna. Þetta finnst mér stórsniðugt. Að búa til sína eigin útgáfu af aðferð sem maður lærir af öðrum. Gera hana að sinni, betrumbæta hana.

Ég ætla að prófa þessa tegund af þakklætisgöngu, hugsanlega strax í fyrramálið. Ætla ekki að ákveða núna hvað ég ætla að vera þakklátur fyrir, heldur leyfa því að koma til mín þá.

Fyrst við erum að tala um göngur, þá langar mig að mæla með því að ganga reglulega á einhver af fellunum okkar mosfellsku. Fellagöngur eru frábær útivist og hreyfing. Mátulega langar og stutt fyrir okkur að fara. Ég hef sjálfur verið að labba á Reykjafellið daglega, er að prófa að gera það allan septembermánuð. Hugmynd sem ég fékk lánaða hjá göngugarpinum Pálma Steingrímssyni. Ég lagaði hugmyndina að mér og mínum aðstæðum, gerði hana að minni. Alveg eins og sonur minn gerði með þakklætisgönguhugmyndina.

Heilsumolar Gaua
Mosfellingur 17. september 2020

Opna ilmbanka íslenskra jurta

Í júní opnaði í Álafosskvosinni ilmsýningin Ilmbanki íslenskra jurta og lítil búð sem selur ýmsar vörur sem unnar eru úr íslenskum jurtum.
Það eru þær Elín Hrund Þorgeirsdóttir og Sonja Bent sem standa að baki sýningunni en þær hafa unnið saman síðastliðin þrjú ár og reka saman fyrirtækið Nordic angan.
„Við höfum verið að vinna að rannsóknarverkefni á ilmum í íslenskri náttúru síðastliðin tvö ár og er sýningin afrakstur þeirrar vinnu. Sýningin hefur fengið góðar viðtökur og er komin til að vera áfram,“ segir Elín. Sýningin er opin allar helgar, aðgangseyrir er 1.200 kr. en frítt fyrir 16 ára og yngri.

Frábært að vera í Kvosinni
„Við erum rosalega ánægðar með að vera hér Álafosskvosinni en hér erum við bæði með sýninguna og vinnustofuna okkar. Við vinnum með íslenskar jurtir, eimum úr þeim ilmkjarnaolíur og hönnum ilmtengdar vörur. Svo umhverfið hérna smellpassar við okkar starfsemi.
Það er búið að vera mjög áhugavert að vinna að þessari rannsókn því það er sterk hefð fyrir því á Íslandi að nota jurtirnar okkar á ýmsan hátt en engin hefð fyrir því að eima úr þeim ilmkjarnaolíur.
Við höfum unnið að því að rannsaka hvaða jurtir er hægt að eima og hvaða virkni er í olíunum. En svo fórum við líka að vinna með þær jurtir sem ekki var hægt að eima og reyna að ná ilmi út þeim líka.“

Leikið með lyktarskynið
Sýningin er fallega uppsett en þar getur fólk lyktað af ýmsum íslenskum jurtum og trjám á skemmtilegan og aðgengilegan hátt. Einnig er svokölluð ilmsturta sem þær stöllur hönnuðu og kynntu á Hönnunarmars í fyrra en um er að ræða tæki sem gefur frá sér kalda þurrgufu með íslenskum ilmkjarnaolíum.
„Við erum rosalega ánægðar með útkomuna og viðbrögð, það er greinilegt að þessi nýjung með ilmupplifum og jafnvel tengsl á milli lyktar, tilfinninga og minninga er eitthvað sem fólki finnst áhugavert.
Það er alltaf að aukast að við séum að taka á móti hópum s.s. vinkonuhópum, saumaklúbbum, vinnustöðum og öðrum hópum. Við getum boðið upp á leiðsögn um sýninguna og jafnvel léttar veitingar. Best er að hafa bara samband við okkur til að bóka heimsókn fyrir hópa,“ segir Elín að lokum og býður alla Mosfellinga sérstaklega velkomna.

Kjóll með sögu

Þann 22. ágúst fermdist Eydís Ósk í Lágafellskirkju ásamt fleirum krökkum úr bæjarfélaginu. Það er skemmtilegt að segja frá því að kjóllinn sem hún var í við þessa hátíðlegu athöfn hefur áhugaverða sögu að baki en þetta er í fjórða skipti sem þessi kjóll er notaður við stórviðburð í fjölskyldunni.
Kjóllinn var upphaflega saumaður árið 1969 sem brúðarkjóll á Ingigerði Magnúsdóttur sem gekk í hjónaband með Sigurhans Wium það sama ár. Dóttir þeirra Rakel Katrín fermdist svo í kjólnum árið 1993 og báðar dætur hennar, þær Ásta Margrét sem fermdist 2013 og svo Eydís Ósk 2020.

Skemmtilega sígildur kjóll
„Soffía Þórðardóttir sem átti verslunina Kjóllinn sérsaumaði þennan kjól á mig, en hún var afasystir mannsins míns. Kjóllinn er svo skemmtilega sígildur,“ segir Ingigerður sem er ánægð með hvað dóttir hennar og barnabörn hafa verið spenntar fyrir að nota kjólinn.
Rakel tekur undir það og segist ekki hafa fundið neitt sem hana langaði í þegar hún var að spá í kjóla fyrir ferminguna sína. „Ég byrjaði því að gramsa í skápunum hjá mömmu og fann þennan kjól og mátaði. Eftir það kom aldrei neitt annað til greina en að fermast í þessum kjól. Það var svo sama sagan þegar Ásta dóttir mín fermdist, hún skoðaði ekki einu sinni aðra kjóla,“ segir Rakel.
„Í fermingarveislunni hjá Ástu var mikið verið að tala um kjólinn og sögu hans. Eydís var þá 6 ára og sagði strax að hún ætlaði sko líka að fermast í þessum kjól. En kjóllinn er alveg sérstaklega fallegur, klassískur og sniðið er alveg tímalaust,“ segir Rakel að lokum en Eydís dóttir hennar fermdist í kjólnum góða í Lágafellskirkju síðastliðinn sunnudag.

Krefjast lengri opnunartíma

Margir fastagestir sækja Lágafellslaug í Mosfellsbæ enda ein flottasta sundlaug landsins. Hópur fastagesta hittist þar á hverju kvöldi og fer yfir málin. Eftir sund og gufu leggur hópurinn á ráðin yfir engiferskoti í anddyri laugarinnar. „Við erum Mosfellingar og þverskurður samfélagsins á aldrinum 20-80 ára,“ segir Guðmundur Björgvinsson, Makkerinn, einn meðlima sundhópsins.

Hátt í þúsund undirskriftir komnar
Hópurinn hóf að safna undirskriftum í sumar fyrir lengri opnunartíma í Lágafellslaug. Undirskriftarsöfnunin gengur út á að hafa opið alla daga vikunnar til kl. 22:00, einnig um helgar. Lauginni er nú lokað kl. 21:30 á virkum dögum og kl. 19:00 um helgar.
„Opnunartími í Lágafellslaug er styttri en alls staðar annars staðar á höfuðborgarsvæðinu og á flestum sundstöðum er opið til kl. 22:00 alla daga.“
Rafræn undirskriftasöfnun á island.is stóð yfir frá 17. júní til 17. júlí. Einnig voru undirskriftalistar aðgengilegir á N1 í Mosfellsbæ á þessum tíma. Í ljósi COVID taldi hópurinn að rétt væri að bíða með að afhenda listann til bæjarstjórnar Mosfellsbæjar. Enn er hægt að ljá málefninu lið með því að skrifa undir listann á N1, bókasafninu og í Lágafellslaug. Stefnt er að því að afhenda bæjarstjórn listann þann 15. september.

Heilsueflandi og stækkandi samfélag
„Aðstaðan í Lágafellslaug er ein sú besta á Íslandi og það er okkar einlæga ósk að opnunartíminn verði lengdur“, segir Guðmundur sem segir hópinn hafa fengið afar góðar undirtektir.
„Á þessum sérstöku COVID-tímum, þar sem fjöldatakmarkanir eru í heitum pottum og í gufuklefum, er lengri opnunartími enn mikilvægari en áður,“ bætir Svavar Benediktsson við. „Það gengur ekki upp að Mosfellingar þurfi að búa við lakari þjónustu en aðrir íbúar höfuðborgarsvæðisins. Það er krafa Mosfellinga að opnunartími Lágafellslaugar verði færður til samræmis opnunartíma annars staðar á höfuðborgarsvæðinu.
Þetta hefur félagslegt gildi og er gott fyrir sálina í okkar ört stækkandi og heilsueflandi samfélagi.“