Bylur í Bæjarleikhúsinu fyrir jólin

bylur_mosfellingur

Leikfélag Mosfellssveitar í samstarfi við tónlistardeild Listaskóla Mosfellsbæjar æfir um þessar mundir nýjan söngleik sem ber heitið Bylur.
Sagan gerist á afskekktu hóteli í ónefndum bæ á Þorláksmessu, en þar sjá nokkrir strandaglópar fram á að þurfa að eyða jólunum saman sökum blindbyls sem herjar á bæinn. Þarna fléttast saman sögur alls konar fólks sem er saman komið á hótelinu í mismunandi erindagjörðum. Leynifundir, jólabjöllur, snjóblásari og steikt slátur í bland við grípandi vetrar- og jólalög í skemmtilegum útsetningum ættu að koma öllum í jólaskapið.

Stöllur og hljómsveit út Listaskólanum
Hljómsveitin er skipuð nemum í Listaskólanum og Kvennakórinn Stöllurnar undir stjórn Heiðu Árnadóttur leika og syngja ásamt félögum í Leikfélagi Mosfellssveitar.
Handritið skrifuðu María Guðmundsdóttir og Sigrún Harðardóttir, leikstjórn er í höndum Sigrúnar og Agnesar Wild, leikmynd hannar Eva Björg Harðardóttir og búninga og leikmyndasmíði er í höndum stærðar hóps sem vinnur bakvið tjöldin. Sýningarstjóri er Kolfinna Rut Schjetne.

Gestasöngvari á hverri sýningu
Á hverri sýningu kemur gestasöngvari og tekur lagið, en meðal söngvara verða GDRN, Guðrún Gunnarsdóttir, Diddú, Bjarni Atlason, Jógvan Hansen og Greta Salóme.
Ekki missa af þessum stórskemmtilega söngleik sem kitlar hláturtaugarnar, frábær skemmtun í skammdeginu.
Sýningar eru: lau. 23/11, fim. 28/11, fim. 5/12, fös. 13/12, fim. 19/12 og fös. 20/12.
Miðapantanir fara fram í síma 566-7788 og í skilaboðum á facebook.com/leikmos.

Jákvæðni fleytir manni langt

geirilong_mosfellingur

Geirarður Þórir Long deildarstjóri hjá Húsasmiðjunni er mikill gleðigjafi og jákvæður með eindæmumFjöldi rannsókna hefur sýnt að það að vera jákvæður og bjartsýnn hefur jákvæð áhrif á heilsu, andlega líkamlega og félagslega. Jákvæðni fleytir manni langt og einstaklingar með gott sjálfstraust vita að hugsanir þeirra og viðhorf skiptir máli.
Geiri eins og hann er ávallt kallaður er einstaklega jákvæður maður svo eftir er tekið, hann hefur vakið athygli fyrir uppbyggjandi og skemmtileg skrif á samfélagsmiðlum.

Geirarður er fæddur á Fæðingarheimilinu í Reykjavík 16. desember 1966. Foreldrar hans eru þau Svanhildur Geirarðsdóttir bankastarfsmaður og Guðlaugur Magnús Long byggingameistari.
Geirarður á tvo bræður, þá Kjartan f. 1972 og Bjarka Long f. 1977.

Fór beint í veg fyrir bíl
„Þegar ég var lítill þá bjuggum við fjölskyldan hjá ömmu og afa á Ægisíðunni. Lífið var æðislegt á þessum tíma, stutt í sjóinn og grásleppukarlana. Við afi, nafni minn, vorum miklir mátar og hann gerði allt fyrir mig.
Þegar ég var fimm ára þá var ég að hjóla út í götu og fór beint í veg fyrir bíl. Aumingja afi horfði á þetta gerast út um stofugluggann. Ég flaug af hjólinu og það kostaði viku legu á Borgarspítalanum. Mér skilst að starfsfólkið hafi verið fegið þegar ég útskrifaðist því ég var víst oft ansi óþekkur,“ segir Geiri og hlær.

Árgangurinn mjög samheldinn
„Foreldrar mínir byggðu sér hús í Kópavoginum og þangað fluttum við 1973. Ég gekk í Mela- og Digranesskóla en um 12 ára aldurinn fluttum við í Mosfellssveit.
Ég gekk í Gagnfræðaskóla Mosfellsbæjar en fannst lærdómur ekkert sérstaklega skemmtilegur þótt kennararnir hafi verið fínir. Það var þó alltaf gaman í smíði hjá Erlingi smíðakennara. Árin í Gaggó voru engu að síður frábær og árgangurinn minn var mjög samheldinn.“

Dreymdi um að verða bóndi
„Ég var ekki mikið í íþróttum á gagnfræðaskólatímabilinu en stundaði félagsmiðstöðina Svanssjoppu þeim mun meira. Það var ótrúleg þolinmæði sem Svanur sýndi okkur unglingunum og hann á þakkir skilið fyrir það.
Flest sumur á mínum yngri árum fór ég í sveit, hestarnir, sveitavinnan og útiveran áttu vel við mig. Það var nokkuð skondið þegar við krakkarnir vorum að velja okkur vinnustað í starfskynningu í 9. bekk þá valdi ég að fara í sveit, minn draumur var alltaf að verða bóndi.
Ég starfaði svo eitt sumar hjá Hestaleigunni Laxnesi, það var alveg magnað, maður var á hestbaki bróðurpart dagsins allt sumarið.“

Ævintýri í millilandasiglingum
„Eftir útskrift fór ég í Iðnskólann í Reykjavík á málmiðnaðarbraut. Hætti svo þar og réði mig sem messagutta á varðskipið Tý og varð fljótt fullgildur háseti. Eftir tæp tvö ár fór ég að læra allt sem viðkom málmsuðu í vélsmiðjunni Héðni og svo tók við 18 mánaða tímabil á Tý aftur.
Áramótin 1986-87 hætti ég á Tý og réði mig sem viðgerðarmann á flutningaskipinu Selnesi. Níu mánaða ævintýri í millilandasiglingum var fram undan og siglt var á milli hafna í Evrópu og Ameríku. Eftir þetta úthald var ég eitt ár á varðskipinu Ægi.“

Hjólreiðarnar heilla
Eiginkona Geira er Bóel Kristjánsdóttir sérfræðingur hjá Íslandsbanka. Þau fóru að vera saman árið 1986 og giftu sig árið 2006. Börn þeirra eru Svandís Ösp f. 1992 sjúkraþjálfari og Stefán Óli f. 1994 ráðgjafi hjá Byko. Barnabarnið Steinar Leó er fæddur árið 2018.
Ég spyr Geira út í áhugamálin. „Skotveiði, jeppaveiki, skíðin, vélsleðinn og ferðalög með fjölskyldunni er það sem kemur fyrst upp í hugann. Síðustu ár hafa hjólreiðar heillað mig en ég hjóla til og frá vinnu allt árið um kring.”

Gaman að þjónusta sveitunga mína
„Ég fór að læra trésmíði og vann til að byrja með við allrahanda húsbyggingar með tengdaföður mínum en fór síðan í sérsmíði á gluggum og útihurðum hjá Þyn og Búlka.
Árið 2003 hóf ég störf hjá GK gluggum hér í Mosó, fyrirtæki sem þekkt var fyrir gæðaframleiðslu. Árið 2011 fluttu eigendur fyrirtækisins fyrirækið í Þykkvabæinn en ég varð eftir. Þá tók ég að mér vélastjórnun hjá Gluggasmiðjunni í Reykjavík og var þar til ársins 2014.
Ég hætti í smíðinni og fljótlega var mér boðið starf í Húsasmiðjunni í Grafarholti. Þar líður mér vel með frábærum vinnuvinum og skemmtilegum viðskiptavinum. Mosfellingar eru duglegir að versla í Grafarholtinu og mér þykir gaman að þjónusta sveitunga mína.“

Með stórt Aftureldingarhjarta
Geiri eyðir miklum tíma í íþróttamiðstöðinni að Varmá og hefur gert lengi en hann er með stórt Aftureldingarhjarta. Bóel eiginkona hans spilaði knattspyrnu hjá félaginu og þjálfaði í 25 ár og dóttir þeirra hjóna spilaði einnig í boltanum í rúm 20 ár. Geiri fór því að taka þátt í ýmsu sem tengdist veru þeirra hjá félaginu, fjáröflunum, mótum og utanlandsferðum.
Þegar meistaraflokkur kvenna var endurvakinn árið 2006 þá aðstoðaði hann við alla vinnu í kringum flokkinn ásamt öðrum, m.a. að standsetja hús sem erlendu leikmennirnir bjuggu í yfir sumarið. Hann segir sjálfboðaliðastarfið hafa gefið sér einstaklega mikið og tímabilið með meistaraflokksráðinu sé ógleymanlegt. Það sé ekki sjálfgefið að hafa lið í efstu deild í 8 ár.

Mannauður félagsins er einstakur
Árið 2013 fékk Guðjón Helgason þáverandi formaður Aftureldingar Geira til að ganga til liðs við aðalstjórn félagsins. Hann lét tilleiðast og er þar enn, 7 árum síðar. Geiri hefur verið heiðraður fyrir störf sín og hefur fengið brons- og silfurmerki frá Aftureldingu, silfur frá UMSK og silfur frá Íþrótta- og Ólympíusambandi Íslands.
„Afturelding er stórt félag og það hefur verið heiður að vinna með öllu þessu frábæra fólki í gegnum tíðina, mannauður félagsins er einstakur.
Vegna stjórnarsetu minnar hef ég reynt að fylgjast vel með starfseminni í öllum deildum félagsins. Ég horfi til að mynda á yfir 100 fótboltaleiki á ári, eins fer ég á leiki og mót hjá öðrum deildum.
Í vetur sem leið var ég beðinn um að koma í varastjórn UMSK sem ég þáði. Það er áhugavert að skoða íþrótta og ungmennastarfið frá þeirri hlið líka.“

Hjálpar vonandi öðrum líka
Ég sný talinu að jákvæðni og fallegum orðum. Geiri hefur vakið athygli fyrir hvatningarorð sem hressa sálina og mörgum finnst gott að lesa. Af hverju skyldi hann taka þann pólinn í hæðina? „Í amstri dagsins getur verið gott að minna sjálfan sig á lífið. Skrif mín hjálpa mér í gegnum daginn og vonandi öðrum í leiðinni,” segir Geiri og brosir er við kveðjumst.

Mosfellingurinn 14. nóvember 2019
ruth@mosfellingur.is

Mosfellsbær tekur á móti flóttamönnum

flottamos

Fimmtudaginn 12. september kom ellefu manna kvótaflóttahópur frá Kenía til Mosfellsbæjar. Þetta er í annað skipti sem Mosfellsbær tekur við kvótaflóttafólki en í mars 2018 tók Mosfellsbær á móti tíu einstaklingum.
Vel tókst til við móttöku fyrri hópsins og er það ekki síst því að þakka hversu vel samfélagið tók á móti fólkinu. Félagsmálaráðuneytið leitaði því aftur til Mosfellsbæjar í ár til þess að taka á móti nýjum hópi.

Koma sér inn í íslenskt samfélag
Miðvikudaginn 6. nóvember stóð Mosfellsbær fyrir móttöku til heiðurs hinum nýju íbúum í Listasal bókasafns Mosfellsbæjar.
Haraldur Sverrisson bæjarstjóri og Ásmundur Einar Daðason félags- og barnamálaráðherra buðu fólkið velkomið og notaði ráðherra tækifærið til að þakka Mosfellsbæ og öðrum sem að verkefninu koma fyrir þeirra góða framlag.
Nú eru rúmar átta vikur liðnar síðan fólkið kom og er það hægt og rólega að koma sér inn í íslenskt samfélag. Börnin eru byrjuð í skóla og tómstundum og hinir fullorðnu komnir í íslenskunám.

Stuðningur mjög mikils virði
Samstarf Mosfellsbæjar, Rauða krossins og félagsmálaráðuneytisins um verkefnið hefur verið mjög gott. „Það er einlæg ósk okkar sem að verkefninu koma að bæjarbúar taki eins vel á móti fólkinu núna og síðast.
Líf fólks í Kenía og á Íslandi er gjörólíkt og það er því margt sem okkar nýju íbúar þurfa að læra og takast á við og stuðningur okkar við þá er því mikils virði,“ segir Hulda Rútsdóttir verkefnisstjóri Mosfellsbæjar við móttöku flóttafólks.
Fólkið kemur frá Úganda og Súdan en dvaldi í flóttamannabúðum í Kenía.

Nýtt fjölnota íþróttahús tekið í notkun

fjolnotavarma

Nýtt fjölnota íþróttahús að Varmá var vígt laugardaginn 9. nóvember við hátíðlega athöfn. Húsið mun valda straumhvörfum í aðstöðu fyrir íþróttaiðkendur í Mosfellsbæ auk þess sem unnt verður að stunda hreyfingu á 250 metra langri göngu- og hlaupabraut á tímum þegar allra veðra er von.
Húsið, sem er um 4.000 m² að grunnfleti auk innfelldrar lágbyggingar, er sérútbúið til knattspyrnuiðkunar. Þar eru einnig þrjár hlaupabrautir auk göngubrautar umhverfis völlinn.

Grunnur að sigrum framtíðarinnar
Haustið 2017 var samþykkt að ráðast í byggingu á fjölnota íþróttahúsi á íþróttasvæðinu við Varmá. Í janúar 2018 hófst vinna við hönnun hússins í samvinnu við Aftureldingu og í kjölfarið var samið við fyrirtækið Alverk um að reisa húsið. Verkið gekk greiðlega og hefur verið á áætlun allan framkvæmdatímann.
„Ég vil óska öllum Mosfellingum innilega til hamingju með nýtt fjölnota íþróttahús,“ segir Haraldur Sverrisson bæjarstjóri. „Hér er byggt til næstu ára og þetta hús mun valda straumhvörfum fyrir íþróttaiðkendur í Mosfellsbæ og er enn einn liður í því að efla umgjörðina og leggja þannig grunn að sigrum framtíðarinnar.“

Yfir 600 í yngri flokkum fótboltans
Æfingar hófust í húsinu í lok október en formlega vígsla fór fram um síðustu helgi.
Arkitekt hússins er Sturla Ásgeirsson hjá Arkþing en verkfræðihönnun var á vegum Verkís, byggingarstjóri er Halldór Bogason hjá Alverk en eftirlit á vegum Mosfellsbæjar var í höndum Þorsteins Sigvaldasonar og Óskars Gísla Sveinssonar.
„Það er sérlega ánægjulegt að sjá húsið verða að veruleika. Fjölgun iðkenda í Aftureldingu hefur verið mikil síðustu misseri,“ segir Birna Kristín Jónsdóttir formaður Aftureldingar. „Í dag eru iðkendur í barna- og unglingastarfi í öllum deildum um 1.550 en flestir í knattspyrnudeild eða rétt rúmlega 600. Ég hlakka gríðarlega til framtíðarinnar, sem er sannarlega björt hér í Mosfellsbæ.“

——

NAFNASAMKEPPNI

Sett hefur verið á laggirnar nafnasamkeppni fyrir nýja húsið. Hægt er að senda inn tillögu á vefsíðu Mosfellsbæjar, www.mos.is, til 25. nóvember. Mun nafnanefnd, sem skipuð er tveimur aðilum úr bæjarstjórn og fulltrúa frá Aftureldingu, kynna vinningstillöguna í næsta tölublaði Mosfellings.
Smelltu hér til að senda inn þína tillögu!

Úthlutun 15 lóða við Súluhöfða lokið

suluhofdilodir

Umsóknarfresti vegna úthlutunar 15 lóða við Súluhöfða lauk á miðnætti 31. október. Alls bárust umsóknir frá 27 umsækjendum. Lögmaður Mosfellsbæjar, skjalastjóri og persónuverndarfulltrúi opnuðu umsóknir sem borist höfðu í málakerfið bæjarins mánudaginn 4. nóvember í Helgafelli, fundarsal bæjarstjórnar Mosfellsbæjar.
Umsækjendum var boðið að vera viðstaddir opnun umsókna en ekki var á þeim fundi tilkynnt um nöfn umsækjenda né hæstbjóðendur í tilteknar lóðir heldur eingöngu tilboðin lesin upp.

Niðurstöður úthlutunarinnar voru kynntar þriðjudaginn 12. nóvember kl. 16:00 í Helgafelli. Meðalverð lóða nam rúmleg 21,4 m.kr. en lóðir neðan götu voru að mati tilboðsgjafa verðmætari. Þannig er meðalverð lóða neðan götu um 26,7 m.kr. en ofan götu er meðalverðið um 18 m.kr.
Fjórar af nítján lóðum við Súluhöfða voru ekki til úthlutunar að sinni þar sem þær liggja of nálægt golfvellinum. Þær lóðir sem um ræðir eru númer 43, 45, 47 og 36. Áður en þeim verður úthlutað þarf að taka ákvörðun um hvernig breyta skuli legu tveggja brauta golfvallarins. Gera má ráð fyrir því að sú ákvörðun liggi fyrir innan skamms og í kjölfarið verði unnt að úthluta þessum fjórum lóðum á grunni sömu úthlutunarskilmála og gilda um hinar fimmtán lóðirnar.

Afgangur af rekstri bæjarins áætlaður um 350 milljónir

fjarhagsaætlunmos

kakamosFjárhagsáætlun Mosfellsbæjar fyrir árið 2020 og næstu þrjú ár þar á eftir var lögð fram til fyrri umræðu í bæjarstjórn þann 30. október.
Fjárhagsáætlunin gerir ráð fyrir að tekjur verði 13.380 m.kr., gjöld án fjármagnsliða 12.402 m.kr., fjármagnsliðir 628 m.kr. og að rekstrarafgangur verði 350 m.kr. Fyrirhugað er að framkvæma fyrir 2.970 m.kr. sem að mestu rennur til skóla-, gatna- og veitumannvirkja. Gert er ráð fyrir að íbúum fjölgi um rúmlega 5% milli ára, en þeir eru nú um 12.000. Þetta kemur fram í tilkynningu frá Mosfellsbæ.

Leikskólagjöld lækki um 5%
Áætlunin gerir ráð fyrir að framlegð verði 10,6% og að veltufé frá rekstri verði jákvætt um 1.277 m.kr. eða tæplega 10%. Skuldaviðmið skv. sveitarstjórnarlögum verði 79% í árslok.
Gert er ráð fyrir hóflegri hækkun gjaldskráa til samræmis við stefnumörkun lífskjarasamninganna en að leikskólagjöld lækki um 5%, auk þess sem álagningarprósentur fasteignagjalda lækka.
Áfram verður aukning á nýjum plássum á leikskólum fyrir 12–18 mánaða börn og er gert ráð fyrir að fjölga um 25 pláss á árinu 2020.
Á sviði fjölskyldumála eru lagðir til auknir fjármunir í málefni fatlaðs fólks, meðal annars með stofnun heimilis fyrir geðfatlaða.
Á sviði menningarmála er lagt til að framlag í lista- og menningarsjóð hækki um 14% auk þess sem stefnumörkun um starfsemi Hlégarðs ljúki og auknum fjármunum verði varið í endurbætur hússins.

Kraftur einkennir samfélagið
„Það er okkur Mosfellingum sem fyrr fagnaðarefni að rekstur og starfsemi Mosfellsbæjar er í miklum blóma og kraftur einkennir samfélagið okkar sem er í örum vexti,“ segir Haraldur Sverrisson bæjarstjóri.
„Þjónusta við íbúa og viðskiptavini eflist stig af stigi, Helgafellsskóli er í byggingu og nýtt fjölnota íþróttahús var tekið í notkun um síðustu helgi. Allt er þetta gert til að mæta þörfum íbúa núna og til framtíðar, byggja upp gott samfélag og auka lífsgæði og velferð íbúa.“
Síðari umræða um fjárhagsáætlun Mosfellsbæjar fyrir árið 2020 fer fram miðvikudaginn 27. nóvember.

Hetjusögur og heilsa

Heilsumolar_Gaua_14nov

Við elskum hetjur. Elskum að sjá einstaklinga og hópa vinna til verðlauna. Gera meira en aðrir. Í vikunni var viðtal við unga konu í Fréttablaðinu. Í undirfyrirsögn sagði að hún hefði lokið framhaldsprófi í djasssöng fimm árum eftir að hún hóf nám og afrekað á sama tíma að ljúka mastersnámi og eignast tvö börn. Þetta er afrek, það er ekkert grín að koma svona miklu í verk á meðan maður berst sem foreldri í gegnum svefnlitlu næturnar sem óhjákvæmilega fylgja því að eiga ungbörn.

Á sama tíma og við elskum að heyra af fólki sem getur og gerir meira en við hin, þá tölum við um mikilvægi jafnvægis í lífinu. Að við þurfum að passa upp á heilsuna, hreyfa okkur, sofa vel, borða hollt, njóta þess að vera með fjölskyldu og vinum og sinna áhugamálunum.

Hvernig fer þetta saman? Að hafa brjálað að gera og koma mörgu í verk á sama tíma og passa upp á jafnvægið í lífinu? Ég hef farið í gegnum nokkur „brjálað að gera“ tímabil í lífinu, mislöng. Stundum lendir maður einhvern veginn í þannig tímabilum, en stundum er maður sjálfur arktitektinn að þeim. Eftir á að hyggja, þá get ég með fullvissu sagt að heilsufar mitt hefur aldrei verið verra en þegar sem brjálaðast var að gera. Ég á dagbækur sem sýna þetta svart á hvítu. Get flett í þeim og lesið hvað ég var lengi að drattast upp á Reykjafellið og hvað púlsinn fór hátt.

Alveg eins og ríkisstjórnir, þar á meðal okkar eigin, eru byrjaðar að tala um að nota vellíðan og velferð frekar en hagvöxt sem mælikvarða á velgengi þjóða, gæti verið gott fyrir okkur að líta í eigin barm og tala og haga okkur samkvæmt því sem við vitum að er best fyrir okkur. Skipta vellíðan inn fyrir brjálæðið.

Heilsumolar Gaua
Mosfellingur 14. nóvember 2019

Tækifærin eru óteljandi

sóley

Sóley Rut Jóhannsdóttir ætlaði sér alltaf að verða dýralæknir en hætti við og fór í Byggingatækniskólann í Reykjavík í húsgagna- og húsasmíði. Hún er nú með tvö sveinspróf í hendi aðeins 26 ára gömul og lætur ekki staðar numið þar því hún byrjaði í meistaranámi nú í haust.
Hún segir að iðngreinarnar henti jafnt konum sem körlum og að atvinnutækifærin séu óteljandi.

Sóley Rut er fædd í Reykjavík 10. mars 1993. Foreldrar hennar eru þau Katrín María Káradóttir fagstjóri og dósent í fatahönnun við Listaháskóla Íslands og Jóhann Bjarki Júlíusson flugvirki hjá British Airways.
Sóley Rut á eina systur, Salvöru Lóu Stephensen, fædda 2017. Faðir hennar er Sigurður Sverrir Stephensen barnahjartalæknir.

Flutti til Parísar
„Ég ólst upp að mestu leyti í miðbæ Reykjavíkur hjá mömmu minni en foreldrar mínir slitu samvistum þegar ég var á öðru ári. Árið 2000 fluttum við mæðgur til Parísar þar sem mamma fór í nám og þar bjuggum við í 5 ár.
Við mamma komum alltaf heim til Íslands á sumrin því hún starfaði sem fjallaleiðsögumaður. Ég var þá mikið hjá afa og ömmu og hjá vinafólki og á því góðan hóp af aukaforeldrum sem mér þykir ákaflega vænt um. Þar á meðal er guðmóðir mín, Kristín Sólveig Kristjánsdóttir, en börn hennar urðu svolítið eins og systkini mín.
Faðir minn, Bjarki, og Eva eiginkona hans hafa búið erlendis meira og minna alla mína ævi en ég hef líka verið mikið hjá þeim.“

Græddi margt á þessum árum
„Árin í París voru fyrir mér mikil lífsreynsla og ég kunni alveg ofboðslega vel við mig þarna. Ég var samt alltaf í góðu sambandi við gömlu vini mína úr Austurbæjarskóla. Það var ekki fyrr en ég varð unglingur sem ég fékk fyrst heimþrá og fljótlega eftir það fluttum við heim.
Ég hef oft hugsað um það hvernig líf mitt hefði orðið ef við hefðum ekki flutt aftur heim, en ég sé alls ekki eftir neinu. Ég græddi margt á árunum þarna úti, nýtt tungumál, nýja menningu, kynntist fólki og svo á maður svo margar góðar minningar sem erfitt er að lýsa með orðum.“

Þetta var eins og í bíómynd
„Af æskuminningunum er af mörgu að taka, veiði við Brúará og stundirnar í bústaðnum hjá ömmu og afa. Þau voru miklir veiðimenn og sáu um lítið veiðihús þar. Ég fékk að skrifa aflatölur í bækur og segja frá því sem gerst hafði yfir daginn. Þau eiga allar þessar bækur ennþá.
Ég held mikið upp á mótorhjólaferð sem ég fór í með pabba og Evu en það var alveg nýr heimur fyrir mig að sitja aftan á mótorhjóli. Við gistum í hjólahýsagarði með fullt af mótorhjólafólki, þetta var eins og í bíómynd,“ segir Sóley Rut og brosir. „Þau fóru líka með mig til Þýskalands til að læra á Trial mótorhjól, það var mjög skemmtilegt.“

Besta gjöf sem ég hef fengið
„Ég man þegar ég fór með mömmu á tískusýningu hjá Christian Dior og John Galliano á Champs-Elysées en hún fór til að sýna mér afrakstur vinnu sinnar en hún vann fyrir tískuhúsin. Ég man hvað ég var stolt af henni.
Þegar ég var níu ára þá var ég búin að fara á óteljandi tískusýningar, taka þátt í að sýna og svo sat maður fyrir í myndatökum fyrir tískublöð, maður hrærðist í þessum heimi.
Besta minning mín er samt án efa dagurinn þegar mamma sótti mig í skólann og kom mér á óvart með bestu gjöf sem ég hef fengið á ævinni. Þegar við komum heim þá beið mín hundabúr með hvolpi í. Vivienne varð órjúfanlegur partur af okkar tveggja manna fjölskyldu en hún veitti okkur stanslausa gleði í 13 ár. Besti hundur í heimi og ég hef ekki ennþá fundið neitt sem nær að fylla hennar pláss í hjarta mínu.“

Keppti á tveimur mótum
„Við bjuggum í miðbænum eftir að við fluttum heim og ég bjó þar fram yfir útskrift úr menntaskóla en þá flutti ég að heiman. Ég var eitt ár í Menntaskólanum í Reykjavík en færði mig svo yfir í Menntaskólann við Hamrahlíð og útskrifaðist þaðan. Ég kynntist módelfitness á síðasta árinu mínu í MH og keppti á tveimur mótum. Með skólanum vann ég á McDonalds´s og á skemmtistöðum í bænum.“

Innréttuð með tilliti til nýtingar
„Planið alveg frá því að ég var barn var að læra dýralækningar en á síðustu metrunum í skólanum fóru einhverjar efasemdir af stað og ég hætti við. Ég fór að vinna í fiski svona til að prófa eitthvað nýtt, en fór svo að hugsa um einkaþjálfaranám eða innanhússhönnun.
Mamma fann að ég var eitthvað áttavillt þegar ég var farin að skoða skóla í Ástralíu. Hún stakk upp á að ég færi í húsgagnasmíði þar sem ég hafði alltaf haft mikinn áhuga á smáhúsum sem voru innréttuð á margvíslegan máta, sérstaklega með tilliti til nýtingar á plássi.
Ég byrjaði í Byggingatækniskólanum 2012 og strax eftir fyrstu önnina var ég búin að skrá mig á húsasmíðabrautina líka. Ég vann sem barþjónn með skólanum og gerði það þangað til ég fór á samning í húsasmíði.“

Bættum við öðrum hundi
„Ég flutti í Mosfellsbæ og ári eftir að ég flutti kynntist ég Stefáni Sindra Ragnarssyni, múrara. Við keyptum okkur lítið raðhús nú í byrjun árs og erum alveg ofboðslega ánægð hérna.
Ég var nýbúin að fá mér hvolp þegar við Stefán kynntumst en við ákváðum síðan að bæta við öðrum hundi sem kom til okkar í sumar. Tíkurnar eru hálfsystur og það er bara eins og þær hafi verið saman alla ævi.“

Vinnutíminn gaf mér frelsi
„Ég kláraði sveinspróf í húsasmíði en hætti svo að vinna við smíðar. Ég var orðin frekar leið á lífinu og fór aftur í barstörfin og vinnutíminn gaf mér frelsi til að tjasla mér saman andlega.
Eftir nokkra mánuði var mér farið að líða betur og vinkonur mínar og kærastinn hvöttu mig til að sækja um annað smíðastarf og láta slag standa. Ég gerði það og er óendalega þakklát fyrir þá ákvörðun. Fyrirtækið sem ég starfa hjá í dag heitir Afltak, og er hér í Mosfellsbæ. Frábært fyrirtæki í alla staði sem heldur vel utan um sitt fólk. Í dag eru óteljandi atvinnutækifæri fyrir iðnmenntað fólk og ég hvet unga fólkið til að kynna sér þetta nám.
Fyrir nokkrum vikum fékk ég sveinsbréfið í húsgagnasmíði og svo byrjaði ég í Meistaraskólanum núna í september svo það er því lítill tími fyrir áhugamál þessi misserin nema kannski í félagsstörfum fyrir Félag fagkvenna en það er félag fyrir konur sem starfa í karllægum iðngreinum,“ segir þessi harðduglega kona að lokum er við kveðjumst.

Mosfellingurinn 24. október 2019
ruth@mosfellingur.is

Varmárkórinn er nýr kvennakór í Mosfellsbæ

kvennakór

Nýr kór hefur verið stofnaður í Mosfellsbæ. Kórinn er aðallega skipaður fyrrverandi félögum Skólakórs Varmárskóla en fleiri áhugasamir geta þó tekið þátt en þurfa að vera söngvanir.
Það var flottur hópur fyrrverandi félaga sem söng á 40 ára afmælistónleikum Skólakórs Varmárskóla í vor og einhverjir höfðu á orði að gaman væri að gera eitthvað meira úr þessu. Varð það tilefni að stofnun kórsins sem er kvennakór.
Markmið kórsins er að syngja saman í góðum félagsskap og vera stuðningur við kórstarfið í Varmárkóla auk þess að vera með eigin tónleika eða í samvinnu við aðra.
Kórinn hefur fengið æfingaaðstöðu í Varm­árskóla og þurfa kórfélagar ekki að greiða kórstjóra laun eða önnur kórgjöld.
Æfingar eru tvisvar í mánuði, að öllu jöfnu annan og fjórða miðvikudag hvers mánaðar. Þetta er því upplagt tækifæri fyrir þær sem hafa gaman af syngja í kór en vilja kannski ekki binda sig í hverri viku.
Kórinn hefur fengið nafnið Varmárkórinn. Söngstjóri er Guðmundur Ómar Óskarsson, netfang gudm.omar@gmail.com.

Ólga á Reykjalundi

reykjalundurolga

Mikil reiði og vanlíðan er meðal starfsfólks Reykjalundar í kjölfar þess að stjórn SÍBS, sem á Reykjalund, sagði Birgi Gunnarssyni forstjóra og Magnúsi Ólasyni, framkvæmdastjóra lækninga, upp störfum með skömmu millibili. Birgir gegndi stöðu forstjóra í þrettán ár og Magnús starfaði á Reykjalundi í 34 ár.
Magnúsi var sagt upp störfum 9. október, aðeins nokkrum vikum áður en hann átti að fara á eftirlaun. Í viðtali við RÚV sagði hann uppsögnina hafa komið sér mjög á óvart og viðurkenndi að hann hefði séð starfslokin öðruvísi fyrir sér.
Daginn eftir voru sjúklingar í endurhæfingu sendir heim þar sem starfsfólk treysti sér ekki til að sinna þeim án framkvæmdastjóra lækninga. Starfsmennirnir lýstu yfir vantrausti á stjórn Reykjalundar og skoruðu á heilbrigðisráðherra að grípa inn í stöðuna.

Birgir frábær og Magnús kominn á aldur
Að minnsta kosti fjórir læknar á Reykjalundi hafa sagt upp störfum síðustu daga og fram hefur komið í fréttum að fleiri íhugi stöðu sína. Tólf læknar starfa að jafnaði á stofnuninni.
Stjórn SÍBS hefur sagt að ekkert saknæmt hafi átt sér stað í störfum fyrrverandi forstjóra. Starfslokasamningur var gerður við hann sem trúnaður ríkir um. Sveinn Guðmundsson, formaður SÍBS, sagði Birgi hafa verið frábæran stjórnanda. Magnúsi hefði verið sagt upp sökum aldurs.
Ólafur Þór Ævarsson geðlæknir hefur nú verið ráðinn í stöðu framkvæmdastjóra lækninga á Reykjalundi. Herdís Gunnarsdóttir, framkvæmdastjóri endurhæfingarsviðs stofnunarinnar, hefur verið ráðin forstjóri tímabundið en til stendur að auglýsa stöðuna. Herdís var áður forstjóri Heilbrigðisstofnunar Suðurlands. Hún sagðist í samtali við RÚV búast við að nýr forstjóri taki við 1. febrúar á næsta ári.

Knatthúsið að Varmá vígt 9. nóvember

knatthús

Nýtt fjölnota knattspyrnuhús verður vígt að Varmá laugardaginn 9. nóvember. Dagskrá hefst kl. 13 þegar Sturla Sær Erlendsson formaður íþrótta- og tómstundanefndar býður gesti velkomna. Þá munu bæjarstjóri Mosfellsbæjar, Haraldur Sverrisson, og Birna Kristín Jónsdóttir formaður Aftureldingar ávarpa samkomuna. Alverk ehf. mun afhenda húsið formlega og kynnt verður samkeppni meðal bæjarbúa um nafn á húsið. Boðið verður upp á knattspyrnu- og frjáls­íþróttaþrautir, vítakeppni og hoppukastala. Þá mun félag eldri borgara í Mosfellsbæ, FaMos, opna formlega göngubraut í húsinu. Boðið verður upp á léttar veitingar.

Gert er ráð fyrir því að æfingar hefjist í húsinu þriðjudaginn 29. október að loknu vetrarfríi í skólum.

SIGRAR

heilsa24okt

Við fórum 25 manna hópur til Barcelona fyrir stuttu að taka þátt í skemmtilegri keppni sem kallast Spartan Race. Fyrir suma var þetta fyrsta keppnin, aðrir voru búnir að taka þátt í nokkrum keppnum frá því að við kynntumst henni fyrst í desember 2018. Það var kjarnakona í æfingahópnum okkar sem stakk upp á því að við myndum taka þátt í Spartan Race í Hveragerði 2018 og vorum við nokkur sem stukkum á þá hugmynd. Hún var sjálf reyndar fjarri góðu gamni þá, en löglega afsökuð og kemur sterk inn í næstu keppni sem við förum í.

Spartan Race er magnað fyrirbæri, það geta allir tekið þátt í sömu keppninni en á sínum forsendum og í flokki sem hentar viðkomandi. Afreksíþróttamenn, atvinnumenn í greininni, keppa á sama stað og fólk sem hefur aldrei tekið þátt í utanvegarþrautahlaupi. Munurinn er vegalengdin sem er hlaupin, erfiðaleikastig þrautanna sem þarf að leysa á leiðinni og hvort þú mátt fá aðstoð frá öðrum eða ekki.

Við sem tókum þátt í Hveragerði urðum strax heilluð af keppninni, passlega löng hlaup, erfiðar en skemmtilegar þrautir og óvæntar aðstæður til að takast á úti í náttúrunni. Fólkið okkar hefur síðan þá tekið þátt í Kaliforníu, Búdapest, Skotlandi og svo núna í Barcelona. Mér finnst skemmtilegast að upplifa alla litlu en samt stóru sigrana í kringum keppnina. Til dæmis þegar sá 55 ára gat í keppni klifrað upp drulluskítugan og sleipan kaðallinn, eitthvað sem hann hefur dreymt um að gera síðan hann komst aldrei upp kaðal í grunnskólaleikfimi. Það var líka gaman að upplifa hvað konurnar í hópnum voru sterkar, hreinlega pökkuðu saman styrktarþrautunum í Barcelona, þrautum sem heimasæturnar áttu margar í erfiðleikum með. Samstaðan, þrautseigjan, samveran og gleðin við að klára erfiða en gefandi þrautabraut telur líka mikið.

Við erum rétt að byrja, kemur þú með næst?

Heilsumolar Gaua
Mosfellingur 24. október 2019

90 ára afmæli Klébergsskóla

Sölvi Sveinbjörnsson (nýútskrifaður úr Klébergsskóla), Sigrún Anna Ólafsdóttir skólastjóri Klébergsskóla, Dagur B. Eggertsson borgarstjóri og Brynhildur Hrund Jónsdóttir aðstoðarskólastjóri Klébergsskóla.

Sölvi Sveinbjörnsson (nýútskrifaður úr Klébergsskóla), Sigrún Anna Ólafsdóttir skólastjóri Klébergsskóla, Dagur B. Eggertsson borgarstjóri og Brynhildur Hrund Jónsdóttir aðstoðarskólastjóri Klébergsskóla.

Afmælishátíð var haldin í Klébergsskóla á Kjalarnesi laugardaginn 19. október en þá voru liðin 90 ár frá því að hann var vígður. Á afmælisdaginn var opið hús í skólanum og mættu fjölmargir gestir í heimsókn.
Nokkur félagasamtök á Kjalarnesi stóðu að byggingu hússins árið 1929 sem var einnig hugsað sem samkomuhús sveitarinnar og var Klébergsskóli í röð fyrstu heimavistarskóla á landinu.
Klébergsskóli er því elsti grunnskólinn í Reykjavík en það sýnir að það var framsýnt fólk í skólamálum á Kjalarnesi og er enn í dag. Á Kjalarnesi er starfræktur leikskóli, grunnskóli, tónlistarskóli, frístundaheimili og félagsmiðstöð ásamt íþróttamiðstöð undir einum hatti.
Í tilefni stórafmælisins var afmælisþema í skólanum vikuna fyrir afmælið þar sem nemendur unnu að ýmsum verkefnum tengdum 90 ára afmælinu, fræðsla í bland við skemmtun. Gestir og gangandi gátu skoðað afrakstur þemavinnunnar og upplifað margt skemmtilegt í öllum stofum skólans. Að sjálfsögðu var glæsileg afmælis­terta í boði fyrir alla.

Náttúran og blómin eru minn heimur

júlí

Júlíana Rannveig Einarsdóttir eða Júlí eins og hún er ávallt kölluð var ung að árum er hún byrjaði að starfa í blómaverslun en áhugi á blómum og blómaskreytingum hefur lengi verið í hennar stórfjölskyldu, langt aftur í ættir. Hún útskrifaðist úr Garðyrkjuskóla ríkisins árið 1996 og tók síðar að sér starf þar sem brautarstjóri blómaskreytingabrautar og starfaði við það í mörg ár.
Í dag unir Júlí sér vel í sínu eigin gróðurhúsi í Mosfellsdalnum þar sem hún hefur komið sér upp góðri vinnuaðstöðu meðal annars til námskeiðshalds en hún byrjar með haustkransanámskeið núna í október.

Júlíana Rannveig er fædd í Reykjavík 29. desember 1958. Foreldrar hennar eru þau Hafdís Jóhannsdóttir verslunarkona og Einar M. Guðmundsson járnsmiður, leikari og kennari. Hafdís lést árið 2001.
Systkini Júlíönu eru þau Jóhann, Gunnlaugur og Heiða. Júlí er yngst systkinanna sem fædd eru á sex árum en móðir þeirra var 25 ára þegar hún eignaðist Júlí.

Frumbyggjar í Kópavogi
„Ég er alin upp í vesturbæ Kópavogs, foreldrar mínir voru frumbyggjar þar sem kom ekki til af góðu því það var enga lóð að fá í Reykjavík á þessum tíma en foreldrar mínir eru þaðan. Þau byggðu fyrst bílskúrinn og fluttu þangað inn þegar ég var 2 ára og í honum bjuggum við þangað til ég varð 12 ára, sem sagt 6 manna fjölskylda í 40 fm. Mér fannst fínt að búa í Kópavogi enda þekkti ég ekkert annað. Það voru krakkar í hverju húsi og í stærstu fjölskyldunni voru 17 börn.
Vor, sumar og haust lékum við okkur í snú snú og brennóbolta en á veturna var farið á skauta og svo renndum við okkur í brekkunum á öllu sem rann. Ég var send í sveit á sumrin og maður fór norður um miðjan maí og kom ekki aftur fyrr en í september. Ég var mikið fyrir að passa börn bæði í sveitinni og með skólanum, svo vann maður í unglingavinnunni og í fiskbúð og fleira.“

Heimasmurt og mjólk í flösku
„Ég gekk í Kársnesskóla sem var þrísetinn þá, það var enginn skólabíll og ég man aldrei eftir því að hafa verið keyrð eða sótt í skólann. Það var heldur ekkert mötuneyti svo maður fór bara með heimasmurt og mjólk í flösku.
Leiðin lá síðan í Þingholtsskóla sem var splunkunýr skóli og þaðan fór ég í Iðnskólann í Hafnarfirði í almennt nám því ég vissi ekkert hvað ég vildi verða. Ég fór svo út á vinnumarkaðinn og starfaði við símsvörun hjá Geysi og Sláturfélagi Suðurlands.“

Byrjuðu að búa saman 17 ára
Júlí kynntist eiginmanni sínum, Þresti Sigurðssyni, mjög ung. Þau ólust bæði upp í vesturbæ Kópavogs og gengu saman í skóla. Þau trúlofuðu sig eftir að hafa verið saman í þrjú ár og byrjuðu að búa þegar þau voru 17 ára. Þröstur er verktaki með gröfur og vörubíla en hann er símsmiður að mennt. Þau hjónin hafa rekið verktakafyrirtækið í yfir 30 ár.
„Við Þröstur eigum þrjú börn, Hafdísi Huld tónlistarleikkonu f. 1979, hún er gift Alisdair Wright og þau eiga tvö börn, Ara­bellu Iðunni og Elíot Óðinn. Eiður Þorri er fæddur 1982, hann fetaði í fótspor föður síns og er verktaki með gröfur og vörubíla. Hann býr í Hveragerði með Margréti Þ. Magnúsdóttur og þau eiga tvær dætur, Örnu Sól og Ágústu. Fyrir átti hann Aþenu Sif sem býr hjá okkur og stundar nám í FMOS.
Yngst er Telma Huld f. 1984, hún er bílstjóri og hefur verið að vinna við akstur stórra bifreiða í kringum erlendar bíómyndir teknar hér heima. Hún á einn son, Júlían Aðils. Svo eigum við hundinn Mosa, kisur, hesta og hænur.“

Vann við akstur stórra bifreiða
„Ég tók verslunarpróf og meirapróf og vann við akstur stórra bifreiða með manninum mínum. Ég ákvað að hefja nám í Garðyrkjuskóla ríkisins, fór að læra blómaskreytingar og byrjaði 18 ára að vinna í blómabúð hjá Ringelbert í Rósinni.
Ég fann fljótt út að náttúran og blómin eru minn heimur og ég vann í mörgum blómabúðum eftir það en tók síðan að mér starf sem brautarstjóri blómaskreytingabrautar Garðyrkjuskólans frá 2001-2008.“

Dýfði blómunum í vax
„Áhugi á blómaskreytingum hefur lengi verið í minni fjölskyldu, langt aftur í ættir. Ein elsta heimild um blómaskreytingar á Íslandi sem ég hef heyrt um er frá langömmu minni sem bjó á Eskifirði en hún sá um brúðar- og útfararskreytingar.
Amma safnaði lyngi og jurtum yfir sumartímann og geymdi í strigapokum yfir veturinn. Hún bjó til blóm úr kreppappír og dýfði þeim í vax til að þau blotnuðu ekki í rigningu. Hún bankaði stundum upp á hjá fólki ef hún sá blóm út í glugga eða vissi af því að fólk ætti blómstrandi plöntur sem gætu nýst í skreytingar.“

Fékk draum minn uppfylltan
„Ég bjó í vesturbæ Kópavogs fyrstu 45 ár ævi minnar en fékk svo draum minn uppfylltan að flytja út fyrir bæinn. Við hjónin eltum Hafdísi dóttur okkar sem hafði fest kaup á húsi í Mosfellsdal ásamt manni sínum. Við fengum þau síðan til að flytja sig um set og kaupa með okkur Reykjahlíð sem síðar varð Suðurá.
Við endurbyggðum gróðurhúsin, þar hef ég komið mér upp góðri aðstöðu fyrir blómaskreytingar og svo er ég líka með námskeið og tek við bókunum símleiðis. Endurbyggingunni er ekki lokið og verður eflaust seint, við erum endalaust að breyta og bæta.”

Söngur, göngur og glaðleg börn
„Að ganga á fjöll og um landið okkar er dásemdin ein, við erum heppin að búa hér með náttúruna allt í kring. Ég þarf ekki annað en að koma mér í skó og viðeigandi fatnað og ganga af stað. Mín helsta heilsurækt er sú að ég geng hér daglega á Helgafellið eða Æsustaðafjall sem er hérna í bakgarðinum hjá okkur.
Ég hef líka alltaf haft gaman af að syngja og hef sungið í kórum síðan ég var í barnaskóla. Ég hef sungið með Samkór Kópavogs, Skagfirsku söngsveitinni, Álafosskórnum og Samstillingu en í dag syng ég með Léttsveit Reykjavíkur sem telur um 130 konur.
Er þá ekki óhætt að segja að áhugamál þín séu blóm, göngur og söngur? „Jú, svo sannarlega,“ segir Júlí brosandi og bætir við: „Og glaðleg börn.“ Með þeim orðum kveðjumst við.

Mosfellingurinn 3. október 2019
ruth@mosfellingur.is

 

 

Breyta banka í bar

sigmar vilhjálmsson og vilhelm einarsson standa í stórræðum

Sigmar Vilhjálmsson og Vilhelm Einarsson standa í stórræðum.

Miklar framkvæmdir standa yfir í húsinu sem áður hýsti Arion banka í miðbæ Mosfellsbæjar. Félagarnir Sigmar Vilhjálmsson og Vilhelm Einarsson ætla að breyta Arion í Barion.
„Hér mun opna sportbar, hverfisbar, veitingastaður eða hvernig sem við viljum orða það. Við erum að búa til félags­heimili fullorðna fólksins. Þetta verður ekki beint mathöll en alla vega tveir matsölustaðir á einum stað og Hlölli hluti af því. Við munum bjóða upp á steikur, salöt, rif, borgara og almennt góðan mat.“

Fjórir risaskjáir í tveimur rýmum
„Þetta verður skemmtilegur staður til að hittast á og horfa leiki eða stóra viðburði. Við verðum með fjóra risaskjái í tveimur hljóðrýmum. Þá verður svið á staðnum fyrir uppákomur. Hér verður líka hægt að koma með alla fjölskylduna og fara út að borða.
Við höfum stækkað rýmið til að koma öllu fyrir en alls munu komast 140 manns í sæti. Hér er ekki verið að tjalda til einnar nætur en stefnt er að því að opna Barion á næstu vikum.“
Þeir Sigmar og Vilhelm eru ekki alls ókunnugur veitingabransanum og hafa komið víða við en síðast ráku þeir saman Shake&Pizza í Keiluhöllinni.

Bankahvelfingin flóknust
Miklar framkvæmdir hafa átt sér stað í húsinu en Sigmar segir gömlu bankahvelfinguna hafa verið flókna að vinna sig í gegnum. „Það voru hér sjö menn í fimm daga þegar mest lét að bora og brjóta niður. Það er ekki til steinsög sem ræður við þetta þannig að þetta var erfiðasta verkið hingað til. Við reynum þó að halda í einhverjar minningar sem gefa staðnum ákveðinn sjarma.“
Öll neðri hæðin er lögð undir nýja staðnum en á efri hæðinni eru íbúðir í langtímaleigu. Eigandi hússins er Mosfellingurinn Óli Valur Steindórsson.